هه‌ڵبژاردن و خراپی بایكۆت و ده‌نگنه‌دان

لێره‌ و له‌وێ باس له‌ بایكۆتكردنی ده‌نگدان و هه‌ڵبژاردن ده‌كرێ، گروپ و كه‌مپه‌ینی بۆ پێكده‌هێنرێ و زۆر به‌ گرنگییه‌وه‌ باسی ده‌كه‌ن وه‌كو رێگای چاره‌سه‌ر ده‌یخه‌نه‌ڕوو كه‌ له‌ واقیعدا ئه‌وه‌ هه‌ڵه‌یه‌ و ئاسه‌واری خراپی له‌سه‌ر ئه‌نجامی هه‌ڵبژاردن ده‌بێت، به‌تایبه‌ت له‌و كۆمه‌ڵگانه‌ی ده‌سه‌ڵات و ئۆپۆزسیۆن بوونیان هه‌یه‌ و گۆڕانكاری و چاكسازی و ده‌ستاوده‌ستكردنی ده‌سه‌ڵات پێویسته‌. 

ئه‌گه‌ر به‌شێك له‌ هۆكاره‌كانی بایكۆتكردن ئه‌وه‌بێت گه‌نده‌ڵی هه‌یه‌ و ده‌سه‌ڵات نادادپه‌روه‌ره‌، ئه‌وا خۆ بایكۆتكردن و ده‌نگنه‌دان له‌ به‌رژه‌وه‌ندی هێزی ده‌سه‌ڵاتداره‌ و ئۆپۆزسیۆن له‌ بایكۆتكردن زیانی پێ ده‌گات، هه‌روه‌ها كه‌می ئاستی به‌شداریكردنیش نیشانه‌ی پرسیار له‌ بوونی دیموكراسی و ئازادی دروستده‌كات و له‌ كۆتاییشدا پرۆسه‌كه‌ دروست و باش نابێت.   

بۆ هه‌ڵبژاردنی ئه‌نجومه‌نی نوێنه‌رانی عیراق و بۆ هه‌رێمی كوردستان بایكۆتكردن له‌ ئه‌نجامی كورسییه‌كانی كورد له‌ناو هه‌رێم كه‌مناكاته‌وه‌، چونكه‌ ژماره‌ی كورسییه‌كان جێگیرن و به‌پێی بازنه‌كان كورد خاوه‌ن كورسیی دیاریكراوی خۆیه‌تی، به‌ڵام بۆ ناوچه‌كانی كێشه‌ له‌سه‌ر، ئه‌وا زیانی زۆری بۆ كورد ده‌بێت و ژماره‌ی كورسییه‌كانی كورد به‌نده‌ به‌ رێژه‌ی به‌شداریكردنی خه‌ڵكه‌وه‌ بۆ نموونه‌ له‌ شارێكی وه‌كو كه‌ركوك كه‌ شه‌ڕ له‌سه‌ر ناسنامه‌ و خاكه‌كه‌ی به‌رده‌وامه‌.

 بایكۆتكردنی هه‌ڵبژاردن و ده‌نگدان دوو زیانی زۆر گه‌وره‌ی هه‌یه‌: یه‌كه‌میان هاوڵاتی مافێكی راسته‌قینه‌ و كاریگه‌ری خۆی پێشێل ده‌كات، رۆڵی خۆی هه‌ڵده‌په‌سێرێت له‌ناو پرۆسه‌ی دیموكراسی و سیاسی. دووه‌میان ئه‌وه‌یه‌ ده‌رفه‌ت بۆ ئه‌وه‌ ده‌خاته‌ روو بۆ هێزی ده‌سه‌ڵاتدار كه‌ ده‌نگده‌ری نه‌گۆڕی خۆی هه‌یه‌ و به‌پێی ئه‌و ده‌نگده‌رانه‌ی كورسی ده‌هێنێت، ویستی هێزی یه‌كه‌م هه‌میشه‌ ئه‌وه‌یه‌ به‌شداری سیاسی و ده‌نگنه‌دان و بایكۆت بوونی هه‌بێت بۆ ئه‌وه‌ی چه‌ند بۆی ده‌كرێت ساخته‌كاری تیادا بكات و له‌ لووتكه‌ی ده‌سه‌ڵاتدا بمێنێته‌وه‌.

له‌ به‌رامبه‌ر ئه‌وه‌دا ده‌نگدان و به‌شداریكردنی سیاسی دوو سوودی زۆر گرنگیشی هه‌یه‌ كه‌ بریتین له‌ یه‌كه‌میان هاووڵاتی مافی به‌شداریی سیاسی خۆی ده‌كاته‌ كردار و رێگه‌ نادات خه‌ڵكانی تر ده‌نگه‌كه‌ی ساخته‌ بكه‌ن و خۆی ده‌بێته‌ خاوه‌نی راسته‌قینه‌ی مافه‌كانی خۆی. 

دووه‌میشیان ئه‌وه‌یه‌ ده‌یسله‌مێنێت خاوه‌ن هۆشیارییه‌كی راسته‌قینه‌یه‌ و ده‌یه‌وێت ده‌نگی راستی زیاتر به‌رزببێته‌وه‌ یان ئه‌و لایه‌نه‌ی كه‌ سۆز و ئینتیمای بۆی هه‌یه‌ و ده‌یه‌وێت سه‌ركه‌وتوو بێت.   

بۆیه‌ به‌ڕای من ئه‌و كه‌س و گروپ و كه‌مپه‌ینانه‌ی داوای بایكۆتكردنی هه‌ڵبژاردن ده‌كه‌ن له‌ دڵسۆزییه‌وه‌ نییه‌، به‌ڵكو ده‌ربڕینێكی نادروسته‌ و ده‌یانه‌وێت تۆڵه‌ له‌ لایه‌نی به‌رامبه‌ر بكه‌نه‌وه‌، به‌ڵام هه‌ست به‌وه‌ ناكه‌ن به‌و كاره‌یان خزمه‌ت به‌ ده‌سه‌ڵاتی ئێستای عیراق ده‌كه‌ن و ده‌رفه‌تی ساخته‌كاریان بۆ دروستده‌كه‌ن و ئه‌وه‌ش ئاسه‌واری خراپی له‌سه‌ر كۆی پرۆسه‌ی سیاسی ده‌بێت و به‌لایه‌نی كه‌مه‌وه‌ ئاسه‌واره‌ خراپه‌كانی بایكۆتكردن تا هه‌ڵبژاردنی دواتر ده‌مێنێته‌وه‌ و خه‌ڵكیش باجه‌كه‌ی ده‌ده‌ن و تواناشیان نییه‌ چاره‌سه‌ری بكه‌ن.

سۆزان حه‌مه‌تاته‌   
PUKmedia