دەرباز كۆسرەت: پێویستە گفتوگۆكان بچنە قۆناغێكی ترەوە

دوانیوەڕۆی ئەمڕۆ 21-6-2022 لەبارەگای مەكتەبی سیاسی لە شاری هەولێر، دەرباز كۆسرەت رەسول كارگێڕی مەكتەبی سیاسی یەكێتیی نیشتمانیی كوردستان پێشوازی كرد لە مارتین یێگەر باڵیۆزی ئەڵمانیا لە عێراق و وەفدی هاوڕێی.
لە دیدارەكەدا كە دكتۆر رێبوار ئیسماعیل ئەندامی سەركردایەتی ئامادەی بوو، گفتوگۆكرا لەبارەی دۆخی كوردستان و عیراق و ناوچەكە، هەنگاوەكانی پێكهێنانی حكومەتی عیراقی و بەشداری كورد لەو پرۆسەیە كرا، دەرباز كۆسرەت رەسول دیدگای یەكێتیی خستەڕوو و دووپاتی كردەوە كە پێویستە هەنگاوەكان خێراتر بكرێن و گفتوگۆكان بچنە قۆناغێكی تازەترەوە.
بەشێكی تری دیدارەكە گفتوگۆكردن بوو لەبارەی پەیوەندییەكانی نێوان هەرێمی كوردستان و حكومەت و گەلی ئەڵمانیا، هەردوولا جەختیان لە پەرەپێدانی زیاتری پەیوەندییەكان كردەوەو دەرباز كۆسرەت رەسول سوپاسی حكومەتی ئەڵمانیای كرد كە بەردەوام هاوكاری گەلی كوردستان بوونە.

PUKmedia