شاره‌زوور.. گرانبوونی سه‌مادی كیمیایی بارگرانی بۆ جوتیاران دروستكردوه‌

ئه‌مساڵ به‌هۆی نه‌بوونی بارانی پێویست ده‌ستپێكردنی وه‌رزی چاندنی گه‌نم جۆ دواكه‌وتووه‌، هه‌مان كات سه‌مادی كیمیایی زۆر له‌بازاڕدا گران بووه‌، ئه‌مه‌ش بووه‌ته‌ هۆی بارگرانی بۆ جوتیاران

خه‌سره‌و محه‌مه‌د جوتیاری نمونه‌یی به‌PUKmedia  ی ڕاگه‌یاند: به‌هۆی كه‌می باران له‌ پار ساڵ ، بارینی كه‌میش  باران له‌ئه‌مساڵ ، ئاسته‌نگی زۆری بۆ چاندنی گه‌نم و جۆ له‌ سنووره‌كه‌ دروستكردووه‌، له‌سه‌روئه‌وانه‌شه‌وه‌، گران بوونی سه‌ماد و كودی كیمیایی له‌بازاڕدا ، بارگرانی زیاتر بۆ جوتیاران .

وتیشی: هیوادارم حكومه‌ت زیاتر هاوكار پاڵپشتمان بێت، بۆ هه‌رزانی نرخی سه‌مادی كیمیایی پشتگیری جوتیار بكات ، دابه‌شی بكات به‌سه‌رماندا .

ئاماژه‌ی به‌وه‌شكرد: به‌هۆی گرانبوونی سه‌مادی كیمیایی هه‌ندێك له‌ جوتیاران به‌كاریان نه‌هێناوه‌و ئه‌مه‌ش كاریگه‌ری ده‌خاته‌ سه‌ر رێژه‌و جۆری به‌رهه‌می گه‌نمی و جۆ له‌ سنووره‌كه‌، وتیشی: هیوادارم جوتیاران زیاتر زه‌ره‌رمه‌ند نه‌بن پشتگیری و پاڵپشتیمان بكرێت . 

عه‌بدولكه‌ریم عارف به‌ڕێوبه‌ری كشتوكاڵ له‌قه‌زای شاره‌زوور به‌ PUKmedia ی ڕاگه‌یاند:  به‌هۆی قه‌یرانی دارایی و نه‌بونی بودجه‌ی پێویست، ئه‌مساڵ وه‌زاره‌تی كشتوكاڵ تا ئێستا پلانی كڕین و پاڵپشتیكردنی سه‌مادی كیمیایی نییه‌ و له‌ ئێستاشدا به‌هۆی به‌رزبوونه‌وه‌ی به‌های دۆلار به‌رامبه‌ر دیناری عیراقی و نرخی سه‌مادی كیمیایی به‌ هه‌موو جۆره‌كانییه‌وه‌ ( یۆریا و D.A. P ) له‌ بازاڕه‌كانی هه‌رێم و وڵاتانی ده‌وروبه‌ر به‌ شێوه‌یه‌كی به‌رچاو به‌رزبوه‌ته‌وه‌ و ئاسته‌نگی بۆ جوتیاره‌كان دروستكردوه‌ .

 وتیشی:  دابینكردنی كودی كیمیایی و هه‌موو جۆره‌ خزمه‌تگوزاریه‌ك وه‌ك ( بنه‌تۆو ، سه‌مادی كیمیایی، قڕكه‌ڕی قه‌ڵاچۆكرنی مێروه‌زیانبه‌خشه‌كان ٫ له‌ ده‌سه‌ڵاتی ئێمه‌ وه‌ك ( به‌ڕێوه‌به‌رایه‌تی كشتوكاڵ ) نییه‌ و به‌ پێی پلانی وه‌زاره‌ت و به‌ڕێوه‌به‌رایه‌تی گشتی كشتوكاڵ ئه‌گه‌ر هه‌بێت ئه‌وه‌ هه‌موو به‌ڕێوه‌به‌رایه‌تی و به‌شه‌كشتوكاڵیه‌كان پشكی خۆی هه‌یه‌و بۆی ده‌نێردرێت و ئێمه‌ش هه‌ڵئه‌سین به‌ دابه‌شكردنی به‌ سه‌ر برا جوتیاره‌كانماندا.

ئه‌وه‌شی خسته‌ڕوو:  تێكڕای ساڵانه‌ نزیكه‌ی ( ٦٠٠٠٠ ) دۆنم زه‌وی كشتوكاڵی له‌ سنووره‌كه‌مان به‌ گه‌نم و جۆ ده‌چێنرێت.

PUKmedia محه‌مه‌د عه‌بدولره‌حمان/ شاره‌زوور