وه‌زیری كشتوكاڵ: كێشه‌ی جوتیارانمان چاره‌سه‌ر كرد

وه‌زیری كشتوكاڵ و سه‌رچاوه‌كانی ئاوی حكومه‌تی هه‌رێمی كوردستان رایده‌گه‌یه‌نێت، كێشه‌ی جوتیارانمان له‌پێناو هه‌نارده‌ی به‌رهه‌می خۆماڵی بۆ شاره‌كانی ناوه‌ڕاست و خواری عیراق چاره‌سه‌ر كرد.

بێگه‌رد تاڵه‌بانی وه‌زیری كشتوكاڵ و سه‌رچاوه‌كانی ئاوی حكومه‌تی هه‌رێمی كوردستان سه‌باره‌ت به‌ چاره‌سه‌ری كێشه‌ی ڕ‌اگرتنی هه‌نارده‌ی خه‌یار و ته‌ماته‌ی كوردستان بۆ ناوه‌ڕاست و خواروی عیراق رایگه‌یاند: دوابه‌دوای په‌یوه‌ندیه‌كانمان له‌ ماوه‌ی هه‌فته‌ی رابردوو تاوه‌كو ئه‌مڕۆ له‌گه‌ڵ وه‌زیری كشتوكاڵی عیراق د.محه‌مه‌د كه‌ریم به‌مه‌به‌ستی چاره‌سه‌ركردن و جه‌ختكردنه‌وه‌ له‌سه‌ر كێشه‌ی داخستنی مه‌رزه‌كانی سنوری عیراق به‌رووی به‌رهه‌می هاورده‌ به‌تایبه‌تی ته‌ماته‌ و خه‌یارو له‌پێناو پاڵپشتیكردنی راسته‌وخۆی جوتیارانمان بۆ ساغكردنه‌وه‌ی به‌رهه‌می خۆماڵی ( ته‌ماته‌ و خه‌یار)، هه‌روه‌ها هه‌نارده‌كردنی بۆ بازاڕ‌ه‌كانی ناوه‌ڕاست و خواروی عیراق، به‌سوپاسه‌وه‌ ئه‌م كێشه‌یه‌ چاره‌سه‌ركرا به‌هه‌ماهه‌نگی و به‌بڕیاری ئه‌نجومه‌نی وه‌زیران و وه‌زاره‌تی كشتوكاڵی عیراق .

وتیشی: زۆر سوپاسی وه‌زیری كشتوكاڵی عیراق ده‌كه‌م كه‌ ئه‌مڕ‌ۆ وه‌ڵامیان دایه‌وه‌و داواكاری و پێشنیاری ئێمه‌یان له‌م باره‌یه‌وه‌ په‌سند كرد .

PUKmedia تایبه‌ت