هه‌ولێر.. ده‌یان پارچه‌ شوێنه‌وار ده‌دۆزرێنه‌وه‌

مێژووی هه‌ندێكیان بۆ هه‌زاره‌ی سێیه‌می پێش زایین ده‌گه‌ڕێته‌وه‌

به‌ئاماده‌بوونی نوێنه‌رانی به‌ڕێوه‌به‌رایه‌تی گشتی شوێنه‌وارو راگری كۆلیجی ئه‌ده‌بیات و به‌ڕێوه‌به‌ری شوێنه‌واری هه‌ولێر و سه‌رۆكی به‌شی شوێنه‌وار، ئه‌مڕۆ 28-5، كۆنگره‌یه‌كی رۆژنامه‌نوسی سه‌باره‌ت به‌دۆزینه‌ی چه‌ندین پارچه‌ی شوێنه‌وار له‌ گردی كلك مشك ئه‌نجامدرا.
حه‌یده‌ر حه‌سه‌ن، به‌ڕێوه‌به‌ری شوێنه‌واری هه‌ولێر به‌ PUKmedia ی راگه‌یاند: له‌كاتی راهێنانی تایبه‌ت به‌ خوێندكارانی به‌شی شوێنه‌واری كۆلیژی ئه‌ده‌بیاتی زانكۆی سه‌ڵاحه‌دین له‌ گردی كلك مشك، كه‌ گردێكی شوێنه‌وارییه‌، توانرا نزیكه‌ی 83 پارچه‌ی شوێنه‌واری گرنگ و  مێژوویی بدۆزینه‌وه‌ كه‌ مێژووه‌كه‌یان ده‌گه‌ڕێته‌وه‌ بۆ چه‌ند سه‌رده‌مێكی جیاواز.
ئاماژه‌ی به‌وه‌شكرد، كۆنترین ئه‌و پارچه‌ شوێنه‌وارییانه‌ مێژووه‌كه‌ی ده‌گه‌ڕێته‌وه‌ بۆ سه‌ره‌تای هه‌زاره‌ی سێیه‌می پێش زاین.
راشیگه‌یاند: گردی كلك مشك كه‌ له‌ساڵی 1946 ه‌وه‌ له‌لایه‌ن ده‌سته‌ی گشتی شوێنه‌واری عیراقی وه‌كو شوێنێكی شوێنه‌واری ده‌ستنیشانكراوه‌، بۆ یه‌كه‌مجار له‌ساڵی 2010 به‌هاوكاری تیمی پسپۆری شوێنه‌واری ئه‌مریكی و فه‌ره‌نسی، هه‌ڵكۆڵینی شوێنه‌واریی بۆ ئه‌نجامدراوه‌.
ناوبراو ئاماژه‌ی به‌وه‌شكرد، له‌ وه‌رزی چواره‌می هه‌ڵكۆڵینی شوێنه‌واریی كه‌ له‌لایه‌ن تیمی زانكۆی سه‌ڵاحه‌دین و به‌ڕێوه‌به‌رایه‌تی شوێنه‌واری هه‌ولێر ئه‌نجامدرا، چه‌ندین كه‌لوپه‌ل و شوێنه‌واری گرنگ ده‌ركه‌وت كه‌ ژماره‌یان 83 پارچه‌یه‌و بریتین له‌ دیواری خانوو و گۆزه‌ی فوخاری و قاپ و په‌رداخ و مه‌نجه‌ڵ، له‌گه‌ڵ كۆمه‌ڵه‌ ئێسكێكی مرۆڤ و دۆزینه‌وه‌ی گۆڕی مرۆڤ و كۆمه‌ڵێك ئامرازی به‌ردینی وه‌ك سه‌ناره‌ی ده‌رگاو چه‌قۆو كه‌لوپه‌لی ناوماڵ.
به‌وته‌ی به‌ڕێوه‌به‌ری شوێنه‌واری هه‌ولێر، گرنگترین ئه‌و پارچه‌ شوێنه‌وارییانه‌ی له‌ گردی كلك مشك دۆزراونه‌ته‌وه‌، مۆرێكی لوله‌یی و كۆمه‌ڵێك بوكه‌ڵه‌ی ئاژه‌ڵی و كۆمه‌ڵێك كه‌لوپه‌لی جوانكاری خانمان و كۆمه‌ڵێك به‌ردی گرانبه‌هایه‌.
حه‌یده‌ر حه‌سه‌ن ئاشكراشیكرد، له‌ئه‌نجامی ئه‌و گرێبه‌سته‌ی كه‌ له‌گه‌ڵ چه‌ند زانكۆیه‌كی جیهانی ئه‌نجامیانداوه‌، توانیویانه‌ چه‌ندین شوێنه‌واری گرنگ له‌ هه‌ردوو ناحیه‌ی شه‌مامك و گوێر بدۆزنه‌وه‌، هه‌روه‌ك توانیویشیانه‌ 100 شوێنی گه‌وره‌ی شوێنه‌واریی له‌ژێرزه‌وی له‌ رێگای مانگی ده‌ستكرده‌وه‌ بدۆزنه‌وه‌.
راشیگه‌یاند: نزیكه‌ی 1200 ناوچه‌ی شوێنه‌واری له‌سنوری شاری هه‌ولێر هه‌یه‌.

PUKmedia به‌هادین سابیر - هه‌ولێر