پرسه‌نامه‌ی سه‌رۆك كۆمار بۆ كۆچی دوایی محسن عه‌لی ئه‌كبه‌ر

 بۆ كۆچی دوایی مامۆستا موحسن عه‌لی ئه‌كبه‌ر، د. به‌رهه‌م ساڵح سه‌رۆك كۆماری عیراق، بروسكه‌یه‌كی سه‌ره‌خۆشی ئاڕاسته‌ی بنه‌ماڵه‌ سه‌ربه‌رزه‌كه‌یان كردووه‌، ئه‌مه‌ ده‌قه‌كه‌یه‌تی: 

په‌یامی ھاوخه‌می سه‌رۆك كۆماری عیراق بۆ بنه‌ماڵه‌ و كه‌سوكاری مامۆستا موحسن عه‌لی ئه‌كبه‌ر

بۆ بنه‌ماڵه‌ و كه‌سوكاری مامۆستا موحسن عه‌لی ئه‌كبه‌ر

به‌داخێكی زۆره‌وه‌ هه‌واڵی كۆچی دوایی مامۆستا محسن عه‌لی ئه‌كبه‌رم بیست، مامۆستای دیار و ره‌سه‌نی قوتابخانه‌ی تێكۆشان و كوردایه‌تی، پێشمه‌رگه‌ی دێرین و مه‌وسوعه‌ی كاری رێكخستن و نمونه‌ی شۆڕشگێری راسته‌قینه‌.

جگه‌ له‌ ئه‌زموونی پێشمه‌رگایه‌تی و شاخ، مامۆستا له‌دوای راپه‌رینیش به‌رجه‌سته‌ی كه‌سایه‌تیه‌كی لێوه‌شاوه‌ و به‌توانا بوو، له‌سه‌رجه‌م وێستگه‌كانی كاركردنیدا شایه‌دی ئه‌وه‌ی بۆ ده‌درێت كه‌ لێزان و سه‌ركه‌وتوو بوو، ماوه‌یه‌ك له‌ئه‌ركی حكومیدا به‌یه‌كه‌وه‌ كارمان كرد، هاوكارێكی به‌سه‌لیقه‌ و عاقڵمه‌ند، جێگه‌ی متمانه‌ و راوێژ بوو، له‌ژیانی رۆژانه‌شدا، له‌دانیشتن و  كۆڕی دۆستاندا كه‌مدویه‌كی جوانبێژ بوو، بۆیه‌ به‌كۆچی دوایی كه‌سێكی شایسته‌ و تێكۆشه‌رێكی راسته‌قینه‌مان له‌ده‌ست چوو.

سه‌ره‌ڕای پرسه‌ و هاوخه‌میم بۆ كه‌سوكار و بنه‌ماڵه‌ تێكۆشه‌ر و به‌ڕێزه‌كه‌ی، له‌ خوای گه‌وره‌ داواكارم به‌چاكه‌ی خۆی له‌گه‌ڵی بكات و گیانی له‌به‌هه‌شتی نه‌مریدا ئاسوده‌ بكات.

به‌رهه‌م ساڵح
سه‌رۆك كۆماری عیراق
PUKmedia