نرخی به‌نزین زیاتر به‌رزده‌بێته‌وه‌

نرخی به‌نزین زیاتر به‌رزده‌بێته‌وه‌و وته‌بێژی به‌نزینخانه‌كانی سلێمانیش هۆكاره‌كه‌ی ده‌خاته‌ڕوو.

 به‌همه‌ن شێخ قادر وته‌بێژی به‌نزینخانه‌كانی سلێمانی رایگه‌یاند، به‌هۆی گرانبونی نرخی به‌نزین له‌ ئێران و توركیا و كه‌می به‌رهه‌مهێنانی ناوخۆوه‌، نرخی به‌نزین جارێكی تر به‌رزبۆته‌وه‌.

وتیشی: ئه‌و بڕه‌ به‌نزینه‌ی پێشتر له‌به‌غداوه‌ ده‌هات، له‌ جه‌ژنی ره‌مه‌زانه‌وه‌ راگیراوه‌و حكومه‌تی هه‌رێمیش پاڵپشتی له‌ نرخی به‌نزین ناكات ، بۆیه‌ خستنه‌ڕوی به‌نزین له‌ سلێمانی كه‌مبۆته‌وه‌و نرخه‌كه‌ی گران بووه‌.

ئاشكراشیكرد: هۆكارێكی تری گرانبوونی نرخی به‌نزین، گرانبوونی نرخه‌كه‌یه‌تی له‌ توركیا و ئێران، كه‌ پێشتر بازرگانانی هه‌رێم له‌و دوو وڵاته‌وه‌ به‌نزینیان هاورده‌ ده‌كرد، بۆیه‌ تا بڕی به‌رهه‌می ناوخۆ زیاد نه‌كرێت، نرخی به‌نزینیش جێگیر نابێت و به‌رده‌وام له‌به‌رزی و نزمیدا ده‌مێنێته‌وه‌.

هه‌ر به‌پێی نرخی فرۆشتنی سوته‌مه‌نی له‌ به‌نزیخانه‌كانی سلێمانی، ئه‌مڕۆ نرخی لیترێك به‌نزین 50 دیناری تری چووه‌ته‌سه‌رو به‌نزینی نۆڕماڵ به‌ هه‌زار دینار و موحه‌سه‌ن به‌ هه‌زارو 125 دینار و سۆپه‌ریش به‌ هه‌زارو 200 دینار ده‌فرۆشرێت.

PUKmedia كه‌ناڵی گه‌لی كوردستان