بۆردی پەیوەندییەكانی دەرەوەی یەكێتی سەردانی مەزاری عەبدولڕەزاق فەیلی دەكات

لە چوارەمین ساڵیادی كۆچی دوایی عەبدولڕەزاق فەیلیدا، بۆردی پەیوەندییەكانی دەرەوەی یەكێتیی نیشتمانیی كوردستان، سەردانی مەزاری خوالێخۆشبوویان كرد و تاجە گوڵینەی رێز و وەفایان لەسەر گڵكۆكەی دانا.

لە چوارەمین ساڵیادی هەڵكشانی هەسارەیەك لە حەوتەوانەكەی یەكێتی و سۆفی تەریقەتی كوردایەتی و پێكەوە ژیان و لێبوردەیی رەوانشاد عەبدولڕەزاق فەیلی ـ دا، ئەمڕۆ رێكەوتی 13-6-2022، سەركەوت محەمەد غفور ئەندامی سەركردایەتی و لێپرسراوی بۆردی پەیوەندییەكانی دەرەوەی یەكێتیی نیشتمانیی كوردستان بەیاوەری هەڤاڵانی بۆردی پەیوەندییەكانی دەرەوە، سەردانی مەزاری خوالێخۆشبوو عەبدولڕەزاق فەیلی ئەندامی دەستەی دامەزرێنەری (ی.ن.ك) یان كرد و تاجە گوڵینەی رێز و وەفایان لەسەر گڵكۆی پیرۆزی دانا بەڵێنیان دووپات كردەوە كە درێژە پێدەری رێبازە پیرۆزەكەیان بن .

عەبدولڕەزاق فەیلی تێكۆشەرێكی ماندووی ڕێگای خەبات و كوردایەتی و ھاوڕێ و  ھاوخەباتی چەند ساڵەی مام و رابەرمان سەرۆك مام جەلال بوو، لە تەمەنی پڕ بەخشش و خەباتی سیاسی خۆیدا، هەمیشە لەگەڵ ئاشتی و ئارامی و پێكەوەژیان بووە و هەتا دواین ساتەكانی ژیانی داكۆكی كارێكی سەرسەختی یەكڕیزی گەلی كورد بوو، هەموو هەوڵ و ماندووبوونێكی لەپێناو پاراستنی یەكێتی ناو یەكێتی بوو .

سەری ڕێزو نەوازش دادەنەوێنین لە ئاست  گڵكۆی پیرۆزی خوالێخۆشبوو سەرۆك مام جەلال و عەبدولڕەزاق فەیلی و سەرجەم شەهیدانی رێگای رزگاری كوردستان،

PUKmedia بۆردی پەیوەندییەكانی دەرەوەی یەكێتیی نیشتمانیی كوردستان