قه‌زای خه‌بات.. داوای كۆنتڕۆڵكردنی دیارده‌ی چه‌كداری ده‌كرێت

دوای رووداوی شه‌روپێكدادان له‌ نێوان دوو بنه‌ماڵه‌ له‌ قه‌زای خه‌باتی سه‌ر به‌ پارێزگای هه‌ولێر، لێپرسراوی كۆمیته‌ی خه‌باتی یه‌كێتی نیشتیمانی كوردستان بوونی دیارده‌ی چه‌كداری به‌هۆكاری زۆری روودانی كێشه‌كۆمه‌ڵایه‌تیه‌كان داده‌نێت و رایده‌گه‌یه‌نێت به‌شێكی زۆری خه‌ڵكی سنووره‌كه‌ له‌ ڕیزی دامه‌زراوه‌ سه‌ربازی و ئه‌منیه‌كانن و چه‌كیان به‌ده‌سته‌وه‌یه‌. ئاماژه‌به‌وه‌ش ده‌كه‌ت قه‌زای خه‌بات ناوچه‌یه‌كی گشتیاری و بازرگانییه‌، له‌گه‌ڵ بوونی هه‌ر پشێویه‌ك كاریگه‌ری له‌سه‌ر ژیانی هاوڵاتیان ده‌بێت.

 مه‌حه‌مه‌د عه‌لی لێپرسراوی كۆمیته‌ی خه‌بات  به‌ PUKmedia ی راگه‌یاند: رووداوی ئه‌مجاره‌ی نێوان دوو بنه‌ماڵه‌ له‌ قه‌زای خه‌بات جێگای نیگه‌رانی هه‌موولایه‌كه‌، كه‌ زۆرجار له‌سه‌ر کێشه‌ی بچووك چه‌ك به‌كارده‌هێندرێ، ئێستاش تاراده‌یه‌ك بارودۆخی قه‌زاكه‌ ئارام بۆته‌وه‌.

وتیشی: هۆكاری زۆری كێشه‌ی كۆمه‌ڵایه‌تی بۆ پێكهاته‌ی قه‌زای خه‌بات ده‌گه‌رێته‌وه‌ كه‌  له‌ شوێنه‌كانی تر جیاوازه‌، ئه‌ویش به‌هۆی بوونی چه‌ندین عه‌شیره‌ت و خه‌ڵكی ناوچه‌ جیاوازه‌كان، كه‌ كاتی خۆی  له‌گه‌ل تێكچوونی گونده‌ و ناوچه‌ سنوریه‌كان روویان له‌و قه‌زایه‌ كردووه‌.

روونیشیكرده‌وه‌: ئێستاش به‌شی زۆری خه‌ڵكی ئه‌م سنووره‌ له‌ دام وده‌زگا سه‌ربازی و ئه‌منیه‌كانی حكومه‌ت  كارمه‌ندن و ده‌وام ده‌كه‌ن، بۆیه‌ له‌كاتی دروستبوونی بوونی كێشه‌یه‌كی كۆمه‌ڵایه‌تی چه‌ك به‌كارده‌هێندرێت، زۆرجاریش  قوربانی لێده‌كه‌وێته‌وه‌.

ئاماژه‌ی به‌وه‌شكرد: ئێمه‌ وه‌ك لایه‌نێكی سه‌ره‌كی له‌ قه‌زای خه‌بات ده‌خوزاین حكومه‌ت  كۆنتڕۆڵی ئه‌و بارودۆخه‌ بكات، رێگانه‌دا كێشه‌ی له‌و جۆره‌ دووباره‌ بێته‌وه‌، كه‌ بۆته‌ هۆی دروستبوونی ترس و دڵه‌راوكێ.
لێپرسراوی كۆمیته‌ی خه‌بات راشیگه‌یاند: قه‌زای خه‌بات ناوچه‌كی ستراتیجیه‌ كه‌وتۆته‌ نێوان سێ پارێزگا،  ئه‌وانیش هه‌ولێر و دهۆك و موسڵه‌، له‌گه‌ڵ بوونی زێی گه‌وره‌، به‌ناوچه‌كی گه‌شتیاری و بازرگانی داده‌ندرێ، بۆیه‌ روودانی كێشه‌و شه‌ڕوپێكدادان كاریگه‌ری له‌سه‌ر ژیان و گوزه‌رانی خه‌ڵكی  ئه‌و سنوره‌ ده‌بێت.

PUKmedia ته‌ها عه‌بدوڵڵا – هه‌ولێر