سبه‌ی یه‌كه‌م زه‌نگی هه‌ڵمه‌تی هۆشیاركردنه‌وه‌ دژ به‌نه‌هێشتنی توندوتیژی لێده‌درێت
 

        
PUKmedia شه‌رمین كه‌ریم    17:22       18/11/2008

له‌ژێر ناونیشانی (نا بۆ توندوتیژی به‌ڵێ بۆ یه‌كسانی جێنده‌ری) بڕیاره‌ سه‌عات 10 ی سه‌ر له‌به‌یانی 19/11 یه‌كه‌م زه‌نگی هه‌ڵمه‌تی هۆشیاركردنه‌وه‌ له‌سه‌رتاسه‌ری كوردستان لێبدرێت .
جینان قاسم وه‌زیری هه‌رێم بۆ كاروباری ژنان و ئافره‌تان له‌حكومه‌تی هه‌رێمی كوردستان له‌لێدوانێكدا به‌ PUKmedia ی راگه‌یاند: ئه‌م هه‌ڵمه‌ته‌ له‌ 19 تا 25 ی مانگ به‌رده‌وامه‌و بێگومان ئه‌مه‌ش به‌هاوكاری سه‌رۆكایه‌تی ئه‌نجومه‌نی وه‌زیران و سندوقی نه‌ته‌وه‌یه‌كگرتووه‌كان بۆ نیشته‌جێ و وه‌زاره‌ته‌كانی حكومه‌تی هه‌رێمی كوردستان به‌ڕێوه‌ده‌چێت.
وتیشی: دوابه‌دوای كۆبوونه‌وه‌كانمان له‌گه‌ڵ رێكخراوه‌كانی ژنان و ئافره‌تان بڕیاردرا كه‌ ماوه‌ی ئه‌و هه‌فته‌یه‌ به‌شێوه‌ی گروپ روو له‌ شارو شارۆچكه‌كان و گه‌ڕه‌كه‌ میللیه‌كانی ناو شاره‌كان بكرێت به‌هاوكاری له‌گه‌ڵ ستافی نووسینگه‌و رۆژی 24 ی مانگیش كۆنفراسێكی هه‌رێمایه‌تی له‌سه‌ر ئاستی كوردستان له‌هه‌ولێری پایته‌خت به‌ڕێوه‌ده‌چێت.