نەتەوە یەکگرتوەکان ئیدانەی هێرشەکەی سەر فرۆکەخانەی بەغدا دەکات

نێردەی نەتەوە یەکگرتووەکان بۆ هاریکاری عیراق (یونامی) زۆر نیگەرانە سەبارەت بەو زنجیرە هێرشانەی کە نووسینگەکانی پارتە سیاسییەکان و هاوڵاتییانی مەدەنی و شوێنە بازرگانییەکان لە عیراق دەکەنە ئامانج، و بەم دواییەش هێرشی موشەکی کرایە سەر فرۆکەخانەی نیودەوڵتی بەغدا.  

نێردەی نەتەوە یەکگرتووەکان بۆ هاریکاری عیراق لە راگەیەندراوێکدا کە کۆپییەکی بۆ PUKmedia نێردراوە، رایدەگەیەنێت: ئەم هێرشە قێزەوەنانە بوونەتە هۆی برینداربوونی هاوڵاتییان و زیانی ماددی و هاوڵاتییانی ئاشتیخواز دەکەنە ئامانج کە تاکە خواستیان ئەوەیە ژیانی ڕۆژانەیان بەبێ ترسی هێرش و مردن بگوزەرێنن.

ئاماژە بەوەشدەدات، ئەگەرچی هەموو لایەنە سیاسییەکان بەتوندی ئیدانەی ئەم جۆرە کارانەیان کردووە، بەڵام ئەنجامدەران و گروپە تێکدەرەکان کە دەستیان لەم هێرشانەدا هەیە پێدەچێ بە ئازادانە هاتوچۆبکەن و بێباکانە هەڵسوکەوت دەکەن و وڵاتەکە ڕووبەڕووی دەرەنجامی کارەساتبار دەکەنەوە.

 ئەوەشخراوەتەروو، زۆر گرنگە کە هەموو لایەنەکان هەنگاوی جیددی بنێن نەك تەنها بە ئیدانەکردن بەڵکو بە چاڵاکی کاربکەن بۆ ئاشکراکردنی ئەو کەسانەی کە لەپشت ئەم کارانەوەن. لەهەمان کاتدا، پێویستە دیالۆگ چڕتربکرێتەوە بۆ دۆزینەوەی چارەسەری تۆکمە بۆ هەموو ناکۆکییە سیاسییەکان.

 دووبارە، داوا لە هەموو لایەنەکان دەکەین کە دانبەخۆدابگرن و خۆبەدووربگرن لە چوونەناو تەڵەی دروستکردنی ئاژاوە لە میانەی ئەو قۆناغە ڕاگوزەرییە هەستار و ناسکەدا.

PUKmedia یونامی