Qubad Talebanî: Divê gaz ji bo pêdiviyan karebê bê bikar anîn

Ragihandina Cîgirê Serokwezîr

Qubad Talebanî û Masamishi Sugaya, Berpirsê Rojhilata Navîn yê Wezareta Derve ya Japonya

Cîgirê serokwezîr Qubad Talebanî pêşwazî li Masamishi Sugaya, berpirsê Rojhilata Navîn yê Wezareta Derve ya Japonya kir û li ser çawaniya xurtkirina têkiliyên Japonya bi Herêma Kurdistanê û Iraqê re gotûbêj kirin.

Di destpêka civînê de, ku di 2ê Kanûna Pêşîn ya sala 2025an de hat lidarxistin, êrîşa li ser zeviya gazê ya Kormorê hat gotûbêjkirin û her du aliyan bûyer wekî êrîşek li ser binesaziya enerjî û aborî ya Herêma Kurdistanê û Iraqê bi nav kirin , her weha Masamishi Sugaya piştgirî û hevxemiya welatê xwe ji bo Herêma Kurdistanê anî ziman û êrîş şermezar kir û hêvî kir ku êrîşên bi vî rengî careke din dubare nebin.

Qubad Talebanî rave kir ku ew ne alîgirê hinardekirina gazê ji Herêma Kurdistanê ne, di şûna wê de, divê ew ji bo dabînkirina pêdiviyên navxweyî û dabînkirina kareba û xizmetkirina pêşkeftina aborî ya Kurdistanê were bikar anîn.

Di beşeke din ya civînê de, pêwîstiya parastina ewlehî û aramiyê li Îraq û Herêma Kurdistanê hat gotûbêj kirin, bi taybetî di vê qonaxê de ku Iraq û Kurdistan ber bi pêşketina aborî ve diçin û kompaniya û veberhênerên ji Japonya û welatên din xwesteka xwe ya veberhênanê li Îraqê zêde kirine.

Di vê çarçoveyê de, Cîgirê Serokwezîr xurtkirina peywendiyên aborî û bazirganî yên di navbera Japonya, Îraq û Herêma Kurdistanê de wekî gaveke pêwîst nirxand û tekez kir ku Japonya dikare roleke bibandortir di pêvajoya pêşketina Kurdistan û Îraqê de bilîze.

Mijareke din ya ku hat gotûbêjkirin pêvajoya siyasî ya Îraqê piştî hilbijartinên Civata Nûneran bû.

Herdu aliyan hêvî kirin ku hikûmeta Îraqê ya bê di demek nêzîk de û bi awayekî ku hemû civakan razî bike, were avakirin.

Derbarê pêgeh Kurd li Îraqê de, Talebanî got ku divê pêgeha Kurd li Bexdayê bihêztir be daku pêgeha herêmê xurt bibe û were parastin.

PUKMEDIA