پانێڵێك بۆ سێ شایەتحاڵی كيميابارانی هەڵەبجە رێكخرا

.

لەیادی كارەساتی هەڵەبجەدا سێ فۆتۆگرافەری بە ڕەچەڵەك ئێرانی ئەزمونی كاری میدیایی و فۆتۆگرافی خۆیان لە جەنگی عێراق -ئێران و كیمیابارانی هەڵەبجەدا بۆ ژمارەیەك لە فۆتۆگرافەرانی شاری سلێمانی خستەڕوو. 

لە سیمینارێكی هاوبەشی سەندیكای رۆژنامەنوسانی كوردستان -لقی سلێمانی  و رێكخراوی گەشەپێدانی مەدەنیەت ، هەریەك  لە وێنەگران ” مورتەزا عەینەدین شەعبانی ،سەعید محسین سادقی و عەلی ئەسغەر فەرەیدونی” لە هۆڵی كۆنفرانسی رێكخراوی CDO لەرێی گفتوگۆ و داتا شۆوە باسیان لە ئەزمونی خۆیان بە تایبەتیی و كەسانی فۆتۆگرافەر بەگشتیی كرد لەبەرەكانی جەنگدا، كە ئەوكاتەی سەربازانی شەڕ خۆیان دەپارێزن و دەچنەوە سەنگەرەكان ،دەبێت  فۆتۆگرافەران بێ ترس ڕاكەن و بچنە بەرەكانی پێشەوەی جەنگ بۆ گواستنەوەی راستییەكان بۆ خەڵك ، ئەگەر ناشرین و دوور لە مرۆڤایەتیش بێت .

 دواتر فۆتۆگرافەرە ئێرانییەكان جگە لە پیشەی میدیایی خۆیان ، وەك شاهید حاڵی شەڕی عێراق -ئێران و كیمیابارانی هەڵەبجە ، ژمارەیەك وێنەی نەبینراو و درەنگ بڵاوكراوەیان پیشانی ئامادەبووان دا كە لەماوەی ٣٠ ساڵی كاركردنیان ،لە ٧٠ بەرەی جەنگ و بەتایبەت ئەو دوو كارەساتەدا تۆماریان كردووەو ژمارەیەكی زۆر لە فۆتۆكانیان لەلایەن رێكخراوەكانی یونسكۆ و خاچی سوری نێودەوڵەتییەوە خەڵات كراون و وەكو وێنەی ساڵ هەڵبژێردراون .

لەبەشێكی تری سیمینارەكەدا فۆتۆگرافەرەكان ”وەك سێ بەركەوتەی چەكی كیمیایی ” باسی بارودۆخی ناو شاری هەڵەبجەیان كرد لە رۆژی ١٩٨٨/٣/١٦دا مردن و خنكانی چەندین ژن و مناڵ و پیریان بەچاوی خۆیان بینیوەو جگە لە ئەركی وێنەگرتن و تۆماركردنی ئەو كارەساتە نامرۆڤانە ، هەوڵی رزگاركردنی خەڵكی هەڵەبجەیان داوە و داوایان كرد شاری هەڵەبجە بكرێتە سیمبولی ئاشتی لە جیهاندا.

PUKmedia ڤینۆس تەوفیق