بافڵ تاڵه‌بانی: گۆڕان به‌شه‌ریكی راسته‌قینه‌ی خۆمان ده‌زانین

وه‌فدێكی یه‌كێتیی نیشتمانیی كوردستان به‌ سه‌رۆكایه‌تی بافڵ تاڵه‌بانی سه‌ردانی بزوتنه‌وه‌ی گۆڕانی كرد.

له‌و سه‌ردانه‌دا كه‌ ھه‌ریه‌ك له‌ ره‌فعه‌ت عه‌بدوڵا، بڕیارده‌ری ده‌سته‌ی كارگێڕی، شاڵاو كۆسره‌ت ره‌سوڵ، ئه‌ژی ئه‌مین، سه‌رۆكی ئاژانسی پاراستن و زانیاری-زانیاریی هه‌رێم، دكتۆر سۆران جه‌مال تاھیر ئه‌ندامی مه‌كته‌بی سیاسی، سالار سه‌رحه‌د، ئه‌ندامی سه‌ركردایه‌تی  یاوه‌رییان ده‌كرد له‌لایه‌ن عومه‌ر سه‌ید عه‌لی، رێكخه‌ری گشتی بزوتنه‌وه‌ی گۆڕان و ژماره‌یه‌ك ھه‌ڵسوڕاو پێشوازیكران و له‌دانیشتنێكدا گفتوگۆكرا له‌باره‌ی ده‌رئه‌نجامه‌كانی ھه‌ڵبژاردن و  په‌یوه‌ندییه‌كانی یه‌كێتی و گۆڕان و خۆئاماده‌كردن بۆ ئه‌گه‌ر و پێشھاته‌كان.

بافڵ تاڵه‌بانی له‌ دیداره‌كه‌دا روونیكرده‌وه‌ یه‌كێتی، بزوتنه‌وه‌ی گۆڕان به‌ شه‌ریكی راسته‌قینه‌ی خۆی ده‌زانێت  و وه‌ك ھاوبه‌شێكی سیاسی گرنگ ده‌مانه‌وێت پێكه‌وه‌ ئاڕاسته‌ی سیاسی بگۆڕین و داكۆكی له‌مافه‌كانی گه‌له‌كه‌مان بكه‌ین. ووتیشی ده‌مانه‌وێت پێكه‌وه‌ پرۆژه‌ی نوێمان ھه‌بێت و به‌دیدێكی نوێوه‌ كاربكه‌ین بۆ كوردستانه‌كه‌مان.

ھاوسه‌رۆك راشیگه‌یاند: ئه‌و كورسیانه‌ی هاوپه‌یمانی كوردستان به‌ده‌ستیھێناوه‌ به‌رھه‌می ھه‌وڵی گۆڕان و یه‌كێتی بوو كه‌ به‌و ژماره‌ كاندیده‌وه‌ ده‌چێته‌ به‌غدا بۆ داكۆكیكردن له‌ به‌رنامه‌ی كوردستانیی ‌و زامنكردنی شایسته‌ دارایی ‌و سیاسییه‌كانی كوردستان به‌ ناوچه‌ دابڕاوه‌كانیشه‌وه‌، ئه‌ركی داكۆكیكردنی له‌ مافه‌كانی گه‌لی كوردستانی گرتۆته‌ ئه‌ستۆ ‌و به‌ یه‌كریزی هاوپه‌یمانی ‌له‌گه‌ڵ نوێنه‌رایه‌تی دیكه‌ی كورد ده‌توانین خۆشگوزه‌رانی زیاتر و ئارامی دابینبكه‌ین.

ھه‌ر له‌دیداره‌كه‌دا بافڵ تاڵه‌بانی روونیكرده‌وه‌، له‌ژیانی سیاسیدا حزب به‌زۆر ھه‌ورازو نشێودا ده‌ڕوات، به‌ڵام گرنگ ئه‌وه‌یه‌ یه‌كێتی و گۆڕان له‌چوارچێوه‌ی ھاوپه‌یمانی كوردستان به‌ره‌ و پرۆژه‌ی سیاسی ھه‌نگاوبنێین و خه‌ونی كاك نه‌وشیروان  و سه‌رۆك مام جه‌لال جێبه‌جێبكه‌ین بۆ گۆڕینی سیسته‌می سیاسی و  پرۆژه‌ی ھاوبه‌شیشمان ھه‌بێت بۆ چاكسازی و زیاتر خزمه‌تكردنی خه‌ڵك و گۆڕانكاریی ریشه‌یی له‌ ئیداره‌دان، به‌ڕێوه‌بردن، چاره‌سه‌ركردنی كه‌موكوڕییه‌كان، گله‌یی و ره‌خنه‌كانی كۆمه‌ڵانی خه‌ڵكیش به‌ھه‌ند وه‌ربگرین و بیكه‌ینه‌ ده‌ستمایه‌ی سه‌ركه‌وتنی داھاتوومان.

ھاوسه‌رۆك دووپاتیشكرده‌وه‌، له‌گه‌ڵ براكانیان له‌ گۆڕان پێكه‌وه‌ ده‌مێننه‌وه‌ و كار بۆ ئاینده‌یه‌كی گه‌شتر ده‌كه‌ن.

PUKmedia تایبه‌ت