سەرنجەك دەربارێ‌ هەلبژاردنێن پەڕلەمانێ كوردستانێ

ڕۆژ بۆ ڕۆژێ‌ پرسا ئەنجامدان و ئەنجام نەدانا هەلبژاردنێن پەڕلەمانێ كوردستانێ یا گەرم و گۆڕ دبیت، هەرچەند سەرۆكێ هەرێما كوردستانێ بڕیارا بڕیڤەچوونا وێ پڕۆسێ ل (10) چریا ئێكێ‌ ئیمزا كرییە، بەلێ‌ لایەنێن سیاسیێن هەرێما كوردستانێ وێ بڕیارێ‌ ڕەت دكەن، ب مەرجەكی نەبیت كو یاسا هەلبژاردنان بهێتە هەمواركرن.

دڤێ نڤێسینێدا دێ ب كورتی بەحسێ كێشەیا كورسیێن كۆتا و شێوازێ دەنگدانێ بۆ بەربژێرێن كۆتا كەم.

ب دیتنا پڕانیا لایەنان هژمارا كورسیێن كۆتا دپەڕلەمانێ كوردستانێدا كو (11) كورسی نە، زۆرن و پێدڤییە بهێنە ڕێكخستن، ژلایەكێ دیڤە، هەموو كەسەك دزانیت كو نوونەرێن ڕاستەقینەیێن پێكهاتان نا گەهنە پەڕلەمانی، بەلكو ب چەندین شێوازێن فێل و سەختەكاریان ئیرادا خەلك و نوونەرێن پێكهاتان هاتییە قورغكرن و زۆڵمەكا مەزن ل وان پێكهاتا دهێتەكرن، و یا دیارە ژی كو تنێ لایەنەكێ كوردیێ مفای ژ كورسیێن كۆتا وەردگریت.

ئەوێن بناڤێ پێكهاتان دچنە پەڕلەمانێ كوردستانێ، نوونەراتییا وان پێكهاتان ناكەن، بەلكو ئەجیندایێن سیاسیێن لایەنەكێ دی جێبەجێ دكەن، نوونەراتییا وی لایەنی دكەن یێ ب ڕێیا دەنگێن سەربازی یان ژی ب دەنگێ هندەك حزبێن دیاركری و چەندین شێوازێن نە ڕەوا كورسیێن كۆتا بخۆ مسوگەر دكەت.

زۆر یا گرنگە، سندوقێن تایبەت و تۆمارەكا دەنگدەران یا تایبەت بۆ پێكهاتان بهێنە دورستكرن و ژ دەنگدەر و سندوق و تۆمارێن گشتی (كوردی) بهێنە جوداكرن، دا ئەو پێكهاتە (توركمان، كلد و ئاشور و سریان، ئەرمەن) دەنگی بدەنە كاندیدێن خۆ یێن ڕاستەقینە، نە ب دەنگێن هێزێن ئەمنی هندەك كەس و كاندیدێن دی ببنە نوونەرێن پێكهاتان.

بۆ ڤێ مەبەستێ ژی دیسان دێ بێژین، ڕاستڤەكرنا یاسا هەلبژاردنان یا گرنگە، و ئەگەر نەهێتە ڕاستڤەكرن زۆر یا بزەحمەتە هەلبژاردن بهێنە ئەنجامدان، و ئەگەر بهێنە ئەنجامدان ژی، بێ گۆمان پڕۆسەكا پاك و شەفاف و دلخۆشكەر نابیت، نەخاسم بۆ پێكهاتان ئەوێن هەتا ڕادەكێ دوور ژ دیموكراسیەتا هەرێمێ بێ ئومێد بووین.

ل دووماهیێ دێ بێژم: كۆتا مافەكە د دەرگەهی ڕا د دەنە پێكهاتان و دپەنجەرێ ڕا ژێ دهێتە ستاندن.

ئیمان ئامێدی