هەنگەوانێك بۆ زیادكردنی بەرهەمەكانی رێگایەكی نوێ بەكاردەهێنێت

هەنگەوانێك بۆ زیادكردنی بەرهەمەكانی رێگایەكی نوێ بۆ بەرهەمهێنانی هەنگوین بەكاردەهێنێت و دەشڵێت، بەرهەمێكی جیاوازم هەیە.

لەوبارەیەوە ساڵح محەمەد كە هەنگەوانێكی گەرمیانییە بە PUKmedia ی راگەیاند: لەرێگای چاندنی جۆرە گوڵێكی تایبەتەوە خۆراكی هەنگەكانم دابیندەكەم، تاوەكو بەوهۆیەوە بەرهەمی هەنگوینەكەیان زیاتربێت.

 وتیشی: لەسەر روبەری چوار دۆنم زەوی چەندین جۆر گوڵی تایبەتیم بۆ خۆراكی هەنگەكانم روواندووە، لەوانە (ساڤینا، لاڤندەر، رەیحانە) دەشڵێت، بەرهەمێكی جیاوازم هەیە و ئەگەر وەزارەتی كشتوكاڵ و حكومەت هاوكاریم بكەن دەتوانم پڕۆژەكەم فراوانتر بكەم.

جێی ئاماژەیە بەشێكی زۆر لە هەنگەوانەكانی سنووری گەرمیان خۆراكی هەنگەكانیان لە درەختی نەبەكە بە دەستدەهێنن، كە یەكێكە لە درەختە بە ناوبانگەكانی ناوچەكە و مێژووی ئاشنابوونی خەڵكی بەو درەختە بۆ 200 ساڵ پێش ئێستا دەگەڕێتەوە.

PUKmedia زمناكۆ یەحیایی