داوای كاراكردنەوەی رێككەوتننامەی ئاڵوگۆڕی زیندانیان دەكرێت

سالار عەبدولستار وەزیری دادی فیدڕاڵ داوایكرد بەردەوامی بەهاوكارییەكان لەگەڵ ئێران بدرێت سەبارەت بەجێبەجێكردنی رێككەوتننامەی ئاڵوگۆڕ لەبواری زانیاری و ئاڵوگۆڕی زیندانییە حوكمدراوەكان.
وەزارەتی دادی فیدڕاڵ لەڕاگەیەنراوێكدا باسیشی لەوەكردووە وەزیری داد ئەمڕۆ لەبەغدای پایتەخت پێشوازیكرد لەمحەمەد ئال سادق باڵیۆزی ئێران، لەمیانی پێشوازییەكەدا جەخت لەسەر گرنگی جێبەجێكردنی رێككەوتننامەی ئاڵوگۆڕی زیندانیانی حوكمدراوو هاوكارییە یاسایی و دادوەرییەكان كراوەتەوە كەلەمیانیدا هەردوو وڵاتدا ئاڵوگۆڕییان بەو زیندانییە عیراقی و ئێرانییانە دەكرد كە حوكمدەدران.
وەزیری داد راشیگەیاندووە سەردانەكەی كەبەمدواییانە بۆ ئێران كردی لەچوارچێوەی بەستنی رێككەوتننامەی زیاتر بوو كەبەرژەوەندی هەردوو وڵاتی تێدا بێت. 
لای خۆیەوە محەمەد كازم ئال سادق باڵیۆزی ئێران لەعیراق جەختی لەئامادەیی وڵاتەكەی كردەوە بۆ پتەوكردنی هەماهەنگی هاوبەش لەسەرجەم بوارەكانی پەیوەست بەكارەكەی و بەتایبەتیش ئەو رێككەوتننامانەی لەبواری ئاڵوگۆڕی زیندانیاندا ئەنجامدراون، هەروەها رێككەوتننامەكانی دیكەی تایبەت بە رێكخستنی پەیوەندییە یاساییەكان و پێڕاگەیاندن و مەشقە دادییەكانی نێوان هەردوو لایەن.
PUKmedia ئاژانسەكان