مانگرتووان دوو بژاردە دەخەنە بەردەم حكومەت

خۆپیشاندانە ناڕەزاییەكانی باشوری عیراق

مانگرتووانی شەش پارێزگای عیراق دوای ئەنجامدانی كۆبوونەوەیەك لە شاری رومادی، رایانگەیاند كە تەنها دوو بژاردەیان هەیە، ئەوانیش، روبەڕوبوونەوەی چەكداری یان راگەیاندنی هەرێمەكان.

لە بەیاننامەیەكدا كە وێنەیەكی دەست PUKmedia كەوتووە، تێیدا هاتووە: لیژنەكان دەستپێشخەرییەكەی شێخ عەبدولمەلیك سەعدی بەرزدەنرخێنن، بەڵام وەڵامدانەوەی حكومەت بە نەخێر بووە سەبارەت بە شوێنی دانوستاندنەكە، پاشان بەدوایدا چەند تاوانێك ئەنجامدران، وەك تاوانەكەی رۆژی هەینی لە دیالە و بەغدا،  رۆژی شەممە لە رومادی، پێشتریش قەسابخانەكەی حەویجە.

لە بەشێكی تری بەیاننامەكەدا هاتووە: بەگوێرەی ئەو هەڵسوكەوتانە، لیژنە جەماوەرییەكان پێیانوایە حكومەت ئەو دانوستاندنە رەتدەكاتەوە، لەبەرئەوە تەنها دوو بژاردەیان تر لەبەردەمدا ماوە، ئەوانیش، یان روبەڕوبوونەوەی چەكدارییە، یان راگەیاندنی هەرێمەكانە.

بەیاننامەكە داواشی لە زانایان و سیاسەتمەداران و ریش سپی و ئەكادیمییەكان لە ناوەوەو دەرەوەی وڵات كردووە، لەماوەی پێنج رۆژدا هەڵوێستی خۆیان لە بەرامبەر ئەو دوو بژاردەیە بخەنەڕوو، ئەگەر بێدەنگییان نیشاندا، ئەوە مانای رازیبوونە بەو بژاردەیەی كە لیژنەكان پەنای بۆدەبەن.

PUKmedia هونەر مەنسور