riklam

یاد و دیدار و چەندین ئومێد

بیروڕا 07:49 PM - 2022-05-27

ئێکەتی نیشتمانی کوردستان دسەردەمەکێ دژوار و قۆناغەکا سەختا تێکۆشانێدا ژدایکبوو، دوی سەردەمێ بێ ئومێدیێدا، دامەزراندنا ئێکەتی ب ڕابەراتییا سەرۆک مام جەلال و هیممەتا هەڤالێن وی یێن دامەزرینەر، شکەستن ب شکەستنێ ئینا، ل وی سەردەمی ئێکەتی هاتە دمەیدانا بزاڤا رزگاریخوازیا کوردیدا، دا بەرسڤا بسەدان پسیار و (بوچی) یا بدەت و بەرهنگاری داگیرکاری و هەموو جورێن ستەمێ ببیت کو بسەرێ گەلێ کوردستانێ دهاتن.
هەر ژ وی سەردەمی وهەتا ئەڤرۆ، کو ئێکەتی نیشتمانی (47) ساڵ ژتەمەنێ خۆیێ مشتی خەبات و قوربانیدان دەربازکرن، بهزاران ئەڤرازی و نشیڤی و ئاستەنگ بەزاندن، (47) ساڵێن تەمەنێ ئێکەتیێ دپڕبوون ژ هیڤی و ئومێد و بدەستڤەئینانا دەستکەفت و سەروەری و مسوگەرکرنا ماف و ئازادیان، دوریشم و لۆگۆیێ ئێکەتیێ، کو دەستەکێ هەلگرێ گول و گەنم (ژیان و جوانی)یە گروڤە لسەر وێ ڕاستیێ کو ئێکەتی هەمبێزا ئاراما سەرجەم تەخێن جڤاکی و مینبەرا ئازایا دیمۆکراسیخواز و ئازادیخوازا و داینەمۆیێ گوهرینکاری و خزمەت و خەباتێ یە.
ئەڤرۆ.. هەڤدەم دگەل یادا (47)مین ساڵڤەگەڕا دامەزراندنێ و (46)مین ساڵڕۆرا بەرپابوونا شۆڕەشا نووی، دیدارا گشتییا ئێکەتی نیشمانی کوردستان دهێتە سازکرن، ئەڤ دیدارە بسەدان هیڤی و ئومێدێن نووی و هەمەجور بخۆڤە دگریت، دەلیڤەکە گشت هەڤالێن بەشدار و لسەر هەموو ئاستەکی ڕاوبۆچوون و دید و پڕۆژێن خۆ بەرچاڤ بکەن و ببنە فاکتەرێن گوهڕینەکا نووی و پێشڤەچوونەکا باشتر بۆ ئێکەتی نیشتمانی دقۆناغێن داهاتیدا.
گرنگە پشتی یاد و دیدارێ، پێداچوونێن جددی دهەڵویست و هەڵسوکەوتێن ئێکەتیێدا بهێنەکرن، سیاسەت و ستراتیژیەتا ئێکەتی ل گورەی بەڕژەوەندیێن نەتەوی و نیشتمانی و ماف و داخوازیێن خەلکی بهێنە دارشتن و ئاراستەکرن، پشتی دیدارێ گەرەکە ئێکەتیەکا جودا بهێتە دیتن، حزبەکا ڕژد و خودان نێرینێن جیاواز و جهێ باوەریا جەماوەری و خەلکێ ئێکەتی بخۆ ژی.
پشتی دیدارێ گرنگە ئێکەتی شێوێ کار و ئەدائا خۆ لسەر ئاستێن حکومی و پەڕلەمانی (هەرێم و بەغدا) بەرەڤ باشتر ببەت، ل ئاستەکێ ئەکتیڤتر شوڕببیتە دناڤ خەلکیدا و ب زانین و شارەزابوون کێشە و گرفت و قەیرانێن سیاسی، ئابووری، جڤاکی، ئیداری ...هتد چارەسەر بکەت، گرنگە ئێکەتی هەوڵ بدەت بێ لایەنی و سەربخۆیا دەستهەڵاتێن یاسادانان و دادوەری و جێبەجێکار و دەستهەڵاتا چوارێ بپارێزیت و ژ ژێر ڕکێفا حزبایەتیێ دەربێخیت.
ئومێدەوارین ئەنجام و ڕاسپاردێن ژ دیدارێ دەردکەڤن ل ئاستێ مەزنی و پیرۆزیا یادا دامەزراندنێ بن و نە بتنێ ببنە حبرێ سەر کاغەزێ، بەلکو ببنە بناغێ ڤەژاندن و پاراستن و ئاڤاکرنا هەمەلایەنا جڤاک و تاکە کەس و نیشتمان و دەستهەڵاتێ.
پیرۆزە (47)مین ساڵڤەگەڕا دامەزراندنا (ی.ن.ک)
پیرۆزە (46)مین ساڵڕۆژا بەرپابوونا شۆڕەشا نووی
سەرکەفتی بیت دیدارا گشتی

PUKmedia پەرلەمانتار/ ئیمان ئامێدی

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket