18 ساڵ بەسەر دەستگیركردنی سەدام دا تێدەپەڕێت

لە13-12-2003 دا لەدوای‌ خۆ حەشاردان بۆ ماوەی‌ نزیكەی‌ هەشت مانگ، (سەدام حسێن) سەرۆكی‌ رژێمی‌ پێشووی‌ عیراق لەلایەن هێزێكی‌ تایبەتی‌ ئەمریكاوە لەگوندێكی‌ ناوچەی‌ تكریت دەستگیركرا.

شەوی شەممە، 13ی دیسەمبەری ساڵی 2003، ژمارەیەك لە سەربازانی لیوای یەكەمی فیرقەی پیادەی چواری هێزە تایبەتەكانی ئەمریكا، لە پرۆسەیەكدا بە ناوی بەرەبەیانی سوور، سەدام حسێن -ی دیكتاتۆری روخاوی بەعسیان دەستگیر كرد. ئەمڕۆ 18 ساڵ بەسەر ئەو روداوەدا تێدەپەڕێت كە بووە جێگای ئومێد بۆ تەواوی عیراقيیەكان .

سەدام حسێن پێنجەم سەركۆماری عێراق بوو لەدوای روخاندنی دەسەڵاتی پاشایەتی لە عێراق، لە ساڵی 1979 دا دەسەڵاتی گرتە دەست‌و تا ساڵی 2003 مایەوە‌و قۆناغی دەسەڵاتەكەشی بە خوێناویترین قۆناغی عێراق دادەنرێت.


ژیانی سەددام
سەدام بە یەكێك لە دیكاتاتۆرە مەترسیدارەكانی سەدەی بیستەم دادەنرێت كە لە یەك كاتدا تەواوی پۆست‌و دەسەڵاتەكانی عێراقی لەدەستدابوو.

ناوی تەواوی سەدام، سەدام حسێن عەبدول مەجید ئەلتكریتی بوو، لە 28 ی نیسانی ساڵی 1937 لە گوندی عۆجەی سەر بە تكریت لەخێزانێكی شوان‌و ئاژەڵدار لەدایكبووە، باوكی سەدام شەش مانگ پێش لەدایكبونی سەدام كۆچی دوایی كردوە، پاش ماوەیەكیش برا گەورەكەی سەدام لە تەمەنی 18 ساڵیدا بە نەخۆشی شێرپەنجە كۆچی دوایی دەكات.

دایكی سەدام كە ناوی سوبحە توڵفاح بوو ناوی سەدام بۆ كوڕەكەی دیاری دەكات واتە ئەو كەسەی توانای بەرەنگاربوونەوەی هەیە، پاش ماوەیەك دایكی سەدام شوو بە كەسێك بە ناوی ئیبراهیم ئەلحەسەن دەكات‌و بەو هۆیەشەوە سەدام رەوانەی ماڵی خەیروڵا توڵفاح ی خاڵی دەكرێت تا لەوێ بژی، لە تەمەنی سێ ساڵیدا خەیروڵا توڵفاحی خاڵی بە تۆمەتی بەشداری كردن لە كودەتایەكی شكستخواردودا دەخرێتە زیندانەوە، بۆیە سەدام رەوانەی ماڵی ئیبراهیمی زڕباوكی دەكرێتەوە‌و لەو زڕباوكەی سێ برای هەیە بە ناوی بەرزان، وەتبان‌و سەبعاوی كە لەدوای سەركەوتنی سەدام بۆ دەسەڵات، پۆستی گرنگی بەخشی بەو زڕبرایانەی.

سەدام لە باسی ژیانی خۆی لە ماڵی دایكیدا ئاماژە بەوە دەكات كە هەمویان لە یەك ژوردا ژیاون‌و نە ئاو‌و نە كارەبایان نەبوە‌و دەڵێت: هەرگیز هەستم بە مناڵی خۆم نەكردوە‌و ئەوە وای كردوە كە هەمیشە تەنیا بم‌و هاوڕێیەتی كەس نەكەم بەڵام فێریان كردم چۆن بەرگە بگرم‌و دان بە خۆما بگرم.

پەیوەندی بە حزبی بەعس
ساڵی 1947 خەیروڵا توڵفاح لە زیندان ئازاد دەكرێت‌و بەهۆی ئەوەی زڕباوكەكەی زۆر خراپ دەبێت، بۆیە سەدام دەگەڕێتەوە بۆ ماڵێ‌ خاڵی لە تكریت‌و هەر لەوێ خوێندنی سەرەتایی تەواو دەكات، پاشان لەگەڵ ماڵێ‌ خاڵی دەچێـتە بەغدا‌و لە ناوەندی كەرخ دەست بە خوێندن دەكات، هەر لەوێش تێكەڵی بزوتنەوەی ناسیۆنالیستی عەرەبی دەبێت‌و ساڵی 1957 دەچێتە ریزەكانی حزبی بەعسەوە.

هەر لە بەغدا بەهۆی خاڵیەوە سەدام تێكەڵی ئەفسەرانی سوپا دەبێت‌و شارەزایی لە سوپا‌و سەربازی پەیدا دەكات، بۆیە سەدام هەمیشە چاكەی خاڵی لەبەر چاو گرتوە‌و لەكاتێك كە دەبێت بەجێگری سەركۆمار، خەیروڵا دەكات بەپارێزگاری بەغدا.

لە 7 ی تشرینی یەكەمی ساڵی 1959 بەشداری پیلانی تیرۆر كردنی عەبدول كەریم قاسم دەكات، بەڵام پیلانەكە شكست دەهێنێت و سەدامیش بە سوكی بریندار دەبێت‌و بەرەو سوریا هەڵدێت، پاش سێ مانگ رودەكاتە میسر‌و لە قاهیرە خۆی ئامادەیی تەواو دەكات‌و دەچێتە كۆلێژی یاسا.

ساڵی 1963 ساجیدەی كچی خاڵی مارە دەكات‌و هەر لەو ساڵەدا بەعسیەكان كودەتا بەسەر دەسەڵاتی عەبدول كەریم قاسمدا دەكەن‌و دەسەڵات دەگرنە دەست ‌و ئەحمەد حەسەن بەكر كە فەرماندەیەكی سوپا‌و عەرەبێكی خەڵكی تكریت بوو دەكرێتـە سەرۆك وەزیر‌و عەبدول سەلام عارف دەبێتە یەكەم سەركۆمار.

لە پاش 10 مانگ كودەتا بەسەر بەعسیەكاندا دەكرێت‌و لە دەسەڵات دور دەخرێنەوە.

لە 17 ی تەمموزی ساڵی 1968 دا جارێكی تر بەعسیەكان بە كودەتا عەبدول رەحمان عارف لەسەر كار لادەبەن‌و سەدامیش یەكێك دەبێـت لە بەشداربوانی ئەو كودەتایە، ئەحمەد حەسەن بەكر دەبێتـە سەركۆمار‌و سەدامیش دەبێـتە بەرپرسی ئاسایشی نەتەوەیی‌و ساڵی 1969 دەكرێتە جێگری سەركۆمار .

ساڵی 1975 بە مەبەستی لاواز كردنی شۆڕشی كورد، سەدام پەیماننامەی جەزائیری لەگەڵ شای ئێران ئیمزا كرد. ساڵی 1979 ئەحمەد حەسەن بەكری ناچاری كرد دەست لەكار بكێشێتەوە‌و خۆی دەبێـتە چوارەم سەركۆماری عێراق.

دەسەڵاتی سەدام
دەكرێت بوترێت سەدام حسێن لە دید و روانین و بیركردنەوەی زۆر كەسدا لە ناوەوە و دەرەوەی عێراق لەجێی ئەوەی نموونەیەك بێت بۆ حوكمڕانیی باش وسەرۆكی وڵاتێكی دیموكرات و سیستمێكی مرۆڤ دۆست، ناوێكە هاوتایە لەگەڵ چەندین دەستەواژە وچەمكی ترسناك و تۆقێنەری وەك ستەمكاریی، كتاتۆرییەت،چەوساندنەوە،جینۆساید،ئاگر و ئاسن، ترس و بیم و چەندینی تر.

لەسەر ئاستی ناوخۆ.. نەژادپەرستێكی فاشیی

بەپێی ژیاننامەی زانراوی، سەددام حسێن، لەگەڵ دەست وپێوەند و شوێنكەوتووەكانی لەوانە سەركردە وفەرماندە باڵاكانی حزبی بەعسی عەرەبیی ئیشتراكیی،بەهۆی بیروباوەڕی تاكڕەویی وخۆسەپێنیی ودەمارگیریی ئایدۆلۆژیی (سۆشیالیزم) ونەژادیی (عەرەبچێتیی) ورژێمی (حزبی قائید)ەوە،ئەم وڵاتە پڕ لە پیت وسامان وتوانای گەورەی مرۆیی و زانستیی و سەربازییان بەئاقارێكی هێندە ترسناكدا برد كە لە رووی مرۆیی و ئابوورییەوە زیانی گەورە و كوشندەی بەدواوەبوو بۆ دانیشتوان وسەرخان وژێرخانی ئابووریی و هەموو سێكتەرەكانی ژیان جگە لە هەردوو وەزارەتی نەوت و بەرگریی كە یەكەمیان شادەماری زیندەگیی سەدام و رژێمەكەی و گەلە بن دەست و چەوسێنراوەكەی بوو، دووەمیش باسكی بەهێز و مەچەكی پۆڵایین و دڵڕەق و بكوژ و ببڕی ئەو رژێمە بوو بۆ لەناوبردنی ئازادیی و ئازادییخوازان لە هەموو گەل و نەتەوە ومەزهەبەكان وبەتایبەتیش بۆ قڕكردنی گەلی كورد لەسەر بنەمای سێ كوچكەی ستەمكاریی ونەژادپەرستیی(تەبعیس-تەعریب-تەرحیل) كەلەساڵی1975ەوەزیاتر چڕبوونەوەی بەخۆوەبینیی ولەساڵی 1988 دا گەیشتە ئەوپەڕی دڕندەیی وتاوانكاریی بەهۆی تاوانەكانی جەنگەوە لەبەكارهێنانی چەكی كیمیایی و جینۆساید و زیندەبەچاڵكردنی هەزاران خێزانی كورد وهەزاران پێشمەرگە كەلەشاڵاوە بەدناوەكانی ئەنفالدا كەوتنە بەردەستی ئەو رژێمەخوێنڕێژە ودەیان هەزاریان لەبیابانەكانی خواروی عێراق قەتڵ وعام یا زیندەبەچاڵكران.

لەسەر ئاستی دەرەكیی.. قارەمانێكی دۆڕاو

سەددام لەدوای گیركردنی چنگی لەسەرۆكایەتیی كۆماری عێراق لە ساڵی 1979 و بەرپابوونی شۆڕشی خەڵك دژی كۆماری شاهەنشایی ئێرانی دراوسێ لە هەمان ساڵدا كە شیعە مەزهەبە توندڕەوەكان بەرهەمەكەیان چنیەوە (هەر لەبەر ئەوەش ناونرا شۆڕشی ئیسلامیی و وڵاتەكەش كرابە كۆمارێكی ئیسلامیی)،لە ترسی پەڕینەوەی ئەو شۆڕشە بۆ عێراق وراپەڕینی زۆرینەی شیعەمەزهەبی هەواداری ئێرانە تازەكە،رێككەوتنی 1975ی نێوان هەردوو وڵاتی وەلاناو لە مانگی ئەیلولی ساڵی 1980 دا جەنگێكی ناڕەواو بێ پاساوی لەدژی ئێران بەرپاكرد كە هەشت ساڵی خایاندو تا ئەو كاتەی لە (8/8/1988) دا راگیرا، لەو جەنگەدا سەدان هەزار سەرباز و مەدەنیی كوژران و قەرزێكی دارایی گەورە (75 ملیار دۆلاری ئەمریكیی) هاتە سەر وڵاتەكە، بەڵام هێشتا سەددام فەرماندەی گشتیی هێزەچەكدارەكانی عێراق،خاوەنی سوپایەكی پڕ چەك و ئەزموون بوو كە خستیەگەڕ بۆ سەپاندنی هەژموونێكی ناوچەیی بۆنموونە گوشاری خستە سەر كوەیت بۆ لێخۆش بوون لە بڕە بەشی قەرزەكانی ئەو وڵاتە بچوكە نەوتییە دەوڵەمەندە لەسەر عێراق بەڵام بێ سوود بوو.ئەوەبوو لەبەرەبەیانی 2/8/1990 سەدام سوپاكەی ناردە سەر كوەیتی بێ دیفاع و لكاندنی بەپارێزگاكانی عیراقەوە بەناوی گەڕانەوەی لق بۆ سەر بنەڕەت (عودە الفرع الی الاێل). لەبەرانبەر ئەو لەشكركێشییە دەگمەنەی وڵاتێكی عەرەبیی بۆسەر دراوسێ عەرەبەكەی، جەیمس بەیكەر وەزیری دەرەوەی ئەوكاتەی ویلایەتە یەكگرتووەكانی ئەمریكا لەسایەی ئیدارەی جۆرج ئێچ بوشی باوك (1988-1992)دا هەڵمەتێكی دیپلۆماتیی گەورە وسەركەوتووی جیهانیی ئەنجامدا بۆ پێكهێنانی هاوپەیمانییەكی سەربازیی نێودەوڵەتیی بە فەرماندەیی وڵاتەكەی ولێدانی عێراق لەبەرەبەیانی 17/1/1991 لە جەنگی دووەمی كەنداودا (كە بە گەردەلولی بیابان ناسرا) بۆ تێكشكاندن و ناچاركردنی سوپاكەی سەدام بۆ هەڵهاتن و پاشەكشە لە كوەیت لە رۆژی 28ی شوباتی هەمان ساڵدا، ئەو جەنگە كە تەنیا زیاتر لەیەك مانگی خایاند (بەراورد بەهەشت ساڵ جەنگ لەگەڵ ئێران) كاولكارییەكی تر، بەڵام بێ وێنەی بەسەر عێراقدا هێنا كەزەرەرمەندە سەرەكییەكەی خەڵكی بەش مەینەت وچەوسێنراوی عێراق وكەمێك لەبازنەی فەرمانڕەوای رژێم بوون بەهۆی درێژەكێشانی گەمارۆیەكی ئابووریی سەختگیری نێودەوڵەتیی وگۆشەگیریی ودابڕانێكی توندی سیاسیی وڵاتەكە لە چواردەور وجیهان.

سەركوتكاریی و مانەوە لە دەسەڵاتدا

سەرباری ئەو دوو جەنگە ماڵوێرانكار و تێكشكێنەرە كەچی سەددام بەهۆی سووربوونی لەسەر مانەوە و رێگەنەدان بە رووخاندنی رژێمەكەی بەهەر هۆیەك بێت،لە سەروبەندی بەهاری ساڵی 1991 واتە تەنها كەمتر لەمانگێك پاش كشانەوەی لەعێراق بە توندترین شێوە بەگژ راپەڕینە مەزنەكەی خەڵكی كوردستان و حزب و هێزە شیعە مەزهەبەكانی پارێزگاكانی ناوەڕاست وباشووری عێراقدا چووەوە وسوپاكەی ناردە سەر هێزەكانی پێشمەرگە ودانیشتوانی شار وشارۆچكە بەشداربووەكانی راپەڕین لەكوردستان وخەڵكی شارە شیعەمەزهەبەكانی ناوەڕاست وباشور بۆ سەركوتكردنی ئەو راپەڕینەی كوردستان وبەشە عەرەبییە شیعەكەی عێراق ولە ئەنجامدا كۆڕەوێكی ملیۆنیی ومێژوویی خەڵكی كوردستانی لێكەوتەوە كەبووە هۆی دەرچوونی بڕیاری 688 ی ئەنجومەنی ئاساییشی نێودەوڵەتیی سەر بەنەتەوەیەكگرتووەكان وسەپاندنی ناوچەی دژە فڕین لە رووبەرێكی فراوانی پارێزگانی باكور وباشوری عێراق.ئەوەبوو هێزەكانی رژێم بۆ ماوەیەكی كەم لە كوردستاندا مانەوە تا ئەوكاتەی لەراپەڕینێكی تردا (18/تەمموز/1991)، پارێزگاكانی هەرێمی كوردستان (بەبێ كەركوك) لە هێزەكانی رژێمی عیراق چۆڵكران ورژێمیش بڕیاری كشاندنەوەی ئیدارە وسەپاندنی ئابڵۆقەیەكی ناڕەوای بەسەر گەلی كوردستاندا دەركرد.بەكاریگەریی ئەو هەل و مەرجە ناوخۆیی ودەرەكییەش حكومەتی هەرێمی كوردستان دامەزرا.

ئەل ئەیام ئەلطەویلە (بە پاڵەوانكردنی سەدام)
ساڵی 1980 و لەسەرەتای خۆسەپاندنی سەدام حسین بەسەر گەلی عێراقدا وەك سەرۆك كۆمار، فیلمێكی (150دەقیقەیی) بەناوی ئەلئەیام ئەلطەویلە –رۆژگارە دوورودرێژەكان-ەوە لەدەرهێنانی توفیق ساڵح و نووسینی سەددام حسێن و تۆفیق ساڵح ونواندنی سەددام كامل ئامۆزای سەددام حسێن لەرۆڵی سەددام حسێندا بەرهەمهێنرا.

ئەو فیلمە كەلەتەلەفزیۆنی رەسمیی عێراقەوە (كەناڵی یەك) چەندینجار پەخشكراوە، بەرهەمێكی بایۆگرافیی بوو دەربارەی ژیاننامەی سەددام وهەوڵە شكستخواردووەكەی بۆ تێر‌وركردنی عەبدولكەریم قاسم لە 7/10/1959 داوراكردنی بەبرینداری بۆ سوریا. فیلمەكە هەوڵێكی تری پروپاگەندەكارانە بوو بۆ بەپاڵاوانكردنی سەددام لەلای عێراقییەكان و گێڕانەوەی دەربازبوونی قورس و گرانی سەددام لە دەستی هێزەكانی قاسم وساڵانە یاخود هەر چەند ساڵ جارێك لە بۆنە حزبییەكانی بەعسدا لە تەلەفزیۆنی عێراقەوە پێشكەش بە بینەران دەكرا كە جگە لەتەلەفزیۆنی رەسمیی عیراق هیچ كەناڵێكی تریان نەبوو تەنها ئەو شوێنانە نەبێت كە لەسەر سنوورەكانی خۆرهەڵات هەندێك كەناڵی رەسمیی ئێرانیان وەردەگرت و ئەوەش مەترسیداربوو لە رووی ئەمنیی و موخابەراتییەوە.



رۆژی 18 كانونی‌ یەكەمی‌ ساڵی 2003 رۆژێكی‌ مێژوویی گرنگ بوو بۆ جیهان بەگشتی‌‌ و گەلی عیراق بەتایبەتی‌، چونكە یەكێك لەدڕەندەترین دیكتاتۆرەكان (سەدام حسێن) سەرۆكی رژێمی‌ پێشووی‌ عیراق دوای ئەو هەموو نەهامەتییەی‌ كە بەسەر گەلانی‌ عیراقدا هێنابووی‌ داواجار بەبێ ئەوەی هیچ بەرگرییەك لەخۆی بكات، لەچاڵێكی‌ تاریكداو بەڕوخسارو دەروونێكی‌ رووخاوەوە لەگوندێكی‌ ناوچەی‌ تكریت لەلایەن هێزێكی‌ مارێنـزی‌ ئەمریكییەوە دەستگیركرا.
دوای ئەوەی‌ سوپای ئەمریكا بەهاوكاری هێزەكانی‌ هاوپەیمانان لەبەرەی‌ باشورو هێزەكانی‌ پێشمەرگە لەبەرەی‌ باكوور توانییان لەمانگی‌ نیسانی‌ ساڵی 2003 دا دەسەڵاتی‌ رژێمی‌ بەعس لەناوبەرن، (سەدام)و دارو دەستەكەی‌ روویان لەناوچەكانی‌ دەرەوەی‌ بەغدا كرد بۆئەوەی‌ لەو رێگەیەوە هەوڵی‌ كۆكردنەوەی‌ ئەندامانی‌ حزبی بەعس بدەن، كە دژ بەسوپای ئەمریكاو هێزەكانی‌ هاوپەیمانان بجەنگن، دوای رووخانی‌ رژێمەكەی‌ سەدام هێزەكانی‌ ئەمریكا بۆیان رونبووەوە كە (سەدام حسێن) خاكی‌ عیراق جێناهێڵێت ئەوان لایان وابوو كەسایەتی‌ سەدام هەڵهاتن قبوڵ ناكات، هەر بۆیە پلانێكی‌ تۆكمەیان داڕشت بۆ دەستگیركردنی, كە وەزارەتی بەرگری ئەمریكا خەڵاتێكی‌ دەیان ملیۆن دۆلاری تەرخانكرد، بۆئەوەی‌ وەك دیاری بدرێت بەئەو كەس‌ و لایەنانەی‌ كە زانیاری وردو دروست لەسەر شوێنی‌ خۆحەشاردانی‌ (سەدام حسێن) بەهێزەكانی‌ ئەمریكا بدات، ئەوە لەكاتێكدا بوو كە (سەدام حسێن) لەسەرووی هەموو ئەو تۆمەتبارانەوە بوو كە هێزەكانی‌ ئەمریكاو هاوپەیمانان هەوڵی‌ دەستگیركردنیان دەدا.
پلانی دەستگیركردنەكە لەلایەن ژەنەڕاڵ (سیمۆن دارایز)ەوە سەرپەرشتی‌ دەكرا، كە یەكێك بوو لەسەركردە باڵاكانی‌ (دەزگای هەواڵگری ئەمریكا) لەعیراق، لەمانگی‌ (8)ی‌ ساڵی‌ (2003)دا دەنگۆی ئەوە بڵاوبووەوە گوایە چەند جارێك (سەدام حسێن) لەباكوری شاری بەغداو ناوچەی‌ تكریت بینراوە, هەر بۆ ئەم مەبەستەش (دەزگای هەواڵگری ئەمریكا) تیمێكی‌ تری بەسەرۆكایەتی‌ ژەنەڕاڵ (سوارز كیفمان) پێكهێنا بۆ زیاتر دڵنیابوون لەو زانیارییانەو دۆزینەوەی‌ پەناگە نهێنییەكەی‌ (سەدام حسێن).


لەدواین هەوڵیشدا هێزەكانی‌ ئەمریكا دەستیان كرد بەدەستگیركردنی‌ كەسە نزیكەكانی‌ سەدام ‌و پاسەوانەكانی‌ بۆئەوەی‌ لەرێگەی‌ ئەوانەوە سەدام دەستگیر بكەن, دوای دەستگیركردنی‌ چەند كەسێكی‌ نزیكی‌ سەدام‌ و لێكۆڵینەوە لەگەڵیاندا زانیارییان لەسەر چەند شوێنێك دركاند، كە سەدام پەنای بۆ دەبات، هەروەها ناوی‌ ئەو ئەفسەرانەیان بەهێزەكانی‌ ئەمریكا دابوو پەیوەندی راستەوخۆیان بە(سەدام حسێن)ەوە هەیە، هەروەها لەكاتی‌ لێكۆڵینەوەكاندا ئەو دەستگیركراوانەدا ئاماژەیان بەوەكردبوو، سەدام تەنیا دوو پاسەوانی‌ تایبەتی‌ لەگەڵدایە، لەرۆژی 12 ی‌ كانونی‌ یەكەمدا دوای ئەوەی‌ هێزەكانی‌ ئەمریكا لەهەڵمەتێكی‌ گەڕان ‌و پشكنیندا لەناوچەی‌ كەڕادەی‌ شاری بەغدا توانییان كەسێك بەناوی (محەمەد ئیبراهیم ئەلسمەت) دەستگیربكەن كە پێشتر پلەی (عەقید) بووە لەسوپای عیراقدا دوای لێكۆڵینەوە لەگەڵیدا ناوبراو شوێنی‌ خۆ حەشاردانی‌ (سەدام حسێن)ی‌ بۆ هێزەكانی‌ ئەمریكا دركاندبوو پێی راگەیاندبوون، سەدام لەگوندێكی‌ ناوچەی‌ تكریت خۆی حەشارداوە.

ئێوارەی‌ هەمان رۆژ هێزێكی‌ تایبەتی‌ مارێنـزی ئەمریكی‌ بەپاڵپشتی‌ فڕۆكە جەنگییەكان بەرەو ئەو ناوچەیە بەڕێكەوتن، هاوكات لەڕاپۆرتی‌ ژەنەڕاڵ (جەیمس هیكلی) ئاماژە بەوەكرابوو، لەو هەڵمەتەدا كۆمەڵێك لەپێشمەرگەكانی‌ (یەكێتیی نیشتمانیی‌ كوردستان) بەشداربوون، دوای پشكنین‌ و گەڕانێكی‌ ورد لەناوچەكەدا بەرەبەیانی‌ ڕۆژی (18)ی‌ كانونی‌ یەكەمدا ئەو هێزە لەچاڵێكی‌ تەنگدا توانییان (سەدام حسێن) سەرۆكی‌ رژێمی‌ پێشووی‌ عیراق دەستگیربكەن، دواتر رادەستی‌ گەلانی عیراقیان كرد، دوای دادگاییكردنی‌ لەسەر هەموو ئەو كارە نامرۆڤانەی‌ دژ بەگەلانی‌ عیراق‌ و گەلی‌ كورد بەتایبەتی‌ ئەنجامیدابوو دواجار لەلایەن دادگای باڵای تاوانەكانی‌ عیراق بڕیاری لەسێدارەدانی‌ بۆ دەركرا.


رۆژی 30 / 12 / 2006 لە بەرەبەیانی یەكەم رۆژی جەژنی قورباندا سەدام حسێن سەرۆكی رژێمی لەناوچووی بەعس لەعیراق لەفەرمانگەی موخابەراتی عیراقی لەسێدارەدرا، پاش ئەوەی لەدادگای باڵای تاوانەكان لەعیراق بڕیاری لەسێدارەدانی بۆ دەرچوو، پاشان سەرۆكی كۆمار دەسەڵاتی لەسێدارەدانی ئەو تاوانبارەی بەخشیە نوری مالیكی، سەرۆكی ئەنجومەنی وەزیرانی عیراق.

محەمەد مونیب ئەندامی‌ تیمی‌ پارێزەرانی‌ بەرگریكار لە سەدام حسێن سەرۆك كۆماری‌ پێشووتری‌ عیراق لە یادی‌ 10 ساڵەی‌ لەسێدارەدانیدا رایگەیاندبوو لەسێدارنی‌ ناوبراو لە بەرەبەیانی‌ جەژنی‌ قوربانی‌ 2006دا بەمەبەست بووە.

محەمەد مونیب لە لێدوانێكی‌ رۆژنامەوانیدا كە رۆژنامەی‌ ئەلیەوم ئەلسابع بڵاویكردووەتەوە، دەڵێت: "مەبەست لە لەسێدارەكانی‌ سەدام حسێن لە بەیانی‌ جەژندا ناردنی‌ پەیامێك بووە بۆ هەمووان بەتایبەت بۆ فەرمانڕەواكان كە عەرەب مەڕن و دەكرێت لە رۆژی‌ جەژندا سەرببڕدرێن".

جەختیشی‌ لەوە كردەوە كە "سەدام حسێن كاری‌ بۆ ئەوە دەكرد كە كەس بەخراپە باسی‌ فەرمانڕەواكانی‌ عەرەب نەكات و تەنها هێرشی‌ دەكردەسەر ئێران و پێیوایووە كە رۆڵی‌ ئێران لە ناوچەكەدا لە رۆڵی‌ ئەمریكا مەترسیدارتر بووە".

ئەو پارێزەرە پێیوایە كە "ئوممەی‌ عەرەبی‌ بە لەسێدارەدانی‌ سەدام حسێن سەرەڕای‌ ئەوەی‌ دیكتاتۆر بووە، زیانی‌ كردووە و بەڵگەش ئەو رووداوانەیە كە لە ئێستا لە سوریا روودەدەن".

PUKmedia  ئامادەكردنی.. ژوان ئەحمەد سەعید –  كاوان ئەحمەد حەمەساڵح هەڵەبجەیی