سلێمانی.. به‌نزیكه‌ی سێ ملیار دینار پرۆژه‌یه‌كی كاره‌با جێبه‌جێ ده‌كرێت

له‌چوارچێوه‌ی پرۆژه‌كانی به‌ڕ‌ێوه‌به‌رایه‌تی گشتی كاره‌بای سلێمانی و له‌سه‌ر داهاتی 8%ی كاره‌باو به‌سه‌رپه‌رشتی به‌شی وێستگه‌كانی له‌ به‌ڕ‌ێوه‌به‌رایه‌تی گواستنه‌وه‌ی وزه‌ی كاره‌بای سلێمانی، به‌بڕ‌ی زیاتر له‌دوو ملیارو هه‌شت سه‌د ملیۆن دینار، دوو محاویله‌ی پاوه‌ری 63mva بۆ هه‌ردوو وێستگه‌ی گۆڕ‌ینی كاره‌بای (عه‌بدوڵا سه‌بری) و (قوله‌ره‌یسی) دابین ده‌كرێت.

كاره‌بای سلێمانی رایگه‌یاندوه‌، پرۆژه‌كه‌ بریتیه‌ له‌: دانان و گۆڕ‌ینی محاویله‌ی وێستگه‌ی گۆڕ‌ینی كاره‌بای عه‌بدوڵا سه‌بری كه‌ به‌هۆی كۆنیه‌وه‌ كێشه‌و گرفتی زۆر بووه‌، دووه‌میش بۆ وێستگه‌ی قوله‌ره‌یسی داده‌نرێت له‌شوێنی ئه‌و محاویله‌یه‌ی كه‌ پێشتر گواستراوه‌ته‌وه‌ بۆ وێستگه‌ی باشوور.

 جێی ئاماژیه‌، محاویله‌كان گه‌یشتوونه‌ته‌ هه‌ردوو وێستگه‌كه‌و له‌ئێستادا كاركردن تێیدا به‌رده‌وامه‌و پرۆژه‌كه‌ش له‌لایه‌ن كۆمپانیای (شاندز) جێبه‌جێ ده‌كرێت.

PUKmedia راگه‌یاندنی به‌ڕ‌ێوه‌به‌رایه‌تی گشتی كاره‌بای سلێمانی