گفتوگۆی نوێنەران بۆ پێكهێنانی حكومەت دەست پێدەكاتەوە

ئەندامێكی ئەنجومەنی نوێنەران رایدەگەیەنێت، لەدوای پشووەكانی جەژنی قوربان گفتوگۆی لایەنەكان بۆ گەیشتن بەرێككەوتن و پێكهێنانی حكومەت دەستپێدەكاتەوە چونكە، مانەوەی ئەم رەوشە چەقبەستووە لە بەرژەوەندی كەس نییە.

ئیمان ئامێدی ئەندامی ئەنجومەنی نوێنەرانی عیراق بە PUKmedia ی راگەیاند: چاوەڕوان دەكرێت دوای پشووەكانی جەژنی قوربان گفتوگۆی لایەنەكان بۆ پێكهێنانی حكومەتی عیراق دەستپێبكاتەوە، بۆ ئەمەش پێویستە لەسەر بەرنامەیەكی هاوبەش رێكبەكەون، كە لەبەرژەوەندی هاووڵاتیاندا بێت.

وتیشی: دوای كشانەوەی  فراكسیۆنی سەدر لە ئەنجومەنی نوێنەران و كەمبوونەوەی جیاوازی نێوان لایەنەسیاسییەكان، زەمینە لەبارە تاكو هەرچی زووە حكومەتی عیراق پێكبهێنرێت، بەوپێیەی كێشەی دیاریكردنی گەورەترین فراكسیۆن یەكلابووەتەوە و ئەوان دەتوانن كەسێك بۆ سەرۆكایەتی حكومەت دەستنیشان بكەن.

ئەو ئەندامەی ئەنجومەنی نوێنەران ئاماژەی بەوەشكرد: هەر دواكەوتنێك لە پڕۆسەی سیاسی و پێكهێنانی حكومەت، زیان بە عیراق و هەرێمی كوردستانیش دەگەیەنێت، بۆیە دوای تێپەڕبوونی نزیكەی نۆ مانگ بەسەر هەڵبژاردنی 10-10-2021، كاتی ئەوەهاتووە كۆتایی بەو بارودۆخە چەقبەستووە بهێنرێت، كە هەموولایەك لێی بەرپرسیارن.

 PUKmedia تەها عەبدوڵڵا