دابەزینی تمەن و لیرە، کاریگەری لەسەر هەرێم؟!

ئابوریناسان و مامۆستایانی زانکۆ ئاماژەبەوە دەکەن بەهۆی  ئەوەی زۆربەی پێداویستەکانی ناوخۆی هەرێمی کوردستان لە هەردوو وڵاتی تورکیاو ئیران هاوردەدەکرێت، لەکاتی دابەزینی بەهای تمەن و لیرە بەرامبەر دۆلار، کاریگەری لەسەر هەرێمی کوردستان و ئابووریەکەی دەبێت، راشیدەگریەنێت ئەگەر وەزارەتە پەیوەندارەکانی هەرێم  پلان و بەرنامەی گونجاویان  هەبێت، دەتواندرێ سوود لە دابەزینی بەهای ئەو دوو دراوە وەربگرن و لەبەرژەوەندی خەڵکی کوردستان بەکاری بهێنێن.

د.ئەرشەد تەها ئابوریناس و مامۆستای زانکۆ  لەشاری هەولێر بە PUKmedia ی راگەیاند: دابەزینی بەهای هەردوو دراوی تمەنی ئیرانی و  لیرەی تورکیا بەدوو جۆر کاریگەری لەسەر ئابووری  و خەڵکی هەرێمی کوردستان هەیە، کەیەکیان ئەرێنیە و ئەوەی تریان نەرێنیە.
‎وتیشی: لەلایەنە نەرێنیەکەی ئەوەیە کاتێک بەهای ئەو دراوانە بەرامبەر دۆلار دادەبەزی، نرخی سەرجەم کاڵاو پێداویستیەکانی وەک خۆراک و جلوبەرگ کەمدەبێتەوەو بۆ خەڵکی هەرێم  هەرزانتر  دەکەوێت، ئەمەش وادەکات بەرهەمی ناوخۆی کوردستان پاشەکشە بکات و نەتوانێت لەرووی نرخەوە کێبرکێی ئەوان بکات.

راشیگەیاند: بەڵام لایەنە ئەرێنیەکەی ئەوەیە کە لەکاتی دابەزینی دراوی هەردوو وڵاتی تورکیا و ئیران وادەکات ئابووری ئەو دوو وڵاتە بەرەوخراپی و قەیران  بچێت، بۆیە ئەگەر وەزارەتە پەیوەندارەکان و ژووری بازرگانی و پیشەسازی  پلان و بەرنامەیەکی ئابووریانە هەبێت،  دەتوانێت سوود لەو دەرفەتە وەربگرن و پەرە بە بەرهەمی ناوخۆ بدەن.

لەلایەن خۆیەوە ئاسۆ دەباغ رۆژنامەنوسی ئابووری لە ژووری بازرگانی و پیشەسازی هەولێر بە PUKmedia ی راگەیاند: دابەزینی دراوی هەردوو وڵاتی تورکیا و ئیران بەرامبەر دۆلار بۆ ماوەیەکی دیاریکراو بە ئابووری هەرێمی کوردستان و بازرگانان دەگەیەنێت، بەڵام ئەو ماوەیە دەرێژە ناکێشێ.
‎وتیشی: کاتیک بازرگانێکی هەرێمی کوردستان گرێبەست لەگەڵ کۆمپانیایەکی وڵاتی تورکیا یان ئیران بۆ هێنانی کاڵایەک ئیمزادەکات، گرێبەستەکە تا ئەو کاتە بەردەوامدەبێت کە نرخی دراوی ئەو وڵاتە جێگیرە.

‎راشیگەیاند: کاتێکیش  لیرەی تورکی یان تمەنی ئیرانی دادەبەزی، بەشێکی زۆر لەکۆمپانیا و کارگەکانی ئەو وڵاتانە گرێبەستەکە هەڵدەوەشێننەوە و پێوەی پابەندنابن. بەمەش خەڵکی هەرێمی کوردستان ناتوانن  لەدابەزینی دراوی ئەو وڵاتانە بۆ ماویەکی زیاتر سودمەندبن.

PUKmedia تەها عەبدوڵڵا