ژمارەی فەرمانبەرانی عیراق لەرووسیا و ژاپۆن و توركیا زیاترە

وەزیری دارایی عیراق ڕایگەیاند: جەنگی ڕووسیا و ئۆكرانیا كۆتایی بێت نرخی بەرمیلێك نەوت بۆ خوار 20 دۆلار دادەبەزێت، ئەوكات ناتوانین هیچ شتێك بكەین.

عەلی عەلاوی وەزیری دارایی عیراق ڕایگەیاند: بودجەی عیراق بووە بە بودجەی مووچە، ژمارەی فەرمانبەرانی عێراق زیاترە لە ژمارەی فەرمانبەران لە وڵاتە گەورەكانی وەك ڕوسیا و ژاپۆن و توركیا.

وتیشی: هەموو ماڵێكی عیراقی سێ بۆ چوار كەسی فەرمانبەرە و مووچەی حكومی وەردەگرێت.

ئەوەش لەكاتێكدایە ماوەیەكە نرخەكانی نەوت بەردەوام ڕوو لە دابەزینن و ئەمڕۆش جارێكی دیكە بەهای بەرمیلێك نەوتی خاوی برێنت بۆ 100 دۆلار دابەزی.

سەرچاوەی سەرەكی داهاتی عیراق نەوتە، بۆیە ئەگەر بەهاكەی بەوجۆرە دابەزێت، عیراق توشی كارەساتی ئابووری دەبێت، بەتایبەتی كە كەرتی نانەوتی عیراق لاوازە و داهاتی ئەوتۆ بۆ عیراق دابین ناكات.
PUKmedia