riklam

شه‌نگال و جینۆساید

بیروڕا 04:15 PM - 2022-10-10
تەلار لەتیف

تەلار لەتیف

نوسینی: تەلار لەتیف

ڕۆژی 3/8/2014 كاتێك شه‌نگال و ناوچه‌كانی‌ ده‌وروبه‌ری‌ بۆ ماوه‌یه‌ك له‌ لایه‌ن هێزی‌ تیرۆریستی‌ داعشه‌وه‌ داگیر كرا، ڕۆژێكی‌ ڕه‌شی‌ پڕئازاری‌ له‌بیرنه‌كراوه‌ نه‌ك ته‌نها بۆ كوردستانیان، به‌ڵكو بۆ هه‌موو جیهان و ئازادیخواز و مرۆڤدۆستێك. له‌و ڕۆژه‌دا داعش ته‌نها به‌ كوشتن و ڕفاندنی خه‌ڵكی‌ ناوچه‌كه‌ نه‌وه‌ستان، به‌ڵكو كه‌وتنه‌ بازرگانیكردن و كڕین و فرۆشتن به‌ كچ و ژنانی‌ ئێزدییه‌وه‌.

ژنانی‌ ئێزدی‌ هاوشێوه‌ی‌ هه‌موو كاره‌سات و جه‌نگێك قوربانیی‌ یه‌كه‌م بوون له‌ ڕووی‌ جه‌سته‌یی و ده‌رونییه‌وه‌، چونكه‌ جگه‌ له‌ له‌ده‌ستدانی‌ بر او هاوسه‌ر و كه‌سه‌ ئازیزه‌كانیان و ئاواره‌بوونی‌ خۆیان و خێزانه‌كانیان له ‌هه‌مانكاتدا وه‌كو كاڵایه‌ك بازرگانییان پێکرا و ده‌ستدرێژیی‌ سێكسیشیان کرایە سەر. كه ‌هه‌موو ئه‌وانه‌ش تاوانی نێوده‌وڵه‌تیی‌ گه‌وره‌ن و تاوه‌كو ئێستا هیچ هه‌نگاوێكی‌ ئه‌وتۆی‌ پێویست نه‌نراوه‌ بۆ به‌جینۆسایدناساندنی‌ ئه‌و تاوانه‌ له‌سه‌ر ئاستی‌ كۆمه‌ڵگای‌ نێوده‌وڵه‌تی‌، له‌پاڵ قه‌ره‌بووكردنه‌وه‌یان به‌ شێوازێكی‌ ماددی‌ و مه‌عنه‌وی‌.

ڕاسته‌ به‌ جینۆسایدناساندنی‌ ئه‌و كاره‌ساته‌ له‌ لایه‌ن په‌رله‌مانی‌ هه‌ندێك وڵاتانی‌ وه‌ك (به‌لجیكا و هۆڵه‌ندا) هه‌نگاوێكی‌ باشه‌، به‌ڵام تا ئێستا ژماره‌یه‌كی‌ زۆری‌ ئێزدییه‌كان به ‌تایبه‌تی‌ له ‌كچان و ژنان له ‌ده‌ستی‌ (داعش)دان و بازرگانییان پێوه‌ده‌كرێت، بۆیه‌ پێویسته‌ هه‌وڵ و هه‌نگاوه‌كان چ له‌ ناوخۆ یان له‌سه‌ر ئاستی‌ ده‌ره‌وه‌ زیاتر و خێراتر بكرێن.

پێویسته‌ هه‌ر چی‌ زووه‌ ده‌رئه‌نجامی‌ لیژنه‌ی‌ لێكۆڵینه‌وه‌ له‌و كاره‌ساته‌ بۆ ڕای‌ گشتی‌ بخرێته‌ ڕوو بۆ ئه‌وه‌ی‌ سه‌رجه‌م ئه‌و كه‌س و لایه‌نانه‌ی‌ به‌ جۆرێك له‌ جۆره‌كان بوونه‌ هۆكاری‌ ڕوودانی‌ ئه‌و كاره‌ساته‌، به‌ سزا یاسایی بگه‌یه‌نرێن. ئه‌مه‌ جگه‌ له‌وه‌ی‌ كه‌ پێویسته‌ هه‌وڵی‌ جدی‌ بنرێت بۆ ڕزگاركردنی‌ ئه‌و خوشك و برا ئێزدی‌ و گشت ئه‌وانه‌ی‌ له ‌ژێر چنگی‌ ڕه‌شی‌ داعش ماون ڕزگار بكرێن و ئه‌وانه‌شی‌ ڕزگاركراون هه‌وڵی‌ چاره‌سه‌ركردنی‌ كێشه‌كانیان بدرێت كه‌ تووشیان بووه‌ له‌ ئه‌نجامی‌ ئه‌و ده‌ستدرێژییه‌ جه‌سته‌یی و ده‌روونییانه‌ی‌ به‌سه‌ریان داهاتووه‌. له‌ هه‌مانكاتدا پێویسته‌ هه‌نگاوی‌ خێرا بنرێت بۆ ئاوه‌دانكردنه‌وه‌ی‌ شه‌نگال و ده‌وروبه‌ری‌ به‌ جۆرێك چیدیكه‌ ئاواره‌كان له‌ كه‌مپدا نه‌مێننه‌وه‌ و خۆویستانه‌ بگه‌ڕێنه‌وه‌ زێدی‌ باب و باپیرانیان.

هه‌موو ئه‌و ئه‌رك و به‌رپرسیارێتییانه‌ی‌ سه‌ره‌وه‌ به‌رامبه‌ر خوشك و برا ئێزدییه‌كانمان وه‌كو چۆن به‌رپرسیارێتیی‌ حكومه‌تی‌ عێراقییه‌ له‌ هه‌مانكاتدا و به‌ هه‌مان ڕێژه ‌و زیاتریش به‌رپرسیارێتیی‌ حكومه‌تی‌ هه‌رێمی‌ كوردستانیشه‌ كه‌ پێویسته‌ له ‌هه‌موو ئاسته‌كان هه‌نگاوی‌ خێرا بنێت بۆ به ‌جینۆسایدناساندنی‌ ئه‌و كاره‌ساته‌ و ئاوه‌دانكردنه‌وی‌ ناوچه‌كه‌ و ده‌رچواندنی یاسایه‌ك بۆ پاراستنی‌ مافی زیان لێكه‌وتووان و كه‌سوكاری‌ قوربانییان و زامنكردنی‌ ژیان و داهاتووی‌ خوشك و برا ئێزدییه‌كانمان به ‌جۆرێك ڕێگری‌ بكات له‌ دووباره‌بوونه‌وه‌ی‌ هه‌ر كاره‌سات و جینۆسایدێكی‌ دیكه‌.

PUKMEDIA

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket