riklam

ماڵئاوا نه‌وال سه‌عداوی، پیره‌ته‌واری رووسووری په‌لك سپی

ژنان‌ 10:19 AM - 2021-03-22
.

.

به‌داخه‌وه‌، رۆژی یه‌كشه‌ممه‌ رێكه‌وتی 21ی ئازاری 2021، ژنه‌ تێكۆشه‌ر و خه‌باتكاری سه‌رسه‌ختی مافه‌كانی مرۆڤ به‌گشتی و مافی ژنان به‌ تایبه‌تی، نه‌وال سه‌عداویی بیرمه‌ند كۆچی دوایی كرد.

نه‌وال سه‌عداوی، ئه‌گه‌رچی خۆی پزیشك بوو، به‌ڵام ژیانی خۆی و به‌شی هه‌ره‌زۆری به‌رهه‌مه‌كانی، كه‌ به‌ری ره‌نج و بیركردنه‌وه‌ و تێفكرینی بوون، بۆ دۆزی مافه‌كانی مرۆڤ و سڕینه‌وه‌ی جیاوازیی نێوان نێر و مێ‌ ته‌رخانكرد، بۆیه‌ له‌ دنیای عه‌ره‌بی و له‌ناو رۆشنبیرانی كورد و جیهانیشدا، وه‌ك ژنێكی نووسه‌ر و توێژه‌ر و به‌رگریكاری مافی ژنان ناسراوه‌. خاوه‌نی ده‌یان كتێبه‌ له‌ بواره‌كانی فیكر و توێژینه‌وه‌ و رۆمان و ئه‌ده‌بیاتدا كه‌ هه‌ریه‌كه‌یان بۆخۆی گه‌وهه‌رێكی دانسقه‌یه‌ و ده‌ربڕینی هزری قووڵی نووسه‌ره‌كه‌یه‌تی، ئه‌و نووسه‌ره‌ی كه‌ به‌ نه‌وه‌د ساڵ ته‌مه‌نه‌وه‌ وه‌ك ئه‌ستێره‌یه‌كی پرشنگدار به‌ ئاسمانی بیری پێشكه‌وتنخوازی و وه‌ك دژه‌باوێكی مه‌رد و بوێر له‌كایه‌تی بزووتنه‌وه‌ی یه‌كسانیخوازیی مرۆڤایه‌تیدا ده‌مێنێته‌وه‌.

كۆچی دوایی نه‌وال سه‌عداوی، كۆستی هه‌موو ئازادیخوازێكه‌ و هه‌موان دڵته‌نگ و به‌داخ ده‌كات، به‌ڵام ناوی هه‌روا به‌ نه‌مریی ده‌مێنێته‌وه‌. به‌رهه‌مه‌كانی، وه‌ك چۆن له‌ رابوردوودا سه‌رچاوه‌ی ده‌یان توێژینه‌وه‌ و شرۆڤه‌ی بنكۆڵكاریی بوون، له‌ئێستا و داهاتوویشدا هه‌روا ده‌مێننه‌وه‌ و ناكرێت له‌ یٔه‌ده‌بیاتی كۆمه‌ڵایه‌تیی عه‌ره‌ب و ناوچه‌كه‌دا باس له‌ یه‌كسانیی جێنده‌ریی بكرێت به‌بێ‌ گه‌ڕانه‌وه‌ بۆ نه‌وال سه‌عداوی.

چه‌ند ساڵێك له‌مه‌وبه‌ر، ئه‌م ژنه‌ هه‌ڵكه‌وتووه‌ی میسر و عه‌ره‌ب، سه‌ردانی كوردستان-یشی كرد و هاته‌ شاری سلێمانی، شاری بیر و پایته‌ختی رۆشنبیریی ئه‌م به‌شه‌ ئازاده‌ی نیشتمانه‌كه‌مان، به‌وه‌یش ئه‌وه‌نده‌ی تر له‌ رۆشنبیرانی كورد نزیكتر بووه‌وه‌، بۆیه‌ دڵنیام به‌شێكی زۆری رووناكبیر و توێژه‌رانی گه‌له‌كه‌مان بۆی به‌داخن.

ماڵئاوا پیره‌ته‌واری رووسووری په‌لك سپی، دڵنیابه‌ كاروانی بیری مرۆڤدۆستانه‌ی پێشكه‌وتنخوازییت هه‌ر ده‌گاته‌ مه‌نزڵ.


گه‌لاوێژ


PUKmedia تایبه‌ت

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket