سه‌رۆك كۆمار: به‌گرنگییه‌وه‌ ده‌روانینه‌ په‌یوه‌ندییه‌ هاوسه‌نگه‌كان له‌گه‌ڵ وڵاتان

د. به‌رهه‌م ساڵح، سه‌رۆك كۆماری عیراق ئه‌مڕۆ دووشه‌ممه‌ 6 ی ئه‌یلولی 2021 له‌ كۆشكی سه‌لام له‌ به‌غدا، كارنامه‌ی ھه‌ر یه‌ك ئامدی فه‌زلول باری، باڵیۆزی به‌نگلادیش و رادۆ ئاوكتافیا دووبری، باڵیۆزی رۆمانیا و ئه‌حمه‌د ئه‌مجه‌د عه‌لی، باڵیۆزی پاكستان و پراشانت بیسی، باڵیۆزی ھندستان و جۆناس لۆفێن، باڵیۆزی سوید و پیدرۆ مارتینس- ئه‌ڤیال مارتین، باڵیۆزی ئیسپانیا و حه‌سه‌ن محه‌مه‌د ئه‌علیات، باڵیۆزی موریتانیا و ماتی لاسیلا، باڵیۆزی فنله‌ندا و فێلا فارێولا، باڵیۆزی یه‌كێتی ئه‌وروپا و ئه‌یریك شۆفالیه‌، باڵیۆزی فه‌ره‌نسای وه‌رگرت.

له‌میانی پێشوازیكردنی له‌ باڵیۆزی نوێی وڵاتان به‌جیا سه‌رۆك كۆمار جه‌ختیكرده‌وه‌ كه‌ عیراق به‌گرنگییه‌وه‌ ده‌روانێته‌ په‌یوه‌ندییه‌ هاوسه‌نگه‌كان له‌گه‌ڵ وڵاتان له‌سه‌ر بنه‌مای پته‌وكردنی هه‌ماهه‌نگی سیاسی و ئابووری و بازرگانی و ده‌رفه‌تی وه‌به‌رهێنان و پشتیوانی له‌ ھاریكاری نێوده‌وڵه‌تی و هه‌رێمایه‌تی بۆ كه‌مكردنه‌وه‌ی بارگرژییه‌كان و ھێنانه‌كایه‌وه‌ی ئاشتی له‌ ته‌واوی ناوچه‌كه‌دا.

له‌ دیداره‌كه‌دا سه‌رۆك به‌رھه‌م دووپاتیكرده‌وه‌ له‌گرنگی ھه‌ماھه‌نگی نێوده‌وڵه‌تی و هه‌رێمایه‌تی بۆ رووبه‌ڕووبوونه‌وه‌ی ئاسته‌نگه‌ جۆراوجۆره‌كانی جیهان، به‌تایبه‌تی ریشه‌كێشكردنی تیرۆر و چاره‌سه‌ركردنی كێشه‌ ئابوورییه‌كان و قه‌یرانی ته‌ندروستی و به‌ره‌نگاربوونه‌وه‌ی گۆڕانی كه‌شوھه‌وا و پاراستنی ژینگه‌.

ھه‌ر له‌ دیداركه‌دا سه‌رۆك كۆمار ھیوای سه‌ركه‌وتنی بۆ باڵیۆزانی نوێ خواست له‌جێبه‌جێكردنی ئه‌ركه‌ نوێیه‌كانیان، به‌جۆرێك ببێته‌ مایه‌ی به‌ھێزكردنی په‌یوه‌ندی دۆستانه‌ و ھه‌ماھه‌نگی نێوان عیراق و وڵاته‌كانیان.

له‌لای خۆیانه‌وه‌ باڵیۆزی وڵاتان سوپاس و پێزانینی خۆیان ئاڕاسته‌ی سه‌رۆك كۆمار كرد، ھاوكات دووپاتیانكرده‌وه‌ له‌پێویستی په‌ره‌پێدانی په‌یوه‌ندییه‌كان له‌گه‌ڵ عیراق له‌بواره‌ جیاجیاكان، له‌پێناو پته‌وكردنی په‌یوه‌ندییه‌ هاوبه‌شه‌كان.

PUKmedia