سه‌رۆك تاڵه‌بانی: پێویسته‌ پێكهاته‌كانی كه‌ركوك بگه‌نه‌ چاره‌سه‌رێكی كه‌ركوكییانه‌ بۆ كێشه‌كانیان

PUKmedia  ‌        20:46     12/11/2008

ئێواره‌ی ئه‌مڕۆ 12/11 له‌شوێنی حه‌وانه‌وه‌ی خۆی له‌به‌غدا، مام جه‌لال سه‌رۆك كۆماری عیراق چاویكه‌وت به‌ وه‌فدێكی پارتی توركمان ئیلی كه‌پێكهاتبوو له‌ ریاز ساری سه‌رۆكی پارتی توركمان ئیلی و محه‌مه‌د غاوی به‌رپرسی لقی به‌غدای پارته‌كه‌ و یه‌شار وه‌نداوی سه‌رۆكی یه‌كێتی ئه‌فسه‌ره‌ خانه‌نشینكراوه‌كانی توركمان و عاسم ئه‌مین راوێژكاری پارته‌كه‌ و فاروق موختار ئۆغڵو.

له‌دانیشتنێكدا سه‌رۆك تاڵه‌بانی ته‌ئكیدیكرده‌وه‌ له‌سه‌ر برایه‌تی كورد و توركمان و برایه‌تی كورد و توركمان و عه‌ره‌ب، روونیشیكرده‌وه‌ كه‌ توركمان وه‌ك نه‌ته‌وه‌یه‌ك شایسته‌ی هه‌موو پشتیوانییه‌كی سیاسی و ئیداری و ئابووریین، هه‌روه‌ها ته‌ئكیدیشیكرده‌وه‌ له‌سه‌ر برایه‌تی سه‌رجه‌م پێكهاته‌كانی كه‌ركوك و پێویسته‌ هاوكاری یه‌كتری بكه‌ن بۆئه‌وه‌ی بگه‌نه‌ چاره‌سه‌رێكی كه‌ركوكییانه‌ بۆ كێشه‌كانیان.

له‌به‌شێكی تری قسه‌كانیدا سه‌رۆك تاڵه‌بانی جه‌ختیكرده‌وه‌ له‌سه‌ر پێویستی یه‌كگرتنی رێكخراوه‌كانی كۆمه‌ڵگه‌ی مه‌ده‌نی له‌شاره‌كه‌دا و پێویستی بوونی په‌یوه‌ندی بازرگانی و ئابووری هاوبه‌ش له‌نێوان كورد و توركمان و عه‌ره‌به‌كانی شاره‌كه‌.

له‌لایه‌ن خۆشیه‌وه‌ ریاز ساری به‌ناوی ئه‌ندامانی وه‌فده‌كه‌وه‌ هیوای ته‌ندروستی و ته‌مه‌ن درێژییان بۆ سه‌رۆك تاڵه‌بانی خواست، ته‌ئكیدیشیانكرده‌وه‌ كه‌ دانیشتوانی كه‌ركوك پێویسته‌ له‌نێو خۆیاندا یه‌ك بن و ئه‌و زوڵم و ستمه‌ی له‌سه‌ر توركمانه‌كانه‌ لاببرێت، هه‌روه‌ها ته‌ئكیدیشیان كرده‌وه‌ له‌سه‌ر پێویستی پته‌وكردنی هاوكاری نێوان پارته‌ كوردی و توركمانییه‌كان بۆئه‌وه‌ی چاره‌سه‌رێكی گونجاو بۆ كێشه‌ هه‌نووكه‌ییه‌كانی شاره‌كه‌ بدۆزنه‌وه‌.