وەسفی ناوێ فەقەت بۆ رێگای دوور دەستمایەكەیمان گەرەكە
بیروڕا 12:18 PM - 2022-04-25
ستران عەبدوڵڵا
لە پەیڕەوی ناوخۆی هیچ حزبێك و لە لائیحەی ئەندامێتی هیچ رەوتێكی تێكۆشاندا نە نووسراوە دەبێ هەڤاڵ و تێكۆشەر سۆزی دایكایەتی و خوشكایەتی و گیانی بەزەیی و دڵنەوایی تێكەڵی كاری خۆی بكاو بەشێك بێ لە رەفتارو گوفتاری . ئەمانە خەسڵەتی شەخسین و پەروەردەی مرۆڤەكانن كە مەعلومە خوای میهرەبانی بە هەموو كەسێكی نادات. مەگەر لە وێزە و تاقەتی وەسفیە بەنی وەیسی خوشكی ئێمەدا بێت.
تێكۆشەر ئەركێتی خەبات بكا و هەڤاڵیش هەر ئەوەی لێ داوا دەكرێ پەیڕەوی ئامانج و سیاسەتی حزبەكەی بكاو شیری حەڵاڵی خۆی بكاتە داوەری لەڕێ لانەدان و لاساری . ئەمما وای لێ زیاد بكا كە دائیمەن میهرەبانی خوشكانە و سۆزو بەزەیی دایكانە بكاتە هەویرو هەوێنی هەڤاڵێتی و تێكۆشانی سیاسیی بە زەبرو زبر ، ئەمە خەسڵەتی سەرباری وەسفیە خان و خەڵاتی ئەوە بۆ رەوتی دەیان ساڵەی بە ئازارو كۆششی بە ئارەق و تینی یەكێتی و شۆڕشە نوێیەكەی.
لە گەنجییەوە تا كەڵەكەكردنی گەنجینەیەك لە تێكۆشان و تۆمارێك لە هەڵوێست و هەوڵ و تەقەلای شۆرشگێرانە، ئەم ھەڤاڵەمان، ئەم خوشكە سەلارە، بە ناوزەدی نەمر مام جەلال ، هەر وای هێناو ھەرواش خەتمی كرد.
لە دەورانی خوێندكاری و چیرۆكی كەنشكێكی كۆڵانی مەزرەعەی خانەقین بۆ زانكۆ كە لەو درەنگانەی سەدەی بیستیشدا ژمارەی كچانی كورد لە خوێندنی باڵا زۆر نەبوون، تا پەیوەستبوونی بە خەباتی نهێنیپارێزی كۆمەڵە و تەتەری رێكخراوەیی یەكێتی ، تا تێكەڵبوونی بە خەباتی شاخ و ژیانی ئاوارەیی و ئینجا قۆناغی خەباتی ئاشكرای كوردستانی ئازاد، لە رێكخستنی حزبی و ژنان ، لە ھەموویانە مامۆستا وەسفیە هەمیشە ناوێك و دیمەنێك بووە لە قوربانیدان و پێشخستنی بەرژەوەندی و ئامانجی یەكێتی بەسەر ویست و نیازی شەخسیدا.
هەر یەكە لە هەڤاڵ و هاوڕێكانی لە یەكێتیدا كە تەنگانە و ھەروەھا خۆشی هەبووبێت ، وەسفیە خان بە سۆزو میهرەبانی بێدەنگانەی خۆی بەسەری كردونەتەوە وزەو ورەی پێداون. هەر یەك لە ئێمە یادگارێكی شیرینی وەفاداریی ئەم گوڵی نێو سەنگەری یەكێتیەی لەبیرە كە ھاوبەشی خەم و خولیای ھەڤاڵانە لای وی ئەولەویەت بووە. قەت بوغرا نەبوو و هەرگیزیش بە خەبات و پێشینەی سەروەری خۆیەوە نەدەنازی.
ئەو سەركردایەتی بوو لە ناو خەڵك نەك سەركردایەتی بێت بەسەر خەڵكەوە.
مامۆستا وەسفیە لە مامۆستایەتی مەتكەبەوە تا بەرپرسیارێتی مەكتەبی حزبایەتی، كە لە سەركردایەتیشدا مەكتەبی قوربانیدان و شەهادەتی بە نسیب بوو، هەریەك مامۆستا وەسفیە بوو: بێدەنگ و خاكەڕاو بە رەحم و بەزەیی.
«دایكی شەھیدان» لە تازێ و بەسەركردنەوەی كەسوكاری شەهیداندا، لەگەڵ ماڵی شەهیدانا، لەگەڵ خوشك و دایك و منداڵی شەهیدان فەرقت پێ نەدەكرد. مەگەر ئەوە نەبێ ئەدگاری شیرینی لە هەموو شوێنێ دیاربوو كە تێكەڵی فرمێسك و خەمێكی بە ئازاری ژیانی خۆی و ژیانی ژنانی كوردو مەینەتی میللەتەكەی دەبوو.
چونكە تا مرد لەو ئازارەی زۆر دیبوو، لە تەعریب و لە گوێزانەوە بۆ جنوب و لە ئاوارەیی و ئەنفال و لە بێ مروەتی سیاسەت تا تەنگژەی شەڕی دڕندانەی داعش كە زۆربەی رۆژگاری خولی لێپرسراوی مەكتەبی شەهیدانی تێكەڵی خەم و پەژارەی ئەو وێستگەیەی خەباتی گەلەكەمان و بێچارەیی گوزەرانی كەسوكاری شەهیدان بوو، لە زەمەنی بێ مووچەیی و بێ بودجەیی و دابڕانی كورد لەگەڵ بەغدا.
لەو ماوانەی دەگەیشتە تینی و قسەی دەكرد، قسەی رەوای ھەقی بۆ خەڵك و بۆ یەكێتی دەكرد. ھاواری ئەو ویژدانی زیندووی ھەموومان بوو ئەو دەمەی كە دەسكەوت و تۆڕی بەرژەوەندی شەخسی لەكەداری نەدەكرد. خۆمان بوو بە خاڵسی و خاسێتی و خاكێتی جارانمانەوە.
بیربكەینەوە، یەكێتی ئەگەر رۆژێك لێی بقەومێ كە رۆژی لێقەومانی زۆر دیووە و تێشی پەڕاندووە وتێشی دەپەرێنێ، دائیمەن ئەدگاری وەك وەسفیە بەنی وەیس و رەفتاری میهرەبانی بێ غلو غەشی وا لای كۆمەڵانی خەڵكی كوردستان شەفاعەتی بۆ دەكاو تینوتاوی بەردەوامی پێدەبەخشێ.
لەبەر ئەوە هەقمانە بەم تەوارەوە شانازی بكەین و واجبمانە بەو یادگارییەوە بچینەوە دامێنی چیای بەرزی تێكۆشەرە دێرینەكان و شەهیدە سەربەرزەكانی یەكێتی . واجبمانە دامەنگیری گەلەكەمان بین تا لەم قۆناغەشدا متمانە بە هەڤاڵەكانی وەسفیە بكەن بۆ خەباتێك كە هێشتا زۆری لە ڕێیە و زۆری لەسەرە بیكات
بەھاری ساڵی 2020
هەواڵی زیاتر
-
شاڵاو کۆسرەت رەسوڵ: لیژنە بۆ رووداوی کوشتنی خەسرۆ گەردی پێکبهێنرێت
04:57 PM - 2024-04-25 -
وەسفییە... ماندوویەکی رووخۆش
12:25 PM - 2024-04-25 -
راپۆرتێكی دیكهی نێودهوڵهتی لهسهر خراپی ئازادی لهههرێم بڵاودهكرێتهوه
10:33 AM - 2024-04-25 -
نوسینگەی مەکتەبی سیاسی لەبەغدا کرایەوە
08:08 PM - 2024-04-24
زۆرترین خوێنراو
-
شاڵاو کۆسرەت رەسوڵ لە هەولێر بەشداری ژمارەیەک پرسە دەکات
پرسەنامە 09:17 PM - 2024-04-24 -
نوسینگەی مەکتەبی سیاسی لەبەغدا کرایەوە
کوردستان 08:08 PM - 2024-04-24 -
شاڵاو کۆسرەت رەسوڵ: یەکێتی ئامادەیە بۆ هەڵبژاردن
کوردستان 07:39 PM - 2024-04-24 -
ئاسایشی ههولێر گهنجێك دهكوژێت و بنهماڵهكهی داوای روونكردنهوه دهكهن
کوردستان 06:05 PM - 2024-04-24 -
پرسەنامەی قوباد تاڵەبانی بۆ خانەوادەی شەیدا سەید شۆڕش
پرسەنامە 05:37 PM - 2024-04-24 -
لە هەولێر و بەغدا زۆرترین پێشێلکاری بەرامبەر رۆژنامەنووسان ئەنجامدراوە
کوردستان 05:13 PM - 2024-04-24 -
سوپاسنامەیەک لە بنەماڵەی عەلی شامار و وەسفیە بەنی وەیس-ەوە
ی ن ک 05:11 PM - 2024-04-24 -
پەیامی یەکێتی دەگەیەنرێتە بەرەی تورکمانی
کوردستان 05:01 PM - 2024-04-24