ڕێبەر ئەحمەد: زۆربەی شوێنەكانی چەك فرۆشتن داخران

وەزیری ناوخۆی حكومەتی هەرێمی كوردستان ڕایگەیاند: دەستی هێزە ئەمنییەكان بۆ جێبەجێكردنی یاسا كراوەیە.

ڕێبەر ئەحمەد وەزیری ناوخۆی حكومەتی هەرێمی كوردستان لە كۆنفرانسێكی ڕۆژنامەوانیدا ڕایگەیاند: فەرمانی داخستنی شوێنەكانی چەك فرۆشتن چوەتە بواری جێبەجێكردنەوە و چەندین شوێنی چەك فرۆشتن داخراون و شوێنی چەك هەڵگرتن بۆ پێشمەرگە دروست دەكەین بۆ ئەوەی چەك لەگەڵ خۆیان نەبەنەوە و لەوبارەیەوە لەگەڵ وەزیری پێشمەرگە قسەم كردووە.

ڕێبەر ئەحمەد سەبارەت بە چەك هەڵگرتن وتیشی: لە هیچ كەسی قبوڵ ناكەین چەكی بێ مۆڵەت هەڵبگرێت لە هەر پۆستێكدا بێت.

لەبارەی شوێنەكانی چەك فرۆشتن وەزیری ناوخۆی هەرێمی كوردستان ڕاشیگەیاند: پێویستە هەموو شوێنەكانی چەك فرۆشتن دابخرێن و ئەو كەسانەی كە دەستگیر دەكرێن دەبێت لە زووترین كاتدا كەیسەكانیان یەكلا بكرێتەوە بۆ ئەوەی كێشەی گەورەتری لێنەكەوێتەوە و هاوكاتیش هەر كەس دەستكاری تابلۆكانی ئۆتۆمبێل بكات دەستگیر دەكرێت.

ڕێبەر ئەحمەد وتیشی: ئەو كەسانەی كە چەك هەڵدەگرن دەبێت لای حكومەت بایۆمەتریان هەبێت و ئەو كەسانەی كە مۆڵەتی چەك هەڵگرتن وەردەگرن دەبێت پشكنینی دەروونیان بۆ بكرێت.  
PUKmedia  تایبەت