}

گۆڕینی تابلۆی ئۆتۆمبێل بارگرانی دارایی دەخاتە سەر هاوڵاتیان

کوردستان 07:01 PM - 2021-11-09

دوای بڵاوبونەوەی دەنگۆی گۆڕینی تابلۆی ئۆتۆمبێل لەعیراق بەشارەکانی هەرێمی کوردستانەوە، ئەندامێکی لیژنەی ناوخۆی پەرلەمانی کوردستان رایدەگەیەنێت، جێبەجێکردنی هەنگاوی لەوجۆرە بارگرانی و زەحمەتی زۆر دەخاتەسەر هاوڵاتیان و شوفێران.

عەبدولناسڕ ئەحمەد ئەندامی لیژنەی ناوخۆی پەرلەمانی کوردستان بە PUKmedia ی راگەیاند: ئەگەرچی تاکو ئێستا بڕیارێکی رەسمی و کۆتایی لەبارەی گۆڕینی تابلۆی ئۆتۆمبێل لە عیراق بەهەرێمی کوردستانەوە نیە، بەڵام جێبەجێکردنی هەنگاوی لەو جۆرە، بارگرانیەکی زۆری دارایی  دەخاتەسەر هاوڵاتیان و شوفێران لەم کاتانەدا.

وتیشی: تەنیا لە هەرێمی کوردستان زیاتر  لە 1ملیۆن و 500 هەزار ئۆتۆمبێل هەیە، بۆیە گۆڕینی تابلۆکان کاتێکی زۆری پێویستەو بەدووری دەزانم لەم کاتانە بڕیاری لەوجۆرە جێبەجێ بکرێت.

ئەو ئەندامەی پەرلەمانی کوردستان ئاماژەی بەوەشکرد: ئەگەر گۆڕینی تابلۆ بارگرانی نەخاتەسەر هاوڵاتیان، بەکارێکی باشی دەزانم، چونکە لەکاتی ئێستا چەندین جۆر تابلۆ لەپارێزگاکان هەیە، بۆیە زۆر پێویستە لەرووی ئەمنی و ئەنجامدانی سەرژمێری ئۆتۆمبێل، یەک جۆرە تابلۆ بۆ سەرتاسەری عیراق هەبێت.

لەلایەنخۆشیەوە  عەمیدی هاتوچۆ ئەسعەد مەلا کەریم بەرێوەبەری پەیوەندییەکان لە بەرێوەبەرایەتی گشتی هاتوچۆی هەرێم  بۆ PUKmedia وتی: لەکاتی ئێستا هیچ رێنماییەکمان لەبارەی مەرج و شێوازی گۆڕینی تابلۆی ئۆتۆمبێل لە عیراق و هەرێمی کوردستان بەدەست نەگەیشتووە. راشیگەیاند: هەرکاتێک نوسراو ئاراستەی بەرێوەبەرایەتیەکەمان بکرێت، ئێمەش رایدەگەیەنین.

 

PUKmedia تەها عەبدوڵڵا

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

دابەزێنە

The News In Your Pocket