PUKmedia 2010-04-20   19:43:02  كه‌ركوك/ عومه‌ر غه‌ریب
له‌چه‌ند هه‌ڵمه‌تێكی گه‌ڕان و پشكنینی هێزه‌كانی پۆلیس له‌چه‌ند ناوچه‌یه‌كی كه‌ركوكدا 27  كه‌سی داوكراوو گومانلێكراو ده‌ستگیركران.
له‌و باره‌یه‌وه‌ عه‌مید سه‌رحه‌د قادر به‌ڕێوه‌به‌ری پۆلیسی قه‌زاو ناحیه‌كان پێی راگه‌یاندین كه‌ هه‌ڵمه‌ته‌كه‌یان به‌ دوو قۆناغ به‌ڕێوه‌چووه‌و ئاشكرایكرد كه‌ قۆناغی یه‌كه‌میان له‌ گوندی باجوان به‌ڕێوه‌چووه‌ كه‌ ده‌كه‌وێته‌ سه‌ر رێگای كه‌ركوك- دوبزو تێیدا چوار كه‌سی داواكراوو سیانزه‌ كه‌سی گومانلێكراو ده‌ستگیركراون كه‌ ده‌ستیان هه‌بووه‌ له‌ كرده‌وه‌ تیرۆریستییه‌كانی ناوچه‌كه‌و بڕیاری پێشوه‌ختی ده‌ستگیركردنی دادگاشیان هه‌بووه‌و له‌و هه‌ڵمه‌ته‌دا ده‌ست به‌سه‌ر چوار ماتۆڕسكیلیشدا گیراوه‌ كه‌ بۆ په‌لاماره‌ تیرۆریستییه‌كان به‌كارهێندراون.
قۆناغی دووه‌می هه‌ڵمه‌ته‌كه‌ش بریتییه‌ له‌ده‌ست به‌سه‌رداگرتنی بڕێكی زۆر ته‌قه‌مه‌نی كه‌ له‌كاتی گه‌ڕانه‌وه‌ی هێزه‌كه‌یاندا له‌ناوچه‌یه‌كی گه‌ڕه‌كی عه‌مه‌ل شه‌عبی- ی شاری كه‌ركوك دۆزراونه‌ته‌وه‌ كه‌ پێده‌چێت بۆ مه‌به‌ستی كاری تیرۆریستی له‌و ناوچه‌یه‌ حه‌شار درابێت.
به‌ڕێوه‌به‌ری پۆلیسی قه‌زاو ناحییه‌كانی كه‌ر كوك ئاشكراشیكرد ئه‌م هه‌ڵمه‌تانه‌ بۆ پاراستنی بارودۆخی ئه‌منی ناو شاری كه‌ركوكه‌ له‌كاتێكدا تیرۆریستان هه‌وڵده‌ده‌ن هه‌ندێك ناوچه‌ی ده‌وروبه‌ری كه‌ركوك بكه‌ن به‌مۆڵگه‌ی خۆیان و له‌و رێگه‌یه‌وه‌ په‌لاماره‌ تیرۆریستییه‌كان له‌ ناوشاری كه‌ركوكدا جێبه‌جێبكه‌ن.
له‌لایه‌كی تریشه‌وه‌ هه‌مان رۆژ هێزه‌كانی پۆلیسی ئاماده‌ی كه‌ركوكیش له‌هه‌ڵمه‌تێكدا 10 گومانلێكراویان ده‌ستگیر كرد.
له‌و باره‌یه‌وه‌شه‌وه‌ عه‌مید خه‌تاب عومه‌ر به‌ڕێوه‌به‌ری هێزه‌كانی پۆلیسی ئاماده‌ی كه‌ركوك پێی راگه‌یاندین كه‌ به‌به‌شداری هه‌زار ئه‌فسه‌رو پۆلیسی هێزه‌كانی پۆلیسی ئاماده‌ی كه‌ركوك  هه‌ڵمه‌تێكی پشكنین و گه‌ڕانی به‌رفراوانیان له‌ناوچه‌ی پیشه‌سازی شاری كه‌ركوك جێبه‌جێكردووه‌، ئه‌وه‌شی پێ راگه‌یاندین كه‌له‌و هه‌ڵمه‌ته‌دا هێزه‌كانیان (10) گومانلێكراویان ده‌ستگیركردووه‌ كه‌هیچ به‌ڵگه‌نامه‌یه‌كیان پێ نه‌بووه‌و به‌بێ پرس و ره‌زامه‌ندی ئیداره‌و ده‌زگا ئه‌منیه‌كانی تر له‌پارێزگاكانی تره‌وه‌ روویان كردووه‌ته‌ شاری كه‌ركوك و به‌نهێنی له‌و ناوچه‌یه‌ جێگیربوون.