یاساناسێك: پەرلەمانتارانی سەدر ناتوانن پاشەكشەی دەستلەكاركێشانەوە بكەن

پسپۆڕێكی بواری یاسا باسی لەوەكرد لەدوای دەركردنی فەرمانی رەزامەندی لەسەر دەستلەكاركێشانەوەی پەرلەمانتارانی رەوتی سەدر لەلایەن سەرۆكایەتی ئەنجومەنی نوێنەرانەوە، دەستلەكاركێشانەوەكانیان چوارچێوەی رەسمی وەرگرتوەو ناتوانن لێی پاشگەزببنەوە.

جەمال ئەسەدی پسپۆڕی بواری یاسا ئەمڕۆ یەكشەممە تایبەت بە PUKmedia ی راگەیاند: لەدوای دەرچوونی فەرمانی پەرلەمانی بەپەسەندكردنی دەستلەكاركێشانەوەی پەرلەمانتارانی رەوتی سەدر لەئەنجومەنی نوێنەران، لەڕووی یاساییەوە دەستلەكاركێشانەوەكانیان چوارچێوەی رەسمی وەرگرتوەو  ناتوانن لێی پاشگەزببنەوە.

راشیگەیاند: ئەو پەرلەمانتارانەی ئەنجومەنی نوێنەرانیش كەبوونەتە جێگرەوە لەچاوەڕوانی ئەوەدان لەدانیشتنێكی ئاسایی یاخود بەپەلەی پەرلەماندا سوێندی یاسایی بخۆن و وە رەنگیشە پێش جەژنی قوربان دانیشتنەكە ساز بكرێت.

جێی ئاماژەیە سەرجەم پەرلەمانتارانی سەدر كەژمارەیان 73 پەرلەمانتارە رۆژی یەكشەممەی هەفتەی رابردوو 12ی حوزەیرانی 2022 لەسەر داوای موقتەدا سەدر رابەری رەوتی سەدر، نووسراوی دەستلەكاركێشانەوەیان پێشكەشی موحەمەد حەلبوسی سەرۆكی پەرلەمانی عیراق كرد.

PUKmedia تایبەت