فه‌ره‌نسا.. به‌هۆی بڵاوبوونه‌وه‌ی توندڕه‌وی مزگه‌وتێك داده‌خرێت

دوێنێ چوارشه‌ممه‌ 13ی ئۆكتۆبه‌ر، له‌سه‌ر فه‌رمانی وه‌زیری ناوخۆ ، پارێزگای شاری ( ئه‌للۆن ) سه‌ر به‌ ناوچه‌ی ئیداری ( ساخت) هه‌ستا به‌داخستنی مزگه‌وتی ئه‌و شاره‌ كه‌ جێگای هامووشۆكردن و سه‌ردانی  300 موسڵمانی ئه‌و شاره‌ بوو .

هه‌ر له‌م مزگه‌وته‌شا ، خوێندنگه‌یه‌كی قورئانی هه‌بووه‌ ، كه‌ 110 منداڵی له‌خۆگرتوه‌، یه‌كێك له‌وانه‌كانیان باس له‌ جیهاد و چه‌ك و ڕه‌وای خه‌باتی چه‌كداری ئیسلامی و ته‌لقین بووه‌، به‌هه‌مان شێوه‌ ئه‌م خوێندنگه‌یه‌ش داخرا .

شاری ( ئه‌للۆن ) شارێكی  میللیه‌ و ده‌كه‌وێته‌ باكوری رۆژئاوای فه‌ره‌نسا و ژماره‌ی دانیشتوانی 11 هه‌زار كه‌سه‌، ئه‌مڕۆ دوایی پرۆسه‌یه‌كی یاسایی له‌سه‌ر فه‌رمانی وه‌زیری ناخۆی فه‌ره‌نسا ( گیراخ دارمه‌ننان)، پارێزگای ئه‌و شاره‌ ئه‌و مزگه‌وته‌ی داخست، هۆكاری داخستنیشی به‌پێی زانیاریه‌ سه‌ره‌تاییه‌كان له‌ زمانی ( گابریه‌ل ئاتال ) زمان حاڵی حكومه‌ت وتی، ( ئێمه‌ به‌ هیچ شێوه‌یه‌ك نه‌رمونیان نین به‌رامبه‌ر ئیسلامی تووندڕه‌و، هه‌روه‌ها زۆر توندوتیژین به‌رامبه‌ر تووندڕه‌وه‌ ئیسلامیه‌كان ).
ووتیشی:  كاتێك هێرش ده‌كه‌رێته‌ سه‌ر كۆمار ، پێویسته‌ وه‌ڵامێكی توندمان هه‌بێت ، هه‌ر بۆیه‌  داوای داخستنی ئه‌و مزگه‌وته‌مان كرد ، ئه‌م داخستنه‌ له‌ سۆنگه‌ی یاسای ئاسایشی ناوخۆ و خه‌بات دژی تیرۆریزم هاتوه‌ ،كه‌  ماوه‌یه‌ك پێش ئێستا په‌سه‌ند كرا له‌ په‌رله‌مان.

پارێزگاری ناوچه‌ی ئیداری ( ساخت ) یش لای خۆیه‌وه‌ له‌ ڕاگه‌یاندنێكی رۆژنامه‌وانیدا، ڕایگه‌یاند كه‌ پاش كۆكردنه‌وه‌ی زانیاری ته‌واو له‌سه‌ر ئه‌و مزگه‌وته‌ ، بۆمان ئاشكرا بووه‌ كه‌ ژماره‌یه‌ك له‌ موسڵمانی توونڕه‌و سه‌ر به‌ بزووتنه‌وه‌ی ئیسلامی رادیكاڵ كه‌ به‌لایانه‌وه‌ ئاساییه‌ یاسای شه‌ریعه‌ په‌سه‌ند بكرێت  به‌ به‌رده‌وامی سه‌ردانی ئه‌و مزگه‌وته‌ ده‌كه‌ن و گه‌ڕانه‌وه‌ی جیهاد و چه‌ك و مردن و  شه‌هید بوون و كرداری  تیرۆرستی و په‌نابردن بۆ توندوتیژی و ڕوق و كینه‌ و جیاوازی ڕه‌گه‌ز به‌لایانه‌وه‌ ئاساییه‌ و پێیان ڕه‌وایه‌ له‌ فه‌ره‌نسا.

جێی ئاماژه‌یه‌، كه‌ ژماره‌ی ئه‌و مزگه‌وتانه‌ی هه‌تا ئێستا داخراون بۆ هه‌مان هۆكار بریتین له‌  650 مزگه‌وت ، له‌ماوه‌ی ده‌سه‌ڵاتی ئیمانیول ماكرۆ دا تائێستا ،10 تا 12 مزگه‌وت داخراوه‌، سێجار زیاتر له‌ماوه‌ی حوكمی سه‌رۆكه‌كانی پێشووی فه‌ره‌نسا .

له‌سه‌ر ڕینمایی و پاش كۆكردنه‌وه‌ی زانیاری ورد ، پارێزگای ساخت  ئه‌و مزگه‌وته‌ی داخست به‌ تۆمه‌تی شوێنی كۆبوونه‌وه‌ی  موسڵمانه‌ تووندڕه‌وه‌كان و وتاری  ئیسلامی ڕادیكاڵ و خوێندنگه‌ی قورئانی كه‌ وانه‌ی توندڕه‌وی ده‌ده‌ن به‌ منداڵان.

ئیمامی ئه‌و مزگه‌وته‌ش له‌ میدیاكاندا رایگه‌یاند: كه‌ به‌داخستنی مزگه‌وته‌كه‌ی نیگه‌رانه‌و تووشی شۆكبووه‌و له‌لای خۆشیه‌وه‌ داوا له‌ دادگا ده‌كات بۆ پێداچوونه‌وه‌ی ئه‌و بڕیاره‌ ، هه‌روه‌ها 2 رێكخراوی مه‌ده‌نی ئسلامیش چالاكیه‌كانیان وه‌ستێنرا كه‌ هه‌ر له‌سه‌ر ناوی یاسایی ئه‌م 2 ڕێكخراوه‌ ئه‌و مزگه‌وته‌ ڕێگای پێدراوه‌و دروستبووه‌ ، به‌پێی یاسای فه‌ره‌نساش ماوه‌ی 2 مانگ مۆڵه‌ت هه‌یه‌ لۆمه‌ و ناڕه‌زایی داخستنی ئه‌و مزگه‌وت و قووتابخانه‌یه‌  له‌ دادگا داوا  بكرێت .

PUKmedia حه‌مه‌ عوسمان..  فه‌ره‌نسا 
سه‌رچاوه‌.. رۆژنامه‌ی / لو پاریزیان