ئه‌لبوومی یه‌كی شه‌ش و پێشانگایه‌كی تایبه‌ت به‌چالاكییه‌كانیان

گروپی دۆق شارته‌ر ئه‌لبوومی یه‌كی شه‌ش ده‌كاته‌ دیاری بۆ منداڵان

گروپی دۆق شارته‌ر بۆ هونه‌ری منداڵان له‌ یادی 10 ساڵه‌ی ته‌مه‌نی گروپه‌كه‌ی و له‌ رۆژی 1-6 رۆژی جیهانیی منداڵان دا، ئه‌لبوومی (یه‌كی شه‌ش) ده‌كاته‌ دیاری بۆ منداڵانی كوردستان.

ئه‌لبوومی (یه‌كی شه‌ش) پێكهاتووه‌ له‌ شه‌ش ڤیدیۆ كلیپ، له‌وانه‌: (وانه‌ی جوگرافیا، سمۆره‌، 10 هه‌ڵپه‌ڕكێی كوردی، رۆژی خۆشی، سیلاهۆن، یه‌كی شه‌ش)، موزیكی سه‌رجه‌م ڤیدیۆ كلیپانه‌ش له‌لایه‌ن توانای خاڵه‌ حه‌مرین-ـه‌وه‌ دانراوه‌و له‌لایه‌ن رێباز رواندزی-ـه‌وه‌ كاری مۆنتاژی بۆ كراوه‌.

له‌ناو ئه‌و ئه‌لبوومه‌دا گۆرانی (یه‌كی شه‌ش) هه‌یه‌ كه‌ تایبه‌ته‌ به‌ رۆژی جیهانیی منداڵان و هۆنراوه‌ی عه‌بدولوه‌هاب شوانی-ـه‌و هه‌ریه‌ك له‌ هه‌كار حه‌سه‌ن و یاد سه‌باح ره‌نجده‌ر و زیلان سه‌عید ده‌یڵێن، وێنه‌گرتنی ئارام لالۆ و ته‌كنیكی مه‌حمود ئه‌حمه‌ده‌، كاری ده‌رهێنانی سه‌رجه‌م ئه‌م به‌رهه‌مانه‌ش له‌لایه‌ن هۆگر ئه‌حمه‌د-ـه‌وه‌ كراوه‌.

سه‌باره‌ت به‌ چالاكییه‌كانیان له‌ رۆژی جیهانیی منداڵاندا، شێرزاد ره‌سوڵ فه‌قێ سه‌رپه‌رشتیاری به‌رهه‌مه‌كان به‌ PUKmedia ی راگه‌یاند: له‌ رۆژی جیهانیی منداڵاندا جگه‌ له‌م ئه‌لبوومانه‌، به‌ بۆنه‌ی یادی داگیرساندنی مۆمی ته‌مه‌نی 10 ساڵه‌ی گرووپه‌كه‌مان پێشانگایه‌كی ئه‌رشیفی گرووپی دۆق شارته‌ر ده‌كه‌ینه‌وه‌ كه‌ تیایدا پوخته‌یه‌ك له‌ ئه‌رشیفی 10 ساڵه‌ی گرووپه‌كه‌ پیشان ده‌درێت، هه‌روه‌ها چه‌ندین نمایشی زیندوو له‌لایه‌ن ئه‌ندامانی گرووپه‌وه‌ پێشكه‌ش ده‌كرێت.

PUKmedia پێشڕه‌و خالید -  هه‌ولێر