یەكێتی هەوڵی گەڕانەوەی ماف بۆ جوتیارانی كورد دەدات

ئەندامێكی ئەنجومەنی نوێنەران رایگەیاند، فراكسیۆنی یەكێتیی نیشتمانیی كوردستان رۆڵی گرنگ و كاریگەری هەبووە لە راگڕتنی ئەو بڕیارانەی كە لە دژی جوتیارانی كورد و دەستبەسەرداگرتنی زەوییەكانیان  لە ناوچەدابڕاوەكان دەرچووە، هاوكات خەرجكردنی بەشێكی زۆر لە قەرزی گەنمی ساڵانی رابردووی جوتیاران  بەهەمان شێوە بەهەوڵی فراكسیۆنەكەیان بووە.  

دكتۆر گەیلان قادر ئەندامی ئەنجومەنی نوێنەران بە PUKmedia ی راگەیاند: سەرۆك و ئەندامانی فراكسیۆنی یەكێتیی لە پەرلەمانی عیراق لە لیژنە جیاوازەكان بە لیژنەی كشتوكاڵەوە، هاوكاربوون لە گەڕانەوەی مافی جوتیاران و راگرتنی ئەو بڕیارانەی كە دژ بەزەوییە كشتوكاڵییەكانی جوتیارانی كورد لەناوچە جێناكۆكەكان دەردەكرا.

وتیشی: دواین هەوڵی یەكێتی لەڕێگەی سەرۆكی فراكسیۆنی یەكێتی و نوێنەرانی كەركوك لە فراكسیۆنی یەكێتی لە پەرلەمانی عێراق ئەوەبوو كە لەگەڵ فەرماندەی هەماهەنگی كەركوك كۆبوونەوەو بە روونی ئەوەیان باسكرد كە دژی هەر بڕیارێك دەوەستنەوە كە دژ بە مافی جوتیاران بێت.

ئەو ئەندامەی ئەنجومەنی نوێنەران ئەوەشی خستەڕوو: هەر بە هەوڵی فراكسیۆنی یەكێتیی نیشتمانیی كوردستان قەرزی كۆنی جوتیاران بە بڕی  308 ملیار دینار وەرگیرایەوە، كە دەبوو لە ساڵانی 2014 و 2015 و 2016 خەرج بكرایە، بەڵام بەهۆی چەند گرفتێكی سیاسی و ئابووری بۆ ماوەیەكی زۆر دواكەوت.

PUKmedia تەها عەبدوڵڵا