توێژەرێكی كورد كار بۆ دۆزینەوەی چارەسەری شێرپەنجە دەكات

دەستەی كوردستانی

توێژەرێكی دەستەی كوردستانی كار لەسەر دۆزینەوەیەكی نایاب لە بواری چارەسەری نەخۆشی شێرپەنجەدا دەكات و بەرەوپێشچوونی بەرچاویشی بەدەستهێناوە.

دكتۆر رێباز ئاوات ئەحمەد توێژەر و مامۆستا لە دەستەی كوردستانی بۆ دراساتی ستراتیجی و توێژینەوەی زانستی كە بڕوانامەی دكتۆرای لە زانكۆی ئۆكلاهۆما لە سەنتەری زانستی تەندروستی لە شاری ئۆكلاهۆما لە ویلایەتە یەكگرتووەكانی ئەمریكا بەدەستهێناوە، كار لەسەر دۆزینەوەیەكی نایاب لە بواری چارەسەری نەخۆشی شێرپەنجەدا دەكات و بەرەوپێشچوونی بەرچاوی بەدەستهێناوە.

لەوبارەیەوە، دكتۆر رێباز ئاوات ئەحمەد توێژەر و مامۆستا لە دەستەی كوردستانی بۆ دراساتی ستراتیجی و توێژینەوەی زانستی بە سایتی دەستەی كوردستانی راگەیاند: هەر لە منداڵییەوە توانای تێڕامان و وردبوونەوە یەكێك بووە لە تایبەتمەندییەكانی ژیانم، هەر ئەوەش هۆكار بوو بۆ ئەوەی لە دەستەی كوردستانی بۆ دراساتی ستراتیجی و توێژینەوەی زانستییەوە بگەمە ویلایەتە یەكگرتووەكانی ئەمریكا بۆ بەدەستهێنانی بڕوانامەی دكتۆرا لە ساڵی (2015-2020) بە سكۆلارشیپی زانكۆی ئۆكلاهۆمای پزیشكی.

وتیشی: سووربوون لەسەر زیاتر فێربوون و توێژینەوەی زانستی هۆكارێكی سەرەكی بوو بۆ ئەوەی دەستەوەستان نەبم و دۆزینەوە نایابەكەم لە بواری چارەسەری نەخۆشی شێرپەنجەدا زیاتر بەرەوپێش ببەم و خۆشبەختانە ئێستا پشتیوانیی ماددی و مەعنەوی زاناكانی زانكۆی مەریلاندی پزیشكی و كۆمپانیای (Gennoa Bio) بەدەستهێناوە، تا بخرێتە قۆناغەكانی (Food and Drug Administration) لە چوارچێوەی پرۆگرامی پۆست دكتۆرا لە زانكۆی ناوبراو، تاوەكو بە پراكتیكی تاقیبكرێتەوە و لە ئایندەیەكی نزیكدا توشبووانی نەخۆشی شێرپەنجە لێی سوودمەند ببن.

دكتۆر رێباز ئاوات ئەحمەد ئاماژەی بەوەشدا: خۆشحاڵم بەوەی كە هەوڵ و ماندووبوونەكانی چەند ساڵەم گەیشتوونەتە بواری تاقیكردنەوە تاوەكو نەخۆشانی شێرپەنجە سوودمەند بن لە داهاتوویەكی نزیكدا، وتیشی: ئامادەم هاوكاریی هەر گەنجێكی توێژەر و زانستخواز بكەم كە بیەوێت جێدەستی دیاربێت لە بەرەوپێشبردنی زانست لە هەرێمی كوردستاندا، چونكە زانست و فێربوون بنەمای سەركەوتنی گەلانە.

راشیگەیاند: بەخۆشحاڵییەوە من گەنجێكم لە كوردستانەوە دەستمپێكردووە و ئێستا بوومەتە جێگەی متمانەی زاناكانی ویلایەتە یەكگرتووەكانی ئەمریكا، بۆیە هەر كەسێك تواناكانی بخاتە گەڕ دەتوانێت بگات بە ئامانجەكانی كە لە كۆتاییدا بۆ خزمەتی مرۆڤایەتییه
PUKmedia دەستەی كوردستانی