سه‌رپه‌رشتیاری مه‌كته‌بی ڕاگه‌یاندن: یه‌كێتی هه‌ڵسه‌نگاندن بۆ ده‌زگاكانی ده‌كات

له‌باره‌ی به‌ستنی پلینوم و كۆنگره‌ و كه‌مكردنه‌وه‌ی ئه‌ندامانی سه‌ركردایه‌تی، سكرتاریه‌تی ئه‌نجومه‌نی سه‌ركردایه‌تی یه‌كێتیی نیشتمانیی كوردستان ڕاگه‌یه‌نراوێكی بڵاوكرده‌وه‌ و تێیدا ئاماژه‌ی به‌وه‌ كرد ئه‌و ده‌نگۆیانه‌ی له‌ سۆشیال میدیا باس له‌ به‌ستنی پلینوم و كۆنگره‌ و كه‌مكردنه‌وه‌ی ئه‌ندامانی سه‌ركردایه‌تی ده‌كه‌ن، دوورن له‌ڕاستییه‌وه‌ و هیچ بنه‌مایه‌كی راستییان نییه‌.

له‌و باره‌یه‌شه‌وه‌ ستران عه‌بدوڵڵا سه‌رپه‌رشتیاری مه‌كته‌بی راگه‌یاندنی یه‌كێتی وێرای ته‌ئكیدكردنه‌وه‌ی له‌سه‌ر سێ به‌درۆخستنه‌وه‌كه‌ی  سكرتاریه‌تی ئه‌نجومه‌نی سه‌ركردایه‌تی به‌ PUKmedia ی راگه‌یاند: زۆر جار سۆشیال میدیاكان بۆ بازاڕگه‌رمی یان بۆ  مه‌زه‌نده‌ و تاقیكردنه‌وه‌ ئه‌و ده‌نگۆیانه بڵاوده‌كه‌نه‌وه‌ كه‌ ھیچ راست و ره‌سمیی نین، بۆیه‌  ئه‌نجومه‌نی سه‌ركردایه‌تی له‌ رێگه‌ی سكرتاریه‌ته‌كه‌یه‌وه‌ به‌گرنگیزانی ئه‌و روونكردنه‌وه‌یه‌ بڵاوبكاته‌وه‌ چونكه‌ ئه‌و ده‌نگۆیانه‌ هیچ بنه‌مایه‌كی راستییان تێدا نییه‌.
ئه‌و ئه‌ندامه‌ی سه‌ركردایه‌تی ئه‌وه‌شی خسته‌ڕوو:  بێگومان یه‌كێتی گۆڕانكاری ده‌كات له‌ئه‌جێندای كاری خۆی و به‌رنامه‌ی پێویستیش بۆ قۆناغی نوێی دوای ھه‌ڵبژاردنه‌كان داده‌نێ و ھه‌ڵسه‌نگاندن بۆ ئه‌دای دامه‌زراوه‌كان و مه‌كته‌ب و مه‌ڵبه‌نده‌كانی ده‌كات ، به‌ڵام ھه‌واڵ و زانیاری له‌سه‌ر به‌ستنی پلینوم و كۆنگره‌و كه‌مكردنه‌وه‌ی ژماره‌ی ئه‌ندامانی سه‌ركردایه‌تی دوورن له‌راستییه‌وه‌.

 ئاماژه‌ی بۆ ئه‌وه‌شكرد: هه‌ڵسه‌نگاندن و پاداشت و لێپرسینه‌وه‌ به‌شێكی گرنگ ده‌بن له‌ بڕیار و ستراتیجی مه‌كته‌بی سیاسیی و سه‌ركردایه‌تی یه‌كێتی ، گۆڕانكاری پێویستیش  ده‌كرێت به‌ڵام ئه‌مه‌ به‌ رێكاره‌ حزبییه‌ ئوسوڵییه‌كان نه‌ك به‌ ته‌خه‌مینی سۆشیال میدیا و په‌یجه‌ جۆراوجۆره‌كان.

PUKmedia دیار ستار