هەرێم د کارناما سودانیدا

پەڕلەمانتار ئیمان ئامێدی

نووسینی.. پەڕلەمانتار ئیمان ئامێدی
پشتی دەربازبوونا زێدەتر ژ ساڵەکێ بسەر هەلبژاردنێن جڤاتا نوونەرێن عیراقێدا و کێشمەکێشەکا مشتی ئالۆزی و قەیران و هەڤڕکیێن دژوار و خویناوی، ل دووماهیێ باوەری ب کابینا محەمەد شەیاع سودانی هاتەدان و دهێتە پێشبینیکرن عیراق دەربازی قۆناغەکا نووی ببیت، ل گورەی بەرنامە و کارناما حکومەتێ ئارامی و ئاڤەدانی و گوهڕینکاریێن گرنگ و هەمەلایەن بەرجەستە ببن. 
کارناما حکومەتا سودانی ئەوا پێشکێشی جڤاتا نوونەران کری، چەندین خالێن گرنگ بخۆڤە دگریت وەکو تیور دخزمەتا خەلکێ عیراقێدانە، یا گرنگتر ئەو خال و بڕگەنە یێن پەیوەندی ب کێشەیێن هەلاویستی ڤە هەی دناڤبەرا هەرێما کوردستانێ و حکومەتا فیدراڵیدا، ئەگەر بهێنە جێبەجێکرن دێ وەڵات بگشتی بەرەڤ ئاسویەکێ دی چیت. 
بەرهنگارییا گەندەلیێ و نەهێلانا بێکاریێ و دابینکرنا دەلیڤێن کاری، هاریکارییا خەلکێ دەست کورت و کێم دەرامەت، گرنگیدان ب کەرتێن دارایی و ئابووری و چاندن و چارەسەرکرنا گرفتێن خزمەتگوزاری، ژ ئەرک و کارێن سەرەکیێن حکومەتا سودانی نە و ئەڤ پرسە داخوازیێن سەرەکیێن خەلکێ عیراقێ نە.
دەربارێ پرس و کێشەیێن هەرێمێ و حکومەتا ناڤەندی دکارناما کابینا خودا محەمەد سودانی پێداگیری کرییە لسەر چارەسەرکرنا وان کێشە و گرفتان ل گورەی ماددە و بنەمایێن دەستووری، وەکو ئەکتیڤکرنا لیژنا جێبەجێکرنا مەددێ (140) و دابینکرنا پارێ پێدڤی بۆ قەرەبووکرنا زیانڤێکەتیێن دکەڤنە ژێر وی بەندێ دەستووری و ئەو پێنگاڤە پشتی دەستبکاربوونا حکومەتێ ب ماوێ هەیڤەکێ بهێتە هاڤێتن. کابینا نووی یا پێگیرە دماوێ شەش هەیڤاندا یاسا جڤاتا فیدڕاڵ داڕێژیت، دیسان دشەش هەیڤاندا یاسا نەفت و غازێ داڕێژیت و بێخیتە دوارێ جێبەجێکرنێدا، ئەنجامدانا هەلبژاردنان ل پارێزگەها کەرکوک ل گورەی یاسا هەلبژاردنێن جڤاتێن پارێزگەهان و حکومەتا فیدراڵ یا پێگیرە ب پاراستنا ئارامی و ئاسایش و سەروەریا هەرێما کوردستانێ.
هەڵوەشاندنا سەرجەم بڕیارێن (جڤاتا سەرکردایەتییا شورەشێ) یا حزبا بەعس ژناڤچووی و دارشتن و جێبەجێکرنا زنجیرەکا یاسایان، ژوانا 
یاسا شەراکەتێ دناڤبەرا هەردوو کەرتێن گشتی و تایبەت و یاسا ڕێککەفتنێن گشتی و یاسا خانەنشینیا گشتی و ئاسایشا کۆمەڵایەتی و هەموارکرنا یاسایێن هەلبژاردنان و کارتا نیشتمانی، نەخاسم ماددێ (26) ژ وێ یاسایێ کو یێ تایبەتە بو گوهڕینا ئایینی.
دیسان ل گورەی کارناما هاتییە پێشکێشکرن، کابینە هاتییە پێگیرکرن بو هاریکاریکرنا کۆمسیۆنا بلندا سەربخۆیا هەلبژاردنان و ئەنجامدانا هەلبژاردنێن جڤاتا نوونەران و جڤاتێن پارێزگەهان.
ل گورەی دیتن و بۆچوونا من کارناما حکومەتا سودانی هەتا ڕادەکی یا پڕ و گونجایە، لڤێرێ پێدڤییە فڕاکسیۆن و لایەنێن کوردی ب ئێک هەڵویست و بەرنامە کاربکەن پێخەمەت پڕاکتیزەکرنا کارناما سودانی و حکومەتا وی، بتایبەتی بەند و ماددێن گرێدای ب پرسێن چارەنڤیسسازێن هەرێما کوردستانێ ڤە، ئەگەر سودانی و هەڤاڵبەند و پشتەڤانێن وی دڕژد و ڕاستگۆ بن، پێدڤییە لایەنێ کوردی و نەخاسم ئێکەتی نیشتمانی کوردستان بەرهەڤیێن خۆ بکەت بو ئامادەکرنا تیم و گروپێن شارەزا دبوارێن داڕشتنا پڕۆژە یاسایان دا و مفای ژڤێ قۆناغا نووی وەربگریت پێخەمەت مسوگەرکرنا دەستکەفتێن زێدەتر و بەرەڤ پێشڤەبرنا هەرێما کوردستانێ.

PUKMEDIA