جگە لەهۆڵی دیدارەكە، تۆڕە كۆمەڵایەتییەكانیش رای سەنگینیان تێدایە

دیداری یەكێتی فۆكەسی سەرەكی شەقامی سیاسی، دیپلۆماسی، میدیایی ناوخۆ و دەرەوەی بۆ خۆی كێشكردووە. بابەتی گەرمی هەمووان یەكێتی و یەكێتییەكانە. لەناوەندە رەسمییە سیاسییەكانیشەوە چاوەكان لەسەر جووڵەی یەكێتی لاناچن. بایەخی ئەم دیدارە و بە هەندوەرگرتنی را و سەرنج و رەخنەكان بۆ یەكێتی گرنگە، بۆیە تەنیا لە بازنەی را و سەرنجی یەكێتییەكان خۆی قەتیس ناكات و دەپەڕێتەوە بۆ وەرگرتنی را و سەرنج و رەخنەی هەمووان. لەم چەند رۆژەدا بابەتی گەرمی سۆشیال میدیاش دیدارەكەی یەكێتییە. ئەم سەكۆیانە، وەك هۆڵی گفتوگۆكان جمەیان دێت و را و سەرنجە جیاواز و ئومێد بەخشەكانی لەخۆ گرتووە. هەمووان لەسەر ئەوە كۆكن كە ئەم دیدارە پێدانی رۆڵی زیاترە بە كادرەكانی حزب بۆ داڕشتنی سیاسەتی یەكێتییەكان. ئەوەش سەلماندنەوەی ئەو راستییەیە كە یەكێتی حزبی راوبۆچوونی جیاواز و رەخنە و پێشنیازەكانە.

لەسەكۆی فەیسبووك كاروان گەزنەیی نووسیوێتی: دیدارێك بە رەخنە لەخۆگرتن و بەخۆداچوونەوە بۆ چاككردن و چارەسەركردنی كێشە گشتییەكان بە ئامانجی رەنگڕێژكردن و داڕشتنی سیاسەتێكی هەمەلایەن بۆ شێوازێكی نوێی كاركردن بۆ یەكێتی.

(دیداری یەكێتی دیداری هەموو یەكێتییەكانە) ئەمە بۆچوونی شلێر غەفوور ژاژڵەییە كە لە واڵی خۆی لە فەیسبووك بڵاویكردۆتەوە. مەریوان نەسرەدین-ش نوسیووێتی: یەكێتییەكان دڵسۆزانە دید و پێشنیازەكانی خۆیان بۆ پێشخستنی حزبەكەیان پێشكەش دەكەن. ئەم رۆژانە بۆ یەكێتی و ئایندەی كاركردنی چارەنووسسازە. لەلایەك هەزاران رەخنە و پێشنیاز شەن و كەو دەكرێن و لەلایەكیترەوە پێگەكانی حزبێكەیان بەهێزتر دەكەنەوە و هەموو كادر و هەوادار و لایەنگرانیان بۆ خەباتی داهاتوویان جۆش دەدەنەوە.

بڵند ساڵح لە پێگەی خۆی دەڵێت: ی.ن.ك حزبێكی زیندووە و بەردەوام گۆڕانكاری دەكات و خۆی نوێ دەكاتەوە، چاكسازی دەكات و حزبێكی راچڵەكێنەرە بۆ دۆست و دوژمن. هەروەها كۆژین هەمید نوسیووێتی: دەبێت گشت بەرپرسانی ی.ن.ك. وەفا و رێزی گشت یەكێتییەكان بگرن تا ئەم جەماوەرە وەفادارە لەدەست نەدەن. بژی ی.ن.ك گەشبینم بەهەنگاوە نوێكان.

سەرەڕای رای رەخنەگرانە بۆ یەكێتی و دیدارەكە كەحاڵەتێكی ئاساییە، بەڵام دەرخستنی ئەو راستیەشە كە یەكێتی هێشتا توانای شاراوەی زۆری هەیە بۆ داهێنان و نوێكردنەوە و گۆڕانكاری بەرچاو بۆ كۆمەڵگە.

PUKmedia تایبەت