كۆچبەرێكی كورد كوژرا

بەهۆی شەڕی نێوان ژمارەیەك كۆچبەری كوردو عەرەب لەرێگەی یۆنان  بۆ وڵاتانی تری ئەوروپا دوو كۆچبەر دەكوژرێن، كەیەكێكیان كوردە.

ئاری جەلال سەرۆكی دەزگای لـوتكـە بۆ كاروباری كۆچبەران رایگەیاندوە:" دوای بەڕێكەوتنی پۆلێك كۆچبەری بە نەتەوە كورد و عەرەب لە ڕێگای نێوان یۆنان بۆ وڵاتانی ئەورپا لە ڕۆژی شەممە ناكۆكی و شەڕ لە نێوان چەند گەنجێكی كۆچبەر ڕوودەدات كە لەنەتەوەی كورد  و عەرەبن لە نزیك كۆزۆفۆ لە ئەنجامدا دوو كەس دەكوژرێن و چەند كەسێكی دیكەش بە فیشەك بریندار  دەبن كە یەكێك لە كوژراوەكان كوردە. 
وتیشی : " جێگر شێركۆ حەسن ی تەمەن 31 ساڵ  هاوڵاتیەكی خەڵكی شاری هەولێرە ماوەی سێ ساڵە بە ئامانجی گەیشتن بە ووڵاتانی ئەوروپا ، كوردستان جێ دەهێڵێت لە ئەنجامی ئەم شەڕەدا دەكوژرێت ".
رونیكردەوە:" بە وتەی خێزانەكەی كۆتا جار كە قسەیان لەگەڵ كوڕەكەیان كردوە ڕۆژێك پێش گیان لەدەستدانی بووە ،  خێزانەكەی داوایان لە دەزگای لوتكە كردووە كە تەرمی ڕۆڵەكەیان بگەڕێننەوە بۆ هەرێمی كوردستان .
PUKmedia راگەیەنراو