ئارمانجێن دیدارا ئێكه‌تی

ئیمان عه‌بدولره‌زاق ئامێدی

سازدانا دیدارا ئێكه‌تی بڕیاره‌كا ژیرانه‌ و پێدڤییه‌كا هه‌نوكه‌یی بوو سه‌ركردایه‌تییا ئێكه‌تی نیشتمانی كوردستان دای، كو مه‌ره‌م ژێ نووكرنا دید و بۆچوون و سیاسه‌تا ئێكه‌تی نیشتمانییه‌ دهه‌موو بوار و جومگه‌هێن جڤاك و بڕیڤه‌برنا حوكمڕانی و كارێ حزبیدا، و ل گوره‌ی ڤێ پێنگاڤێ پێڤدییه‌ ئێكه‌تی شیانێن خۆ باشتر و به‌رفره‌هتر لێبكه‌ت پێخه‌مه‌ت خزمه‌تكرنا خه‌لكێ عیراقێ بگشتی و خه‌لكێ هه‌رێما كوردستانێ بتایبه‌تی و گۆمان تێدا نینه‌ كو نووكرنا ئێكه‌تی دێ ڕه‌هه‌ندێن خۆ یێن ناڤخۆیی و ده‌ره‌كی ژی هه‌بن. 
ل سه‌ر هه‌ردوو ئاستێن هه‌رێمێ‌ و عیراقێ، بڕیارا سازدانا دیدارێ‌ دقۆناغه‌كا هه‌ستیارا ئێكه‌تی نیشتمانیدا هاته‌دان، ژبه‌ركو پشتی چه‌ندین ساڵێن سستیێ دبوارێ‌ هه‌ڵسه‌نگاندن و ڕه‌خنه‌ ل خۆگرتنێ و لاوازبوونا بنه‌مایێن سیاسی و كۆمه‌ڵایه‌تی، ئێكه‌تی پێنگاڤا ڤه‌ژاندن و نووكرنا دید و نێڕینێن خۆ یێن ستراتیژی دا، ڕه‌نگه‌ ئه‌ڤ پرسه‌ بۆ هنده‌ك حزب و لایه‌نێن سیاسی كو چه‌ندین ساڵان د ڕه‌وشه‌كا ژ وی شێوه‌یدا ده‌ربازكربن یا ئاسایی بیت، به‌لێ‌ بۆ ئێكه‌تی نیشتمانی كو دبنه‌كوكدا ل سه‌ر بنه‌ما و بیروباوه‌ره‌كا فره‌هـ هزری و ئایدلۆژی هاتییه‌ دامه‌زراندن سوسیال دیمۆكرات كرییه‌ شوناسا خۆ یا هزری و سیاسی، نه‌یا ئاسایی یه‌ دڤێ قۆناغا هه‌ستیار و وه‌رچه‌رخانا دیروكیدا وان بنه‌مایان ژده‌ست بده‌ت و دهه‌مان ده‌مدا بیر ل سه‌ركه‌فتنێ بكه‌ت دبوارێن سیاسی و حوكمڕانی و ئیداریدا. 
هه‌بوون و ده‌ستبكاربوونا سه‌ركردایه‌تییا نوویا ئێكه‌تی نیشتمانی كو دڤێ قۆناغێدا ب ئاشكرا پێنگاڤان به‌ره‌ڤ گوهڕینان دهاڤێژیت، ئه‌گه‌ره‌كێ گرنگه‌ بۆ خورتكرن و بسه‌رخستنا پڕۆسێن چاكسازیێ.
كه‌واته‌ یا گرنگه‌ دیدارا ئێكه‌تی ب ڕژدی و هووربینی رێ و شێوازێن نووكرنا گشت جومگه‌هـ و سازیێن خۆ یێن حزبی دگه‌ل پێشهاتێن سه‌رده‌مانه‌ نوو بكه‌ت، دا بشێت ژلایه‌كیڤه‌ ئارمانجێن خۆ یێن حزبی و سیاسی بپێكیت، ژلایه‌كێ دیڤه‌ بهێزتر و ل ئاسته‌كێ شاره‌زا به‌شداری پڕۆسا سیاسییا عیراقێ ببیت و ببیته‌ هۆكارێ‌ مسوگه‌ركرنا گوهرین و بده‌ستڤه‌ئینانا ماف و داخوازیێن جڤاكی و دووباره‌ نه‌هجێ سه‌رۆك مام جه‌لال و سیاسه‌تا وی یا (چه‌پكه‌ گول) بۆ خه‌لكێ عیراقێ بگشتی و هه‌رێما كوردستانێ بتایبه‌تی به‌رچاڤ و شڕۆڤه‌ بكه‌ت، ل سه‌ر هه‌ردوو ئاستێن ئه‌قلیمی و جیهانی ژی ئێكه‌تی ببیته‌ پێشڕه‌و د ئه‌نجامدانا گوهڕینان.
پێدڤییه‌ ئێكه‌تی نیشتمانی پێداچوونه‌كا ڕژد و سه‌رده‌مانه‌ دسه‌رجه‌م بۆچوونێن خۆ یێن سیاسی و ستراتیژیدا بكه‌ت، به‌رنامه‌ و پڕۆژێن نووی بۆ چاره‌سه‌ركرنا كێشه‌ و گرفتێن نیشتمانی و نه‌ته‌وی داڕێژیت، نه‌خاسم بۆ چاره‌سه‌ركرنا كێشه‌یێن ده‌ڤه‌رێن ڤه‌قه‌تیایی و سیسته‌مێن حوكمڕانی و سیاسی و ئابووری ل هه‌رێما كوردستانێ و شێوازێ په‌یوه‌ندیێن هه‌رێما و كوردستانێ و حكومه‌تا فیدرالی.
پێدڤییه‌ ب گه‌شكرنا گیانێ خه‌باتێ دناڤ به‌ره‌بابێن نوویدا، و چاندنا هه‌ستێ حه‌ژێكرنێ‌ بۆ كوردستانێ و ژیانێ و خزمه‌تكرنا مرۆڤاتیێ،  دیدارا ئێكه‌تی ببیته‌ وێستگه‌هه‌كا ڕاسته‌قینه‌ بۆ نووكرنا ئێكه‌تیێ وه‌كو هێزه‌كا سیاسی و ببیته‌ فاكته‌ره‌كێ كاریگه‌ر و ئه‌رێنی بۆ گه‌شه‌پێدانا جڤاكێ عیراقی و كوردستانی و پێشڤه‌برنا پڕۆسێن سیاسی، ب وێ چه‌ندێ ئێكه‌تی وه‌كو سه‌رمایه‌كێ ڕاسته‌قینه‌ و یاریكه‌ره‌كێ خودان سه‌نگێ سیاسی دێ ڤه‌گه‌ڕیته‌ دگۆڕه‌پانا حوكمڕانیێ دا ل عیراقێ و ل هه‌رێما كوردستانێ.