قوباد تاڵه‌بانی: زانایانی ئاینی به‌درێژایی مێژوو سه‌رچاوه‌ی شانازی بوون

قوباد تاڵه‌بانی جێگری سه‌رۆكی ئه‌نجومه‌نی وه‌زیران له‌بروسكه‌یه‌كدا پیرۆزبایی ساڵیادی دامه‌زراندنی یه‌كێتی زانایانی ئاینی ئیسلامی كوردستان ده‌كات.

ده‌قی بروسكه‌كه‌...
به‌ڕێزان سه‌رۆك و ئه‌ندامانی مه‌كته‌بی ته‌نفیزی یه‌كێتی زانایانی ئاینی ئیسلامی كوردستان

به‌بۆنه‌ی ساڵیادی دامه‌زراندنی یه‌كێتی زانایانی ئاینی ئیسلامی كوردستانه‌وه‌ گه‌رمترین پیرۆزبایی له‌ئێوه‌ و ته‌واوی زانایانی ئاینی كوردستان ده‌كه‌م. 

زانایانی ئاینی به‌درێژایی مێژوو سه‌رچاوه‌ی شانازی بوون بۆ گه‌له‌كه‌مان به‌هۆی رۆڵه‌ ئه‌رێنییه‌كانیان له‌چاكه‌ی گشتی و ئامۆژگاریكردنی تاكه‌كانی كۆمه‌ڵ، هیوادارم به‌رده‌وام بن له‌بڵاوكردنه‌وه‌ی په‌یامی لێبوورده‌یی و پێكه‌وه‌ژیانی ئاشتیانه‌ و له‌ڕێی په‌یامه‌كانتانه‌وه‌ كاربكه‌ن بۆ بنیاتنانی بیری نیشتمانی و نه‌ته‌وه‌یی و رێگری كردن له‌گه‌شه‌كردنی بیری توندڕه‌ویی له‌كوردستان.

له‌كاتێكدا پیرۆزبایی ئه‌م یاده‌تان لێ ده‌كه‌ین كه‌ گه‌له‌كه‌مان به‌ره‌و پرۆسه‌یه‌كی چاره‌نوسساز هه‌نگاو ده‌نێت، له‌ئێوه‌ ده‌خوازین وه‌ك هه‌میشه‌ رۆڵی خۆتان ببینن بۆ هۆشیاركردنه‌وه‌ی كۆمه‌ڵ و هاندانیان بۆ به‌شداریكردن له‌پرۆسه‌ی هه‌ڵبژاردن به‌جۆرێك كه‌ به‌خێر و خۆشی میلله‌ته‌كه‌مان بكه‌وێته‌وه‌.
ئیتر ھه‌ر شادو سه‌ربه‌رزو سه‌ركه‌وتوبن.

قوباد تاڵه‌بانی 
جێگری سه‌رۆكی ئه‌نجومه‌نی وه‌زیران

PUKmedia تایبه‌ت