​سەرکردەیەکی فەتح: پۆستی سەرۆك كۆمار پشكی یەكێتییە

سەركردەیەك لەهاوپەیمانی فەتح ئەمڕۆ پێنجشەممە 27ی 1ی 2022 جەختیكردەوە كە پۆستی سەرۆك كۆمار مافی یەكێتیی نیشتمانیی كوردستانە، ئاماژەی بەوەشدا پێدەچێت جۆرێك لە پاشەكشە لەنێو ماڵی شیعەدا دەستیپێكردبێت.

عەلی توركی جەمالی سەركردە لەهاوپەیمانی فەتح لەمیانی لێدوانێكدا بۆ PUKmedia راشیگەیاند: كاروبارەكان لەنێو ماڵی شیعە گەیشتۆتە خاڵی مەترسیدارو پێویستە ئەوە لەبەرچاوبگیرێت، روونیشی كردەوە كەموقتەدا سەدرو عامری ئاستی مەترسیەكانی هەڵخلیسكانەكە دەزانن، هەر بۆیە دەستیكردووە بەپاشەكشەو رازیبوون لەسەر بەشێك لەلایەنەكانی ناو چوارچێوەی هەماهەنگی و پاشان سەرجەم لایەنەكانی ناو چوارچێوە بگرێتەوە بەئاراستەی سازان لەنێو سەرجەم پێكهاتەكاندا.

راشیگەیاند: ناكۆكییەكان كەتا ئێستا یەكلایی نەبوونەتەوە تەنها هەر نێو ماڵی شیعەی نەگرتۆتە، بەڵكو پێكهاتەكانی سوننەو كوردیشی گرتۆتەوەو كێشەیان هەیەو گرنگە چارەسەریان بكەن، جەختیشی كردەوە كە پۆستی سەرۆك كۆمار مافی كوردەو بەدیاریكراویش شایستەی یەكێتیی نیشتمانیی كوردستانە، بۆیە دەبێت پارتی دیموكراتی كوردستان بەڕێزەوە مامەڵە لەگەڵ تایبەتمەندییەكانی ناو ئەم پێكهاتەیە بكات.

جەمالی جەختیشی كردەوە كە چوارچێوەی هەماهەنگی لەگەڵ د.بەرهەم ساڵحدایە بۆ پۆستی سەرۆكایەتی كۆمارو وەك رێزگرتنێكی چوارچێوەكەیە لەخەسڵتەكانی گەلی كورد، هۆشیداریشیدا نەڕۆیشتن لەگەڵ د.بەرهەم ساڵح كێشەی ناوخۆیی گەورەی لێدەکەوێتەوە.

PUKmedia تایبەت