Maduro ji bo Trump : Belê ji bo Aştiyê

euro News

Serokê Venezuelayê Nicolas Maduro

Dema ku rojnamevanekî CNNê ji Serokê Venezuelayê Nicolas Maduro di mîtîngekê de li Caracasê ji wî pirsî gelo peyamek wî ji bo Trump heye, wî bi îngilîzî got: Erê ji bo aştiyê, erê ji bo aştiyê.

Maduro bang li gelê Amerîka kir ku ji bo aştiyê rawestin û got: Êdî şerên bê dawî bes in,êdî şerên sitemkariyê bes in, êdî Lîbya bes e, êdî Afganistan bes e.

Wezîrê Parastinê yê Amerîka Pete Hegseth, ku vê dawiyê dest bi gotina Wezîrê Şer kiriye, roja Pêncşemê destpêkirina Operasyona Rima Başûr ji bo têkoşîna li dijî bazirganiya madeyên hişber li herêmê ragihand.

Di hefteyên dawî de, hêzên Amerîkî li herêmê nêzîkî 20 belemên ku guman tê kirin qaçaxçîtiya madeyên hişber dikin noq kirine û nêzîkî 80 kes kuştine.

Ji ber hebûna mezin ya leşkerên Amerîkî li peravên Venezuela, guman derketin holê ka gelo hikûmeta Amerîkî li Caracas guhertina rejîmê dixwaze yan na.

Di bersivê de,hikûmeta Moskow, hevpeymanek nêzîk ya Caracas, ji rêveberiya Trump xwest ku di bin navê têkoşîna li dijî madeyên hişber de, destwerdana karûbarên navxweyî yên dewletên serwer neke.

Ajansa nûçeyan a Rûsî (TASS) ji zarê berdevka Wezareta Derve ya Rûsya Maria Zakharova ragihand ku rewş her ku diçe xirabtir dibe ji ber ku rayedarên Amerîkî çi belge pêşkêş ne kirine ku keştî û ekîbên armancgirî bi bazirganiya madeyên hişber ya ne yasayî ve girê bide.

PUKMEDIA