}

فەرەنسا.. هێلەک زەردەکان یادی 3 ساڵەیان کردەوە

جیهان 05:59 PM - 2021-11-21

دوێنێ  شەممە 20 ی نۆڤەمبەر ، لە پاریس بۆ یادی  3 ساڵەی  ئیلەک زەردەکان ، بە ئامادە بوونی ژمارەیەک  لە ئەندامانی  ئێلەک زەردەکان و سەندیکاکان ، خۆنیشاندانێکی  ئارام  بەڕێوەچوو .

ئێلەک زەردەکان چۆن دروستبوون ،،

سێ ساڵ پێش ئێستا ،  بە سوود وەرگرتن لە تۆڕەکۆمەڵایەتیەکان ، ژمارەیەک لە هاووڵاتیان  بانگەوازێکیان  بڵاوکردەوە تێیدا  هووشیاریان  بە بەرزبوونەوەی  نرخی  سووتەمەنی بە تایبەتی  گازوایل و بەنزین دا  و داوایانکرد  کە  دەنگی ناڕەزاییان لە خۆنیشاندانێکی  جەماوەری و مەدەنیدا دەرخەن و بڕژێنە ناو شەقام و گۆڕەپانەکان  بۆ داکۆکیکردن لە  بژێوی ژیانیان    ، سەرەتا ناوی  خۆیان نا ( توڕەبوون )  هەندێک لەو کەسانەی لەسەرەتادا  بەشداربوون و هاتبوون بەدەنگ  ئەو بانگەوازەوە  بە ئیلەکی زەردەوە  بەشداریان کرد چونکە  هەر لەدوای تەواوبونی  کارەوە  ئەهاتن بۆ بەشداریکردن لە   گرتبوونەوە و خۆنیشاندانەکاندا  پاشان  وردەووردە  ئێلەکی  زەرد  زیادی ئەکرد و بەو شێوەیە  بزووتنەوەکە  ناونرا  بە بزووتنەوەی ئێلەک زەردەکان .

لە 25 ی مانگی سەپتەمبەری ساڵی 2018 دا ، شۆفێرێک  بە ناوی ( پریسیلیا لیودۆسکی )  مەزبەتەیەکی  لەسەر تۆڕەکۆمەڵایەتیەکاندا  بڵاوکردەوە بە مەبەستی  کۆکردنەوەی  ژمارەیەکی زۆر لە ئیمزاکردن  و پشتگیری  بانگەوازەکەی  ،  کە تێیدا  داوا لە حکوومەت ئەکات    نرخی  بەنزین  دابەزێنێت  و هەرزانی کات  ،  ئەم بانگەوازە   هەر زۆر زوو خەڵکێکی  زۆر هات بەدەنگیەوە و لەماوەیەکی  کورتدا 226 هەزار  ئیمزا کۆکرایەوە و پاشان  لە ئۆکتۆبەری 2018 دا  یەک  ملیون ئیمزای  تێپەڕاند و لە 10 ی ئۆکتۆبەری هەمان ساڵدا ، شۆفێری  بارهەڵگرە گەورەکان  وەک ( ئیریک درویت و برینۆ لو ڤێڤر)  لەسەر  فەیس بووک  بانگەوازێکیان بڵاوئەکردەوە   و داوایان کرد   هەموو پێکەوە  بەشداری  بکەن لە  ( مانگرتنی  گشتی نیشتمانی  دژی بەرزبوونەوەی  سووتەمەنی )  لە 17 ی نۆڤەمبەری 2018 دا ئەم بیرۆکەیە  لەلایەن  هەندێک لە شۆفێرانیترەوە  قۆزرایەوە  و بڕیاری  داخستنی رێگاوبانیان و فوولکەی شارەکانیان دا لە   زۆر  لە هەرێمەکانی فەرەنسا  .

لە کۆتایی مانگی نۆڤەمبەردا ، ژمارەیەک لە ڤیدوێێ  لەسەر تؤڕەکۆمەڵایەتیەکان  بڵاوکرایەوە  کە تێیدا  هەموو چالاکیەکانیان  و مانگرتن و خۆنیشاندانەکانیان   بڵاوئەکردەوە ، بە ماوەیەکی زۆر کەم 6 ملییون کەس پشتگیری  خۆیان  دەرخست ، لە  ڕاپرسیەکدا  کە  هەر لەکاتەدا  ئەنجامدرابوو ، ٪42 ی  فەرەنسیەکان  ئامادەیی خۆیان  نێشاندا  بۆ ئەگەری  بەشداریکردنیان  لە  مانگرتنی  گشتی لەسەر  ئاستی  ووڵات  و لە ٪23 ێش لەوانە  ئامادەیی خۆیان   بە دڵنیاییەوە  دەربڕی بۆ   بەشداریکردنیان لەو مانگرتنە .

پاشان ئەم بزووتنەوەیە  پێوەرەکەی   هێدی هێدی  گەورە ئەبوو   و داواکاریەکانیش  ڕۆژ بە ڕۆژ  زیاتر ئەبوو ، سەندیکاکانی کرێکاران  ئەوانیش لای خۆیانەوە  هاتنەدەنگ هاتنە پێشەوە   و پشتگیریان بۆ  ئەو بزووتنەوەیە خستەڕوو ، درووشمەکان و داواکاریەکانیش  بە قەوارەی  فراوانبوونی  بزووتنەوەکە  زیادی ئەکرد  ، جگە  لە نرخی بەزین ، داوای  ( بەرزبونەوەی  توانای کڕین ، واتە  بەرزکردنەوەی  مووچە  بەرامبەر  بە  گرانی  بازاڕ و بژێویی ژیان  هەروەها  هەرزانکردنی نرخی  بەنزین و یاسای کۆمەڵایەتی ) ئەکرد .

لە 14 ی نۆڤەمبەردا ، هەزاران  ئەندامی ئەم بزوتنەوەیە  هەستان بە  کۆنتڕۆڵکردنی  هەندێک  لە فوولکەکان لە باکوور ، 15 ی نۆڤەمبەر هەموو رێگاوبانەکانیان کۆنتڕۆڵکرد و  هاتووچۆ  بێبەرامبەر کرا ،  لە هەندێک  شوینیشدا   رێگاکانیان  کۆنتڕۆڵکرد و بوەهۆی ئەوەی  هێواشبونەوەی  جوڵەی  هاتووچۆی ئۆتۆمۆبیل لە ڕێگاوبانەکاندا بەم شێوەیە   هێدی هێدی  سۆزی جەماوەریان بەلای خۆیاندا  ڕائەکێشا تەنانەت هەندێک لە سەرۆکی شارەوانیەکان  پشتگیری خۆیان  دەرخست و لە باڵەخانەی شارەوانیەکانیان ئێلەکی زەردیان هەڵئەواسی  .

لە پاریس  بۆ یەکەم جار ڕۆژی شەممە ی ڕێکەوتی 17 ی نۆڤەمبەر ، ئێلەک زەردەکان  گرتبونەوەیەکیان  رێکخست و لەهەمانکاتیشدا ژمارەیەک لە فوولکەکانیان  کۆنترۆڵکرد ، لەم  گرتبونەوەیەدا  287 هەزار و 710  ئێلەک زەرد لە سەرتاسەری فەرەنسا   بەشداریانکرد   بەڵام  هەر لەم ڕۆژەدا ، یەکێک  لە ئێلەک زەردەکان کوژرا  و  409 برینداربون  و 117 یش  دەستگیرکران و 73 لەوانە  لێکۆڵینەوەیان لەگەڵدا  کرا ، دوابەدوای ئەمە  3 هەزار ئێلەک زەرد  لە سەر فوولکەکان  بە شەو بەڕۆژ  ئەمانەوە   . 

لە ڕۆژانی دوای ئەوە ،  بە دەیان هەزار  خۆنیشاندەر لە  حاڵەتی ئامادەباشیا  مانەوە  بۆ خۆئامادەکردن  لە خۆنیشاندان و گرتبوونەوە  هەرکاتێک پێویست بێت  ، پاشان  هەموو شەممەیەک  لە پاریس و زۆربەی شارەکان  خۆنیشاندانەکان   بەردەوامبوو بە بەشداری کردنی   ژمارەیەکی  بەرچاو لە ئێلەک زەردەکان  ، ئەوەی  جێیباسە   بۆ یەکەمجار  خوێنکارانی  ئامادەییش  بەشداریاند کرد لەو خۆنیشاندانانەدا  ،  هەمووجارێک  بەرەوڕوبونەوە و تووندوتیژی  لە نێوان خۆنیشاندەران و هێزەئەمنیەکاندا  دروست ئەبوو  بەو هۆیەوە  ژمارەیەک بریندار و گرتنی لێئەکەوتەوە   ، تەنها  لە رۆژی شەممەی  3 ی دێسەمبەری 2018 دا    700 کەس  لەلایەن پۆلیسەوە  دەستگیرکران  لە سەرتاسەری  فەرەنسادا ، لەوانە  148 یان   خوێندکار بوون ،  بەبەردەوام ئەم  چالاکیانە  بە ڤیدۆ ئەگیراو   رؤژانە لەسەر تؤڕەکۆمەڵایەتیەکاندا  بڵاوئەکرایەوە .

لەلایەکی ترەوە ،رێکخراوی   رێبووردنی  جیهانی  لە ڕاپۆرتێکیدا  رەخنە لە حکومەتی فەرەنسا و سەرۆک ماکرۆن ئەگرێت و هۆشیاریان  ئەداتێ لەسەر  توودو تیژی و زیندانیکردنی  خۆنیشاندان  لە لایەن پۆلیسەوە   هەروەها  ئاماژە  بە پێشێکردنی  مافی  خۆنیشاندان ئەدات .

رۆژی 8 ی دێسەمبەر لە  چوارچێوەی چالاکیەکانی بزووتنەوەی  ئێلەک زەردەکاندا ، دووبارە  گرژی و ئاڵۆزیی و تووندوتیژی  لە نێوان  خۆنیشاندەران و هێزە ئەمنیەکاندا ڕوویدا و  264 بریندار بوون  ، هەر لەو رؤژەدا  ئەندامێکی کارای  بزووتنەوەی ئێلەک  زەردەکان ( ژیڕۆم  رۆدگییێز ) لە ئەنجامی هێرشی پۆلیسدا  چاوێکی لەدەستدا ، هەروەها  لەم خۆنیشاندانەدا  2 هەزار ئێلەک زەرد  لەلایەن پۆلیسەوە  لە هەموو شارەکانی فەرەنسا دەستگیرکران ، 1082 ئیلەک زەرد  تەنها لە پاریس دەستگیر کرا  و تەنها لە شاری بۆردۆ 32 کەس بریندار بوون  و 6 پۆلیسیش بریندار بوو .

خۆنیشاندانەکان لە 17 ی نۆڤەمبەری ساڵی 2018 وە  دەستی پێکرد و لە 8/2/2020 بە هۆی  هاتنی کۆرۆناوە   کۆتایی هات  ، لە ماوەی  نزیکەی  ئەو 2 ساڵە ، ئێلەک زەردەکان  بە سەدان خۆنیشاندانیان ئەنجامدا .

لە ڕاپۆرتێکی رۆژنامەی لومۆندا هاتووە کە  لە ماوەی ئەو خۆنیشاندانانەدا  لە سەرتا سەری فەرەنسا ، 10 هەزار کەس لە لایەن پۆلیسەوە  بانگەشەکراوە و لێکۆڵینەوەیان لەگەڵدا کراوە   و 3100 سزای یاسایی دراون و 400 کەسیشیان  زیندانیکراون  ، هەروەها  5300 لەو ئێلەک زەردانە  بە دواداچوونی یاساییان  بۆ کراوە و 2200 ی تریش بەدواداچوونی یاسایان لەسەر لابراوە  .

هەروەها لە ڕاپۆرتەکەی  رۆژنامەی لومۆندا هاتووە ، لە ئەنجامی  پێکدادان و تووندو تیژی نێوان پۆلیس و ئێلەک زەردەکاندا  11 ئێلەک زەرد  کوژراوە  بەدەستی  پۆلیس و 2هەزار و 495 ئێلەک زەرد بریندار بووە ، هەر وەها 1944 پۆلیسیش لە ماوەی ئەو خۆنیشاندانەدا  برینداربوون .

لومۆند بەردەوامە لە ڕاپۆرتەکەیدا و ئەڵێت ، 10 هەزار و 718 ئێلەک زەرد  لەلایەن پۆلیسەوە  بە شێوەیەکی کاتی دەستگیرکراون  و هەروەها  لە سەرەتادا  ٪75 ی  فەرەنسیەکان پشتگیری  بزووتنەوەی ئێلەک زەردەکانیان کردوە و  لە کۆتایدا  ٪47  لە فەرەنسیەکان پشتگیریان ئەکردن ، هەروەها لەو ڕاپۆرتەدا  هاتوە کە  زەرەرووزیانی  گشتی لە ئەنجامی ئەو  خۆنیشاندانەدا  بە  4 ملیون و5 سەد هەزار ئیرۆ  هەژمار ئەکرێت و برێتیە لە  شکاندنی  دووکان و سووتاندنی  ئۆتۆمۆبیل و کۆنتڕۆڵکردنی  ڕیگاوبان و کردنەوەی ئۆتۆبانەکان   بەبێ بەرامبەر .

PUKmedia حەمە عوسمان 
لە میدیاکانی فەرەنساوە 
لومۆند ، لیبراسییون ، لو پاریزیان ، لو فیگارۆ 
 




          

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

دابەزێنە

The News In Your Pocket