سەرۆك كۆمار:یەكێتی ئەوروپا لەبەرەنگاربوونەوەی تیرۆرو گەندەڵی هاوكاری عیراق بێت

سەرۆك كۆمار رایگەیاند: عیراق پەرۆشی بەھێزكردنی پەیوەندییەكانییەتی لەگەڵ یەكێتی ئەوروپا بەتایبەتی رووەو بەرەنگاربوونەوەی تیرۆرو گەندەڵی و كەمكردنەوەی  بارگرژییەكانی ناوچەكە.

د.بەرھەم ساڵح، سەرۆك كۆماری عیراق ئێوارەی ئەمڕۆ 6ی ئەیلولی 2021 پێشوازیكرد لە جۆزێف بۆرێل، بەرپرسی سیاسەتی دەرەوەی یەكێتیی ئەوروپا.

لەو دیدارەدا باس لەپەیوەندییە هاوبەشەكانی نێوان عیراق و یەكێتی ئەوروپا كراو جەختكرایەوە لەگرنگی پتەوكردن و پەرەپێدانی پەیوەندییەكان لەبوارە جیاجیاكاندا، ھەروەھا بەگرنگییەوە ئاماژە كرا بەپێشكەشكردنی پشتیوانی یەكێتیی ئەوروپا بە عیراق، بەتایبەتی لە بوارەكانی سیاسەت و ئاسایش و ھاوكارییە مرۆییەكان و ئابووری و پرۆژە خزمەتگوزاییەكان و دووبارە بونیادنانەوەی عیراق.

ھەر لەدیدارەكەدا سەرۆك كۆمار رایگەیاند: عیراق پەرۆشی پتەوكردنی پەیوەندییەكانییەتی لەگەڵ یەكێتی ئەوروپا بۆ سوود وەرگرت لەئەزموونی ئەوروپا لەبوارە جۆراوجۆرەكاندا، ھاوكات ئاماژەیكرد بەگرنگی بەھێزكردنی ھاریكاری لەپێناو چارەسەركردنی كێشەكان و كەمكردنەوەی بارگرژییەكانی ناوچەكە و كۆتای ھێنان بە قەیرانەكان و ھێنانەكایەوەی ئاشتی و پتەوكردنی ھەماھەنگی ئابووری و بازرگانی، ھەروەھا راشیگەیاند بۆ ھێنانەدی ئەو ئامانجانە پێویستە زامنی ئاسایش و ئارامی عێراق بكرێت.

لە بەشێكی دیكەی دیدارەكەدا سەرۆك كۆمار جەختیكردەوە لەگرنگی بەھێزكردنی هەماهەنگی نێوان عیراق و یەكێتیی ئەوروپا بەئاڕاستەی ریشەكێشكردنی تیرۆر لە سەرتاسەری ناوچەكەدا، ھەروەھا دووپاتیكردەوە لەپێویستی پشتیوانیكردن لەگەشەپێدانی ئابووری و یارمەتیدانی عیراق بۆ رووبەڕووبوونەوەی گەندەڵی و گەڕاندنەوەی پارە بە تاڵانبراوەكان بۆ دەرەوەی وڵات و پێشكەشكردنی ھاوكاری بۆ بەرنگاربوونەوەی قەیرانی گۆڕانی كەشوھەواو پاراستنی ژینگە، چونكە ھەموو ئەمانە ئاستەنگی گەورەن كە رووبەڕووبووی عیراق و ناوچەكە و جیھان بووەتەوە.

لای خۆیەوە جۆزێف بۆرێل، جەختی لە پابەندبوونی یەكێتی ئەوروپا كردەوە بۆ پشتگیری و یارمەتیدانی عیراق لەبوارە جیاجیاكانداو پشتیوانی لە پاراستنی ئاسایش و سەقامگیری و سەروەریی عیراق، ھەروەھا پێشكەوتنەكانی عیراقی بەرزنرخاند، بەتایبەتی لەرووی پەرەپێدانی پەیوەندییە ھاوسەنگەكانی لەپێناو كەمكردنەوەی بارگرژییەكانی ناوچەكە.

PUKmedia