سەرەنجەك دەربارێ هەلبژاردنێن پەڕلەمانێ كوردستانێ

ئیمان ئامێدی

پارتی دیموكراتی كوردستان یا ڕژدە هەلبژاردنێن پەڕلەمانێ كوردستانێ ل چریا ئێكێ‌ یا ئەڤ ساڵە بهێنە ئەنجامدان و ب هەمان سیستەم و یاسا هەلبژاردنێن دەربازبوویی، پڕانییا لایەنێن دی یێن سیاسی، ب تایبەتی ئێكەتی نیشتمانی كوردستان ل دژی وێ چەندێ نە ڕاوستاینە پڕۆسە ل دەمێ خۆ یێ ئاسایی بڕێڤە بچیت، بەلكو ئەو لایەنە دخوازن سیستەم و یاسا هەلبژاردنان بهێنە هەمواركرن، كۆمسیۆن كو ماوێ وێ یێ یاسایی بسەرڤە چووییە وەكو سازیەكا نیشتمانی دووبارە ب سازان و تەوافق و ل گورەی پیڤەرێن جیهانی بهێتە نووكرن و ئەكتیڤكرن.

ئێك ژخالێن پێدڤییە دەربارێ‌ هەلبژاردنان بهێتە بەحسكرن، پەیوەندی یا ب ڕاگەهاندنا ژڤانێ هەلبژاردنان ڤە هەی، ل گورەی ڕاگەهاندنا سەرۆكێ هەرێمێ، پێدڤییە ل ئێكی چریا ئێكێ هەلبژاردن بهێنە كرن، بەلێ‌ ل گورەی یاسایێ، بكێماتی كۆمسیۆن یا پێدڤی شەش هەیڤایە بۆ بەرهەڤیان، نوكە ژی پێویستە هەردوو یاسایێن هەلبژاردنان و كۆمسیۆنا بلندا سەربخۆ بهێنە هەمواركرن، بەلێ‌ وێ پرسێ ناكوكی و هەڤڕكی و كێشمەكێشەكا مەزن ل پەی خۆ ئینایە و هەمواركرنا وان دوو یاسا پێدڤی ب دەمەكێ درێژ هەیە، لەوڕا بدوور دهێتە زانین هەلبژاردن ل وی ژڤانی بهێنە ئەنجامدان ئەوێ سەرۆكێ هەرێمێ دیار كری.

خالەكا دی كو گرنگە بهێتە ئازراندن و بەحسكرن، پرسا تۆمارا دەنگدەرایە، كۆمسیۆنا هەلبژاردنان ل بەرە بۆ ڤێ پرۆسێ ژی پشتبەستیێ ب هەمان تۆمارا كەڤن بكەت، ل گورەی زانیاریان ئەو تۆمارا نوكە ل بەر دەستێ كۆمسیۆنێ، یا گونجای نینە، ژبەركو ژ فۆرما خۆراكی هاتییە وەرگرتن و كێم و كاسیێن مەزن تێدا هەنە، ناڤێن مریا ژێ نەهاتینە ڤەوژارتن، بایۆمەتری وەكو كۆمسیۆنا عیراقێ ل ساڵا 2021 ئەنجامدای و بۆ ئەگەرێ‌ كێمكرنا سەختەكاریێ ب ڕێژەیا زێدەتر ژ 90%، بۆ نەهاتییە كرن،  كەواتە مافێ لایەنێن نە ڕازییە داخوازا هەمواركرنا هەردوو یاسایێن كۆمسیۆنێ و هەلبژاردنان بكەن، بەروڤاژی وێ چەندێ ژی بدوور دهێتە زانین پڕۆسە بهێتە ئەنجامدان، ئێدی هەرێما كوردستانێ دێ كەڤیتە د ڤاڵاتیەكا یاساییدا.

PUKmedia