كەركوك..160 بەكارهێنەری ماددەی هۆشبەر دەستگیردەكرێن

ئەمڕۆ یەك شەممە 3-7-2022،  نووسینگەی كەركوك كۆمسیۆنی باڵای مافی مرۆڤی عیراق بەبۆنەی رۆژی جیهانی روبەروبوونەوەی ماددەی هۆشبەر چالاكییەكی لە كەركوك رێكخست.

عەمید هۆما رەئوف بەڕێوەبەری هۆبەی نەهێشتنی ماددەی هۆشبەر لەكەركوك بە PUKmedia ی راگەیاند: هەوڵەكان بۆ نەهێشتنی ماددەی هۆشبەر لەپارێزگای كەركوك بەردەوامن، هاوكات  بەردەوامیشین لە هەڵمەتی هۆشیاری هاووڵاتییان لە ماددەی هۆشبەر.

ئاماژەی بەوەشكرد: لەمساڵدا نزیكەی 160 كەس لەكەركوك دەستگیركراون، كە 125 كەس لەو دەستگیركراوانە لەلایەن دادگاوە سزا دراون.

لەبارەی جۆری سزاكان وتی: بەكارهێنەرانی ماددەی هۆشبەر ساڵێك زیندانی دەكرێن، لەگەڵ سزای ماددیش، ئەوانەی بازرگانی پێوە دەكەن لەپێنج ساڵ بۆ زیندانی هەتاهەتایی بەند دەكرێن.

بەڕێوەبەری هۆبەی نەهێشتنی ماددەی هۆشبەر ئەوەشی خستەڕوو: رێنمایمان بۆ هاووڵاتیان لەحاڵەتی بەدیكردنی ئەو حاڵەتانە هێزەكانیان لە كەركوك ئاگادار بكەنەوە لەڕێی ژمارەی 178.

PUKmedia محەمەد ئەحمەد