لەسەر ئەركی خاتوو شاناز رەهەندەكانی عوسمان عەلی بڵاوكرایەوە

ئەمڕۆ 21ی حوزەیران لە 17هەمین ساڵڕۆژی كۆچی دوایی هونەرمەندی گەورەی كورد عوسمان عەلی كۆنسێرتێك و كۆڕێك بۆ ناساندن و بڵاوكردنەوەی كتێبی رەهەندەكانی عوسمان عەلی، لەسەر ئەركی خاتوو شاناز ئیبراهیم ئەحمەد لەلایەن تیپی مۆسیقای سلێمانی لە شاری سلێمانی رێكخرا.

لەو مەراسیمەدا، خاتوو شاناز ئیبراهیم ئەحمەد، لەبەرامبەر تەمەنی پڕ گەوهەری تیپی مۆسیقای سلێمانی و خزمەتی پرشنگداری عوسمان عەلی بە گۆرانی و مۆسیقا و ئاوازی كوردی چەپكە گوڵی رێز و وەفای پێشكەشكردن و دواتریش وێنەیەك لە كتێبی رەهەندەكانی عوسمان عەلی پێشكەشی ژمارەیەك هونەرمەند و كەسایەتی كرد.

كتێبی توێژینەوەی زانستیی رەهەندەكانی عوسمان عەلی لەلایەن ئەكادیمیی و مامۆستا وهونەرمەند عادل محەمەد كەریم-ەوە نووسراوە و ئامادەكراوە، لەو رێوەڕەسمەدا عادل محەمەد لەوتەیەكیدا پوختەیەكی لەبارەی ناوەڕۆكی كتێبەكە پێشكەشی ئامادەبووان كرد و سوپاسی خاتوو شانازی كرد لەبەرامبەر پشتیوانییە بەردەوامەكانی بۆ تیپی مۆسیقای سلێمانی و هونەرمەندان.

عوسمان عەلی هونەرمەندێكی دیاری رەوتی گۆرانی و مۆسیقایە لەتەواوی كوردستان، ئەم هونەرمەندە لەماوەی 40 ساڵ تەمەنی هونەریدا، خزمەتێكی زۆر و پرشنگداری بە گۆرانی و مۆسیقا و ئاوازی كوردی كردووە.

PUKmedia تایبەت